BILANGAN 18:5 - BIBEL JAMITA NA DENGGAN

⁵ Hum ho do Harun dohot anakmu na angkon markarejo di Inganan Na Badia dohot di langgatan, anso ulang gabe marungut-ungut be Au tu bangso Israel.

BILANGAN 18:5 ပူးပေါင်းရင်းမြစ်များ

HARURUAR 27:21

Angkon pagaraon ni si Harun dohot dakdanaknia do lampu i. Di ruar ni tire panutup ni Poti Parjanjian i ma inganan ni lampu i. Di Bandar ParmiananKi, angkon torus do gara lampu sian potang ari lalu tu torang ari. Angkon dalankonon ni halak Israel dohot pomparanna do parenta on sapanjangna.”

BILANGAN 16:46

didok si Musa ma tu si Harun, “Buat ma inganan ni apimi, pamasuk tusi lima kamata banggar na gara sian langgatan jana baen saotik hamonyan tu banggar i. Sigop ma oban tu halak na bahat i jana baen upacara hasesaan ni dosa di halahi. Sigop ma! Madung mardalan muruk ni Tuhan, madung mamungka ro nyae na mangalangkoti.”

HAMALIMON 24:3

Ganop andospotang pagaraon ni si Harun ma lampu i jana padiaron do i gara lopus manyogot di Bandar Parmianan Ni Tuhan di balian ni tire donok tu Poti Parjanjian na di Bilik Na Sun Badia i. Paraturan on angkon patuluson tongtong lopus tu angka ari na ro.

1 TIMOTEUS 6:20

Sasude pos ni roha na nilehen di ho, denggan ma jagohon i sude Timoteus! Padao ma ho sian angka pangkataion na so marguna. Laing padao ma ho sian partangkangan taringot tu angka pangalaho na didok roha ni halak “Parbinotoan,” hape sian dalan na lilu.

1 TIMOTEUS 5:21

Gomos pangidoanku tu ho di adopan ni Debata, dohot Jesus Kristus bope angka surusuruan todoan, anso diihutkon ho angka na hudok on so pola mardongan biar ni roha maradopkon sanga ise pe jana nada mamihak-mihak.

1 TIMOTEUS 3:15

betak sai tarlambat au anso diboto ho hian sanga na bia sapatutna hita mangolu songon halak na sabagas dohot Debata, i ma parlagutan ni Debata na mangolu. Parlagutan i ma na songon tiang partunggul ni hasintongan ni Debata.

1 TIMOTEUS 1:18

Pos do rohangku pasahatkon karejo on tu ho, ale Timoteus anakku, hombar tu na nisurirangkon taringot tu ho, anso dipargogoi panurirangon i ho mangkarejohon pambaenan na denggan,

ZAKARIA 10:3

Didok Tuhan ma, “Goyak do rohangKu tu angka parmahan jana tu angka pamimpin hulanan ni hambeng. BaenonKu ma pamaloson, harana diparate-atehon Tuhan Na Markuaso i do angka biri-biriNa, i ma horong ni si Juda, jana baenonNa songon kudo porang na gogo na dung nihobasan tu parporangan.”

JEREMIA 23:15

Didok Tuhan Na Markuaso i ma, “Na giot lehenonKu ma tu halahi suan-suanan na paet sipanganonna dohot rasun siinumonna, angke patunda ni halahi ma umbaen na so dipasangap angka jolma na di luat on sudena Au.”

1 JUJUR TAON 24:5

Diundi do laho manontuhon karejo i, harana rap adong do na manjabat di Bagas Ni Debata dohot angka pamimpin ni ugamo sian pomparan ni si Eleasar bope sian pomparan ni si Itamar.

1 JUJUR TAON 9:33

Deba sian halak Levi i, gabe parende ma di Bagas Ni Debata. Angka kapala ripe do halahi na maringanan di piga-piga bagas di Bagas Ni Debata jana nada adong karejo ni halahi na asing, hara ni na mardinas arian na borngin.

1 JUJUR TAON 9:23

Mamungka sian i ma halahi dohot angka pomparan ni halahi hot gabe panjago di pintu horbangan di Bagas Ni Debata.

