BILANGAN 18:8 - BIBEL JAMITA NA DENGGAN

⁸ Didok Tuhan tu si Harun, “Ingot ma ho! Sude silehen-lehen na mardohonan na nilehen tu Au na so pola ditutung songon haul, i ma bagianmu. I ma bagianmu na dung ditontuhon ro di salolot-lolotna. Hulehen i di ho dohot di pomparanmu.

BILANGAN 18:8 ပူးပေါင်းရင်းမြစ်များ

2 RAJA-RAJA 12:16

Hepeng na sian haul gonti ni harugian dohot na sian haul hasesaan ni dosa nada dipamasuk tu poti-poti i, dipasahat tu angka malim do anggo i.

2 JUJUR TAON 31:4

Tamba ni i, disuru raja i dope halak na maringanan di Jerusalem maroban haul na ditontuhon di angka malim dohot halak Levi, anso bolas halahi pasadahon rohana tu pangoloion di Bagas Ni Debata songon na tarsurat di bagasan Tona Ni Tuhan.

2 JUJUR TAON 31:5

Dibaen ma boa-boa ni parenta i, jadi dioban halak Israel ma tu angka malim i silehen-lehen na sian suha ni tano ni halahi na parjolo: Jaung, anggur, miak zetun, aer ni loba dohot suha na asing-asing. Di halak Levi dioban halahi ma saparsampulu bagian sian sinadongan ni halahi.

HARURUAR 28:43

Angkon tongtong do marsaraor si Harun dohot angka dakdanaknia i muda masuk halahi tu bagasan Bandar ParmiananKu sanga donok tu langgatan laho maribadat songon malim di Inganan Na Badia. Jadi gabe nada hona bunu be halahi hara ni na tarida na niabitan ni halahi. Hot do aturan on tu si Harun dohot pomparannia.”

HARURUAR 29:21

Buat ma saotik mudar na di langgatan i dohot miak na badia saotik, lalu pispiskon ma i tu si Harun dohot tu pakeannia, songon i tu dakdanaknia dohot tu pakean ni halahi. Jadi songon i ma carana si Harun dohot dakdanaknia bope pakean ni halahi dihaulkon tu Au.

HARURUAR 29:28

HaputusanKu do on na so tola ubaon: Di na ro bangsongKu manghaulkon haul pardonganan, andora dohot hae-hae ni pahan-pahanan i, gabe bagian ni angka malim. I ma haul ni bangsongKu di Au, Tuhan.

HARURUAR 29:29

Pakean hapunjungan ni malim, angkon pateankonon ni si Harun do i tu angka anakna di na laho mate ia, anso tarpake na manggontisa di na mangangkatsa gabe malim.

HARURUAR 40:13

Papakehon ma pakean malim i tu si Harun, miahi ma ia jana marhite na songon i ma dihapunjungkon ho ia anso tarbaen ia mangoloi Au songon malim.

HARURUAR 40:15

Jana miahi ma halahi songon pamiahimu di amang ni halahi i, anso laing tarbaen muse ma halahi mangoloi Au songon malim. Markite-hite upacara na mamiahi i, gabe malim ma halahi salolot-lolotna.”

JESAYA 10:27

Di hatiha i ma paluaonKu hamu sian Asur, jana nada markuaso be halahi tu hamu.”

HAMALIMON 21:10

Malim Godang na dung tarpili do i di Debata mangkarejohon hamalimon. Di na mangangkat i dirasmihon do i marhite na mangusehon miak na badia tu ginjang uluna jana pamasuk pakean ni malim disia. Hara ni i nada tola padiaronnia obuknia nada nisuri sanga manyuakkon pakeannia laho paboahon marsaknia.

HAMALIMON 23:20

Roti dohot anak ni biri-biri na dua i dihaulkon malim ma i gabe silehen-lehen na mardohonan tu Tuhan, gabe malim i nampunasa. Na badia do angka na dihaulkon i.

HAMALIMON 6:16

Topung na lobi i baenon ma roti na so marragi, angkon panganon ni angka malim ma i di inganan na badia, i ma di alaman ni Bandar Parmianan Ni Tuhan. I do bagian ni angka malim na nilehen ni Tuhan di halahi sian haul sipanganon. Sipanganon na badia situtu do i, dos dohot haul hasesaan ni dosa dohot haul tobus ni hasalaan.

HAMALIMON 6:18

Di sude hatiha di pudian ni ari, sude pomparan ni si Harun halaklahi, tola do mangankon roti i, i ma da bagian ni halahi na dung ditontuhon sian sipanganon na nipasahat tu Tuhan. Halak na asing na dais tu sipanganon na dung dihaulkon gabe badia hara hagogoan ni habadiaan ni haul i.

