ANDUNG 1:11 - BIBEL JAMITA NA DENGGAN

¹¹ Humolos humasusa halak kota i manjalahi bohalna; marsambar roti noma artana anso ulang jabat tos hosana. Tangis Jerusalem, “Ale Tuhan, ingot ma au, parrohahon ma sude pardangolanku.”

ANDUNG 1:11 ပူးပေါင်းရင်းမြစ်များ

2 RAJA-RAJA 6:25

jadi gabe masa ma haleon potir di bagasan kota i, jabat mararga sada ulu ni halode salapan pulu hepeng perak jana dua ons kotoran ni darapati mararga lima hepeng perak.

MASMUR 79:4

Gabe siincahan ni angka bangso na hombar hami, dipartatai jana diincahi halahi do hami.

JEREMIA 15:19

Dialusi Tuhan ma, “Muda mulak ho, jagitonKu do ho mangulahi. Jana gabe naposongKu ho muse. Muda dibaritahon ho angka pangalaho na marguna jana nada hum hata-hata sajo, jadi gabe naposongKu ma ho mangulahi. Marroan ma angka jolma tu ho mangulahi.

JEREMIA 19:9

Hobuhon ni musu ma kota on jana manggogo ma halahi mamunu halakna. Hara ni jebuna panghobukna i jabat marsipanganan angka jolma na di bagasan kota i, salang angka dakdanakna sandiri pe tehe panganonna.”

JEREMIA 38:9

“Ale Rajanami na marmulia, nada denggan pambaenan ni angka jolma i. Dipamasuk halahi do Panurirang Jeremia tu bagasan sumur; musti gabe mate so mangan ia disi, harana madung abis sipanganon di kota on.”

JEREMIA 52:6

Di tanggal sambilan bulan opat laing di bagasan taon i, dompak hajebuanna haleon potir lopus nada adong be sipanganon bagi aha di rayat i.

ANDUNG 1:8

Dipahodar Jerusalem do dirina sandiri dohot dosa na nibaenna i mambaen gigi. Saonnari talak-talak ia jana marlayas; ma pola mago sude hagodanganna. Humolos ia, hara ni na dung maluak bohina.

ANDUNG 1:9

Torang do tarida hahodaranna tapi nada diampirkon ia bagiannia. Santak ma da parsegona, hape sahalak pe nada adong mangapoisa. Mangido ibo ni roha ia sian Tuhan, hara ni angka musuna na dung monang.

ANDUNG 2:11

Marbosoli matangku hara ni na so mantak tangis, marhancit tondingku songon na dihoris. Loja au holosan paida-ida haruruncur ni bangso i, na baru sorang dohot dakdanak marompasan di dalan ni kota i.

ANDUNG 2:12

Martangisan halahi mangido panganon tu inangna. Songon halak na margasa halahi, tinggang noma lalu mate di ampuan ni inangna.

ANDUNG 2:20

Ligi ma ale Tuhan, pareso ma angka na niparkancitanMi! Dipangan ina do anak haholongan ni rohana, malim dohot panurirang hona bunu di Bagas Ni Debata.

ANDUNG 5:1

Ingot ma, ale Tuhan, sude na tarjadi tu hami. Tatap ma hami jana ligi ma habileannami.