DANIEL 10:16 - BIBEL JAMITA NA DENGGAN

¹⁶ Tapi adong ma na songon jolma tompana manjama pamanganku; dung i hubuka ma pamanganku jana mulai ma au mangkobari; hudok ma tusia na tongon jongjong di jolongki, “Tuan, hara ni parnidaan i gabe markancit do au, jana nada adong be gogongku.

DANIEL 10:16 ပူးပေါင်းရင်းမြစ်များ

HARURUAR 4:10

Ninna si Musa ma, “Iale Tuhan, nada malo au manghobari, bope saonnari, sian dung mangkatai Tuhan dohot au, dokdok do dilangku, lambat do au mangkatai nada gartip.”

HARURUAR 4:13

Tapi dialusi si Musa ma, “Pangidoanku, ulang ma au suruhon Tuhan, tapi suru ma halak na asing.”

PARJAMITA 1:18

Harana, mur bahat maruli habisuhon, mur martamba do arsak ni roha. Jana na manambai parbinotoan, mur manambai angka hasusaan do.

JESAYA 6:7

Didaiskon Ia ma banggar i tu bibirku jana didok Ia ma, “Madung dais tu banggar on bibirmu. Saonnari madung nisesa sude hasalaanmu dohot dosamu pe madung diampuni Tuhan.”

JEREMIA 1:9

Dung i disurduhon Tuhan ma tanganNia jana dijama Ia ma pamanganku lalu didok Ia, “Satutuna, madung Hubaen hatangKu tu bagasan pamanganmu.

JEHESKIEL 1:26

Di ginjang ni na songon langit i adong muse do sada tarsongon habangsa sian batu intan nilam, jana di ginjangna i juguk ma na songon jolma idaon.

JEHESKIEL 3:27

Sanoli on, muda manghobari Au mangulahi tu ho jana Hupasuang hamaloonmu manghobari, angkon palaluonmu do sanga aha na giot dokkononKu, Au Tuhan Debata giot mandok tu halahi. Tangihonon ni halahi do deba, tapi deba nari halahi nada manangihon, harana bia baenon bangso pangalo ma antong.”

JEHESKIEL 33:22

Di borngin parpudi painte so haroronia i, madung songgop tu au tangan ni Tuhan. Jadi di na ro bayo i tu au, madung tarbaen au manghobari jana nada ngungu be au.

DANIEL 12:8

Tutu do antong sude na nidoknia i, tapi nada tarastui au. Jadi husapai ma, “Tuan, bia do ujung ni on sudena?”

DANIEL 4:19

Umbege i, tarsonggot jana longang ma sangombas si Daniel na nigoaran muse si Beltsasar. Jadi au Raja Nebukadnesar, hudok ma tusia, “Beltsasar, ulang pola susa rohamu hara ni nipi i dohot astuanna.” Dialusi si Beltsasar ma, “Rajanami, denggan ma i sugari nian tu angka musu ni raja i ma masa angka na tarjadi na nipaboa ni nipi i jana ulang ma nian tu raja i.

DANIEL 7:15

Longang rohangku jana marsak hara ni angka parnidaan na huida i.

DANIEL 7:28

Olat ni i ma barita i. Ia au, si Daniel, susa sajo do au hara ni i; jana husimpan do i sude di bagasan rohangku.

DANIEL 8:15

Di na huuji laho mamikir astuan ni parnidaan i, manigor jongjong ma di jolongku tarsongon sada halaklahi.

DANIEL 8:17

Jadi ro ma ia tu inganan hajongjonganki, jana dompak ro ia tarsonggot ma au jana manungkap, dung i didok ia ma tu au, “Antusi ma, o anak ni jolma taringot tu ari parpudi do parnidaan on!”

DANIEL 8:18

Taran mangkatai ia, pingsan ma au. Tapi ditiop ia ma au jana ditogu ia jongjong mangulahi. Jadi didok ia ma,

DANIEL 8:27

Dung i gale ma hulala lalu marnyae ma au adong piga-piga ari. Dung i jongjong ma au jana hukarejohon angka karejongku di raja i. Tapi sai susa do rohangku mamikirkon angka parnidaan i jana nada tarastui au.

DANIEL 9:21

Taran na martangiang i au, habang ma adop au Gabriel na dung huida di bagasan parnidaanku na salpu i. Hatihana ma dompak i di halak manghaulkon haul potang ari.

LUKAS 1:64

Laing di hatiha i manigor malo ma si Zakaria mangulahi mangkatai jana dipuji-puji ia ma Debata.

LUKAS 21:15

Au sandiri do mangalehen angka hata sidokkononmu dohot habisuhon, lopus nada tarbaen sahalak pe sian angka musumunu i mangalo dohot mangalusi sanga aha na nidokmunu i.

JOHANNES 20:28

Dung i ninna si Tomas ma tu Jesus, “O Tuhanku! Debatangku!”

JOSUA 5:14

“Nada dongan, jana nada alo,” ning bayo i mangalusi. “Panglima ni tentara ni Tuhan do au dison.” Manungkap ma si Josua, marsomba jana didok ia ma, “Aha do na giot dohonon ni Tuanku di naposomon?”

HALUMBAAN 1:13

Di holang-kolang ni angka parlampuan i jongjong ma sada songon Anak Ni Jolma do idaon rupana. Mamake baju juba na ginjang do Ia lalu tu patNa i. Adong di andoraNa i sere dialitkon Ia.

HAKIM-HAKIM 13:8

Umbege i, martangiang ma si Manoah tu Tuhan, songon on, “Tuhan, sai ra ma Ho marsuru naposoMi tu hami laho paboahon sanga aha na angkon sibaenonnami salaho tu dakdanak i muda dung sorang ia.”

HAKIM-HAKIM 6:13

“Tola dehe au marsapa Tuan? ning si Gideon mangalusi. Muda tutu Tuhan mandongani hami, antong biasi didondoni angka pangalaho on hami? Di dia do sandok hahomangan na jungada dibaen Tuhan najolo i jana na nicaritohon ni angka ompu na umpompar hami sanga songon dia pangharuarkon ni Tuhan di halahi sian Mesir? Saonnari madung ditadingkon Tuhan hami jana dipadiar Ia hami dirajai angka halak Midian.”

HAKIM-HAKIM 6:15

Dialusi si Gideon ma, “Biasi au, Tuhan? Dia ma mungkin au paluahon bangso Israel sian kuaso ni halak Midian? Sian Marga Manase, horong na masuk tu au ma na gumale. Jana sian hami na sakoum pe au muse ma na soadana artina.”