HAMALIMON 6:20

taringot tu na mangojakkon sada malim sian pomparan ni si Harun. Di ari pangojakkon ni malim i, angkon obanonnia ma topung gandum sakilo di Tuhan. (Dos bahatna songon haul gandum ari-ari.) Satonga ma i sihaulkononkon manyogot i, lobina i di andospotangna.

HAMALIMON 6:26

Malim na manghaulkon pahan-pahanan i pe angkon panganonna do sian i di sada inganan na badia, i ma di alaman ni Bandar Parmianan Ni Tuhan.

HAMALIMON 7:14

Sian sude rupa-rupaan ni roti i, sabagian angkon lehenon gabe somba-somba na mardohonan di Tuhan, jana i ma bagian ni malim na mambuat mudar ni binatang sihaulkonon i anso disiramkon tu langgatan.

HAMALIMON 7:28

Dilehen Tuhan dope angka aturan on

HAMALIMON 7:6

Sude halaklahi sian horong ni malim tola do mangankon juhut na nihaulkon i, tapi angkon di inganan na badia do panganonna, angke na sun badia do haul i.

HAMALIMON 8:30

Dibuat si Musa ma deba sian miak upacara dohot deba sian mudar na adong di ginjang langgatan i, dung i dipispiskon ia ma tu si Harun bope tu angka anakna i bope tu pakean ni halahi tu Tuhan.

BILANGAN 18:9

Sian angka silehen-lehen na lobi badia na so pola situtungon di langgatan, bagianmu ma i. Haul gandum, haul hasesaan ni dosa dohot haul gonti ni rugi. Barang aha pe na dihaulkon tu Au gabe haul na badia, i ma bagianmu dohot bagian ni angka anakmu.

BILANGAN 5:9

Jana ganop silehen-lehen na mardohonan na nilehen ni halak Israel tu Tuhan, gabe bagian ni malim na manjagit na nilehen i ma i.

1 KORINTUS 9:13

Tontu diboto hamu do, anggo halak na markarejo di Bagas Ni Debata, manjagit panganon do halahi sian Bagas Ni Debata. Dohot angka halak na mangurus inganan parkaulan ni haul, dijagit halahi do deba sian haul na nipasahat i disi.

PANGARATAION 12:11

Angkon tusi ma hamu kehe maroban sude na dung huparentahon: Haul situtungon dohot haul na asing, haul parsampuluan dohot haul na marhapunjungan na dung nijanjihonmunu tu Tuhan.

PANGARATAION 12:6

Angkon tu inganan i ma obanonmunu angka haul situtungon dohot angka haul na asing, haul parsampuluan maradu angka haul na asing, haul panggarar ni haulmu haul sian na nionjar ni rohamunu dohot lombu sanga biri-biri na parjolo sorang.

PANGARATAION 18:1

“Anggo Marga Levi na gabe hasahatan ni karejo mangoloi songon malim nada tola manjagit tano parbagian di Israel. Angkon sian angka haul dohot angka haul na asing na dilehen tu Tuhan do halahi mangolu.

PANGARATAION 26:13

dokkon hamu ma tu Tuhan, ‘Sian na saparsampulu pandapotan ni na hukarejohon na patut gabe nampuna ni Tuhan, saotik pe nada adong be tinggal di bagasku; madung hulehen sude di halak Levi, halak sileban dakdanak na so marama, dohot di angka na mabalu songon na diparentahon ni Tuhan tu au. Sada pe nada adong na hulanggar sian parenta ni Tuhan salaho tu parsampuluan i.

IBRANI 1:9

Hatigoran do giot ni rohaMu jana magigi do Ho di na sala; i ma dalanna umbaen na nipili ni Debata Ho, i ma DebataMu jana dipasonang rohaMu dohot hasangapan na sumurung sian angka donganMu.”

1 JOHANNES 2:20

Jadi madung dimiahi Na Badia i hamu, gabe sude ma hamu umbotosa.

1 JOHANNES 2:27

Harana di bagasan dirimunu tinggal do pamiahion na dung nijagitmunu sian Ia. Hara ni i nada porlu hamu ajaran ni halak na asing, tapi songon dia pamiahonNia mangajari hamu taringot tu sudena – jana sintong do pangajaranNia i; nada gabus – jana songon dia Ia mangajari hamu na jolo, songon i muse ma nian hamu maringanan di bagasan Ia.