BILANGAN 15:4 - BIBEL JAMITA NA DENGGAN

^4-5 Sanga ise na manghaulkon biri-biri sanga hambeng gabe haul situtungon di Tuhan, angkon obanonna muse ganop rap dohot pahan-pahanan i sakilogram topung na dicampur dohot saliter miak zetun gabe haul gandum, dung i muse saliter anggur.

BILANGAN 15:4 ပူးပေါင်းရင်းမြစ်များ

ESRA 7:17

Pake ma hepeng i sadenggan-dengganna laho manobusi lombu jantan, angka biri-biri jantan, anak ni biri-biri, gandum dohot anggur. Haulkon ma sudena i di ginjang ni langgatan ni Bagas Ni Tuhan na di Jerusalem.

HARURUAR 29:40

Rap dohot biri-biri na parjolo i angkon nihaulkon ma sakilo topung tarigu na dumenggan nicampur dohot miak zetun na polin saliter. Laing haulkon muse ma saliter anggur.

JESAYA 66:20

Sian angka luat i obanon ni halahi ma mulak angka kahanggimu sabangso songon silua di Au. Obanon ni halahi ma angka jolma i tu dolokKu na Badia di Jerusalem mangalombut kudo, halode dohot unto, dohot na markareta maradu dohot na marpadati; songon na somal halak Israel maroban tu Bagas Ni Tuhan haul gandum di bagasan inganananna na ias.

JEHESKIEL 46:14

Tamba ni i, ganop manyogot angkon laing haulkonon muse do dua kilo gandum dohot saliter miak zetun sicampurkonon dohot gandum i. I ma haul gandum sihaulkonon ganop ari di Tuhan; sapanjangna do dalankonon aturan i.

HAMALIMON 1:13

Dung i basuon ni halahi ma butuha dohot pat pudi ni pahan-pahanan i, jadi sombahonon ni malim i ma haul i tu Tuhan, lalu ditutung sude di ginjang ni langgatan. Uap ni haul sipanganon i ma pajop roha ni Tuhan.

HAMALIMON 14:10

Di ari pasalapankon angkon obanon ni halahi ma dua anak ni biri-biri jantan, sada anak ni biri-biri boru-boru marumur sataon na so martihas, tolu kilogram topung na dung marcampur dohot miak zetun dohot sapartolu liter miak zetun.

HAMALIMON 2:1

Muda adong sada halak na giot manghaulkon gandum tu Tuhan i, angkon jolo nigiling do gandum i lamot gabe topung. Dung i diusehon ma tu topung i miak zetun jana di ginjangna nipayakkon hamonyan,

HAMALIMON 2:15

Angkon niusehon do miak zetun tu gandum i jana nibaen hamonyan di ginjangna.

HAMALIMON 23:13

Rap dohot i angkon lehenonmunu dope haul sipanganon dua kilo gram topung dicampur dohot miak zetun. Uap ni haul i ma na pajop roha ni Tuhan. Lehen hamu muse ma rap dohot i anggur saliter bahatna.

HAMALIMON 3:7

Muda disombahon sada halak sada biri-biri, angkon boanonnia do i tu jolo ni Tuhan.

HAMALIMON 6:14

Songon on ma angka aturan taringot tu haul gandum di Tuhan. Sahalak malim sian pomparan ni si Harun angkon maroban tu jolo ni langgatan.

MALEAKI 1:11

Dipasangap angka bangso na di tano on do Au sudena. Sanga na di dia ditutung halahi do dupa laho pasangapkon Au jana dihaulkon halahi do angka haul na patut tu Au. Olo! sude do halahi pasangapkon Au!”

BILANGAN 28:12

Na gabe haul gandum angkon dilehen topung na dicampur dohot miak zetun; ganop sada lombu jantan tolu kilogram topung, dua kilogram topung tu biri-biri jantan,

BILANGAN 28:4

Anak ni biri-biri na parjolo angkon dihaulkon manyogot jana na paduahon di potang ari.

BILANGAN 29:6

Angka haul on ma na gabe tamba-tamba tu haul situtungon na dilehen rap dohot haul gandumna, di tanggal sada ganop bulan. Laing gabe tamba-tamba do i tu haul situtungon siganop ari na dilehen rap dohot haul gandum dohot haul aek ni anggurna. Uap ni angka haul sipanganon i pajopkon roha ni Tuhan.”

SURAT NI SI PAULUS TU PARLAGUTAN ROM 15:16

Madung dibaen Ia do au gabe pangoloi ni Kristus Jesus, suruanNia mandapotkon angka bangso na asing. Jana hubaen do au gabe songon malim, manjamitahon Jamita Na Denggan na sian Debata anso gabe haul na tumbuk tu roha ni Debata angka halak na asing i. Sai gabe haul hapunjungan ma di Debata halahi baenon ni Tondi Parbadia.

IBRANI 13:16

Ulang lupa hamu mambaen na denggan bope na marsiurup-urupan, angke na songon on do haul na pasonangkon roha ni Debata.

HAKIM-HAKIM 9:9

Dialusi bona ni zetun ma, ‘Ah, nada ra au. Harana muda au gabe rajamunu, angkon mantak ma au mangharuarkon miak zetun na dipake laho pasangapkon Debata dohot jolma.’