1 JUJUR TAON 9:19

Na markarejo manjago pintu laho masuk tu Bandar Ni Tuhan dibaen ma si Salum anak ni si Kore, pahompu ni si Ebiasap, rap dohot deba nari laing na sian horong ni si Korah. Najolo pe laing i do karejo ni ompu ni halahi dompak na markobas di parbandaran ni Tuhan halahi.

BILANGAN 8:19

songon silehen-lehen sian halak Israel. Jadi Hulehen ma halak Levi i tu si Harun dohot tu anakna, anso tarbaen halak Levi i markarejo gabe malim di halak Israel dohot di bagasan Bandar ParmiananKu. Dung i anso gabe halak Levi i ma mangido ampun sian Au hara ni bangso i, anso ulang hona parmaraan muda madonok tu halahi ro tu Inganan Na Badia i.”

BILANGAN 8:2

“Dokkon ma tu si Harun, muda giot dibaen ia lampu na pitu i tu inganan parlampuan i, angkon denggan ditutung ia anso torang sinondangna i tu jolo.”

HAMALIMON 10:6

Dung i didok si Musa ma tu si Harun dohot tu angka anakna na laing mangolu dope, i ma si Eleasar dohot si Itamar, “Ulang padiar hamu obukmunu nada nisuri, sanga manyuakkon pakeanmu songon na patidahon marsakmunu. Muda dibaen hamu songon i, angkon mate hamu, bope sude bangso Israel angkon muruhan ni Tuhan. Tapi sude halak Israel na asing i, tola do marsak manangisi sidua halak, na mate dibaen api ni Tuhan i.

BILANGAN 1:53

Tapi anggo halak Levi angkon donok tu Bandar ParmiananKu do bandar ni halahi. Angkon jagoon ni halahi anso ulang adong halak na donok, anso ulang gabe muruk Au gabe Huuhumi halak Israel.”

BILANGAN 18:4

Angkon markarejo halahi rap dohot ho mangkarejohon angka karejo ni halahi na mardomu tu panghobasion di Bandar ParmiananKu, tapi sanga ise na so dilehen hak tusi nada tola markarejo rap dohot ho.

JEHESKIEL 44:16

Hum halahi do na tola masuk tu BagasKu, mangoloi Au di langgatanKu dohot manguluhon upacara paribadatan di BagasKu.

BILANGAN 1:50

Dokkon ma anso halahi markarejo di Bandar ParmiananKu dohot pasingkop parkokasna. Karejo ni halahi, i ma: Mamorsan Bandar ParmiananKi dohot parkokasna lalu markarejo gabe malim jana marbandar humaliangna.

BILANGAN 4:18

“Anggo angka barang on na dung mardohonan do on di Au. Antong jagohon ma anso ulang donok angka halak Kehat i tusi. Angkon mate do halahi muda donok halahi tusi. Jadi, anso ulang tarjadi na songon i, masuk ma si Harun dohot angka anaknia tu Bandar Parmianan paboahon tu halak Kehat i sanga aha na giot obanonna.

1 JUJUR TAON 23:24

I ma pomparan ni si Levi na nisuratkon mangihutkon horong dohot ripe ni halahi be. Sanga ise halahi na marumur dua pulu taon tu ginjang, adong ma tugasna di Bagas Ni Debata.

1 JUJUR TAON 23:32

Dibaen tanggung jawab ni halahi mangurus Bandar Ni Tuhan dohot Bagas Ni Debata dohot mangurupi angka kahanggi ni halahi, i ma angka malim pomparan ni si Harun di na mandalankon ibadat di inganan i.

JEHESKIEL 44:15

Didok Tuhan Debata i ma, “Di na nitadingkon ni bangso Israel Au, anggo angka malim Levi na sian pomparan ni si Zadok hot do mangoloi Au di BagasKu. Hara ni i, angkon halahi noma saonnari mangoloi Au dohot na ro tu adopanKu laho manghaulkon tabo-tabo dohot mudar na sian angka haul i.