DANIEL 11:40 - BIBEL JAMITA NA DENGGAN

⁴⁰ Muda marayak marujung ma kuaso ni raja Siria i, ro ma raja ni Mesir mamorangi ia. Jadi baloson ni raja ni Siria ma parangan i lopus marujung. Padohotonnia ma bahat kareta porang, kudo, dohot kapal. Mangaroro ma ia songon aek magodang jana solatonna bahat luat.

DANIEL 11:40 ပူးပေါင်းရင်းမြစ်များ

JESAYA 21:1

Songon on ma alatan taringot tu Babel: Songon halingsungsung na mardonging na mamolus di parhorsihan, songon i ma haroro ni parmaraan sian luat sihabiaran.

JESAYA 5:28

Tajom do anak ni pana ni halahi jana siorna i ripe manembakkon. Sisilon ni kudona i songon pir ni batu loting, jana parputar ni roda ni karetana i songon hipas ni halingsungsung.

JESAYA 66:15

Giot ro ma Tuhan marhite api. Jana karetaNia songon halingsungsung, laho palaluhon rimasNa na marapi purun.

JEREMIA 4:13

Ligi da, marmuldopan musu i songon ombun. Angka kareta porangna i songon halingsungsung, angka kudona i humipas sian unggas rajawali. Marjaya ma hita on! Mago ma hita!

JEHESKIEL 38:4

PaegolonKu ma ia, baenonKu harihir di isang-isang na i, jana ropoonKu haruar rap dohot sude parangannia i. Bahat sajo do parangannia na markudo na marpakean saragam i. Marsioban podangna parincena do ganop parajurit.

JEHESKIEL 38:9

Ro ma ia dohot tentarania dohot bahat bangso mangudurkon ia mamorangi songon halingsungsung lalu mangalingkup luat i sude songon ombun.”

DANIEL 11:10

Jadi marhobas ma angka anak ni raja ni Siria laho marporang dohot mambaen tentara na bahat. Maju ma sada sian halahi margalusak songon aek magodang torus mamorangi benteng ni musu.

DANIEL 11:11

Jadi muruk ma raja ni Mesir jana maju muse ma ia tu galanggang ni porang mangalo raja ni Siria i. Tartaluhon ia do tentara ni Siria na bahat i.

DANIEL 11:13

Padua nolihon dibaen raja ni Siria parangan na bahat, umbahat sian na parjolo i dope. Muda dung dapot hatihana, pungkaonnia ma mardalan rap dohot tentara na marsinjata na singkop i.

DANIEL 11:22

Sude tentara na ro angkon diayup do dijolona jana dipatalu, jana dohot muse do sahalak Parjanjian.

DANIEL 11:25

Mardongan habaranion baenonnia ma tentara na bahat laho mamorangi Mesir na dung hobas muse laho mangalo ia dohot tentara na gogo. Tapi tarpaoto ma raja ni Mesir gabe nada manjadi karejo na.

DANIEL 11:35

Hona bunu ma deba angka pamimpin na marbisuk i, tapi akibatna songon on ma: gabe mur polin ma angka jolma i. Songon i ma torus lalu tu hatiha na parpudi, i ma hatiha na dung ditontuhon Debata.

DANIEL 11:39

Pilionnia ma angka jolma na marsomba tu debata na asing i laho mampartahankon angka bentengnia i. Sanga ise na ra manjagit ia songon raja, lehenonnia ma hasangapan na godang dohot pangkat na gincat dohot tano bage songon upana.

DANIEL 11:7

Nada sadia honok dung i, gabe raja ma sada halak sian horong ni boru ni raja i. Pajoloonnia ma mamorangi tentara ni raja ni Siria, roroonna tu bentengna i lalu taluhononna.

DANIEL 12:4

Dung i didok surusuruan i muse ma tu au, “Daniel, tutup ma Buku i saonnari jana baen ma segelna anso tongtong tutup Buku i lopus tu hatiha na parpudi. Bahat do halak na giot manangkasi sanga aha na giot tarjadi. Tapi nada adong gunana karejo ni halahi i.”

DANIEL 12:9

Dialusi ia ma, “Kehe ma ho saonnari Daniel, harana angkon bunihonon do angka hata on jana rahasiahonon do i lopus tu hatiha na parpudi.

DANIEL 8:17

Jadi ro ma ia tu inganan hajongjonganki, jana dompak ro ia tarsonggot ma au jana manungkap, dung i didok ia ma tu au, “Antusi ma, o anak ni jolma taringot tu ari parpudi do parnidaan on!”

HABAKUK 3:14

Mangkatombuk dibaen angka siorMu na mamimpin parangan ni musu, di na ro paranganna i songon gogo ni halingsungsung, anso masarsar nian hami dibaen. Martata ma halahi marsonang-sonang laho mamparkanciti halak na marhahurangan.

ZAKARIA 9:14

Pataridahonon ni Tuhan ma diriNa tu bangsoNa, songon hipas ni hilap ditembakkon angka anak ni siorNa. Ombuson ni Tuhan Debata ma sarune lalu mardalan maju di bagasan angin na gogo na sian Selatan.

HALUMBAAN 16:12

Dung i diduruskon surusuruan na paonomkon i ma isi ni sambongnia i tu Batang aek Efrat na godang i. Gabe mahiang ma batang aek i, lopus tardalani angka raja na sian Habincaran.

HALUMBAAN 9:16

Dipaboa do tu au, anggo bahat ni angka parangan na markudo i adong do dua ratus juta bahatna.