BILANGAN 16:9 - BIBEL JAMITA NA DENGGAN

⁹ Ninna rohamunu pangalaho na menek dehe na dung dipili Debata ni Israel hamu sian halak Israel na asing i, anso tarbaen hamu donok tuSia laho markarejo di Bandar ParmiananNia, jana markarejo di halak Israel laho mangoloi halahi?

BILANGAN 16:9 ပူးပေါင်းရင်းမြစ်များ

PAMUNGKAAN 30:15

Ning si Lea ma mangalusi, “Na so tuk dope lakna halaklahingki buatonmu? Hape mur giot buatonmu dope saonnari ubat na dapot ni anakki.” Ning si Rahel ma, “Anggo dilehen ho do ubat i na dapot ni anakmi di au, hupatola pe ho rap modom dohot si Jakob borngin on.”

2 SAMUEL 7:19

Lobi sian i dope tehe dipatupa Ho, ale Tuhan Na Gumincat; madung dipajojor Ho muse dope janji taringot tu pomparanku di hatiha na giot ro. Jana dipatidahon Ho do i tu au haru pe hum jolma sajo au ale Tuhan Na Gumincat!

2 JUJUR TAON 35:3

Laing dilehen si Josia ma parenta tu angka halak Levi na dung dihapunjungkon tu Tuhan, dohot na gabe guru-guru ni Israel. Didok ia ma, “Baen hamu ma Poti Parjanjian ni Tuhan na badia i di bagasan Bagas Ni Tuhan na nipajongjong ni Raja Salomo anak ni si Daud i. Ulang pola be paimbar-imbar hamunu i. Oloi hamu ma Tuhan Debatamunu i dohot halak Israel bangsoNa i.

NEHEMIA 12:44

Ditugaskon do di hatiha i sanga na piga halak mangawasi angka kamar simpanan inganan ni angka sumbangan tu Bagas Ni Tuhan, masuk ma disi haul parsampuluan dohot gandum maradu parbatu ni suan-suanan na parjolo malamun ganop taon. Angkon palaguton ni angka pangawas i do sumbangan-sumbangan i sian angka ladang na di humaliang ni angka kota. Dipasahat ma sumbangan i tu angka malim dohot angka halak Levi, hombar tu aturan ni Uhum. Diargahon halak Juda do angka malim i dohot halak Levi,

JESAYA 7:13

Dung i didok si Jesaya ma, “Antong anggo songon i, tangihon ma ale pomparan ni Raja Daud! Na so tuk dope he hum jolma lojaanmu, umbaen jabat lojaanmu dope Debatangku?

JEHESKIEL 34:18

Adong do sian tonga-tongamunu na so dabu rohana muda hum mangabiskon jampalan na jumeges, tapi dohot do muse mandegei ruput na so giot panganon ni halahi! Diinum halahi aek na lan, dung i dihorui halahi aek na so giot inumon ni halahi be!

JEHESKIEL 44:16

Hum halahi do na tola masuk tu BagasKu, mangoloi Au di langgatanKu dohot manguluhon upacara paribadatan di BagasKu.

BILANGAN 1:53

Tapi anggo halak Levi angkon donok tu Bandar ParmiananKu do bandar ni halahi. Angkon jagoon ni halahi anso ulang adong halak na donok, anso ulang gabe muruk Au gabe Huuhumi halak Israel.”

BILANGAN 16:13

Madung tuk ho maroban hami haruar sian Mesir na napu i laho mamunu hami di parhorsihan on. Saonnari ho muse dope markuaso tu hami?

BILANGAN 16:8

Ninna si Musa ma muse tu si Korah, “Tangihon, ale hamu halak Levi!

BILANGAN 3:6

“Suru ma marlagut Marga Levi, anso halahi gabe pangoloi di si Harun.

BILANGAN 3:9

Sada do karejo ni halak Levi, i ma gabe pangoloi di si Harun dohot di angka anaknia.

BAENON NI ANGKA RASUL 13:2

Jadi sanoli dompak marsomba halahi tu Tuhan jana puaso, ro ma Tondi Parbadia tu halahi mandok, “Paasing hamu ma si Barnabas dohot si Saulus di Au, anso markarejo halahi di parkarejoan na Hutontuhon tu halahi.”

1 KORINTUS 4:3

Anggo di au nada marimbar sanga na aha dipikiri hamu taringot tu au, bope pikiran ni halak na asing. Salangkan pikiranku taringot tu au sandiri, nada pola soal i huhilala.

PANGARATAION 10:8

Di dolok i dibaen Tuhan ma Marga Levi marhapunjungan mangurus Poti Parjanjian i dohot mangoloi Tuhan gabe angka malim dohot mandok hata pasupasu mangasahon goarNia. I ma karejo ni halahi lopus saonnari.

1 SAMUEL 18:23

Tapi di na palaluhon hata i halahi tu si Daud, dialusi ia ma, “Na mura-mura do lakna diambang hamu gabe babere ni raja? Halak na pogos do au boti na so masuk kira!”