AMOS 5:6 - BIBEL JAMITA NA DENGGAN

⁶ Mulak ma hamu tu Tuhan, gabe mangolu ma hamu. Muda nada mulak hamu tuSia, ro ma Ia songon api na manutung lopus abis halak Israel. Panganon ni api i ma sudena halak na maringanan di Betel, jana nada adong sanga ise pe na tarbaen mangintopisa.

AMOS 5:6 ပူးပေါင်းရင်းမြစ်များ

2 SAMUEL 19:20

Madung torang di rohangku, na dung mardosa do au hape, jana hara ni i, sian tonga-tonga ni angka marga na maringanan di Utara au dope na parjolo situtu ro mangalo-alo raja i di ari sadari on.”

1 RAJA-RAJA 11:28

dohot do si Jerobeam markarejo disi. Di na niida ni si Salomo na lingkas bope na ringgas do si Jerobeam, dilehen ma disia tanggung jawab laho manjago karejo paksa na di luat ni Marga Manase dohot Efraim.

2 JUJUR TAON 34:25

Ditadingkon halahi do Au jana kehe halahi marsomba tu angka debata na asing. Pasunggul-sunggul muruk do Au tu Jerusalem, jana nada ra mombun murukKi.

MASMUR 27:8

Ho mandok, “Ro marsomba tu Au.” Hualusi do, “Ale Tuhan, manigor ro pe au.”

MASMUR 69:33

Dibaen ditangihon Tuhan antong halak na lebak, nada dihalupahon Ia bangsoNia na di hurungan.

HARURUAR 22:6

Sanga ise na marapi di ladangnia sandiri, hape rarat api i sian ri i lalu tu ladang ni halak na asing gabe gor sude eme na tubu disi sanga eme na baru disabi, angkon gararan ni na mambaen api i do dangdangna.

JESAYA 1:31

Songon durame na puntung dibaen gurasa ni api, songon i muse ma angka halak na markuaso luntahon ni angka pambaenan ni halahi sandiri, jana nada adong na tarbaen mangantak haroroncona i.

JESAYA 55:3

Tangihon ma ale bangsongKu, ro ma hamu tu Au, tangihon ma, anso mangolu hamu. Hara ni holong ni rohangKu na togu tu si Daud, naposongKi, Hupudun janji na hot dohot hamu.

JESAYA 55:6

Jalahi ma Tuhan dompak tarbaen dope dapot, pio hamu ma Ia salolot laing donok dope Ia.

JEREMIA 38:20

“Nada,” ningku mangalusi, “Nada pasahatonna raja i tu halahi. Gomos ma pangidoanku anso dioloi raja i ma nian tona ni Tuhan on; sidung do sudena i muse, jana nada hona bunu be raja i.

JEREMIA 4:4

Tiop ma janjimu dohot Au Tuhanmu, jana hapunjungkon ma dirimu di Au, ale halak Juda dohot Jerusalem. Muda nada, gilap ma murukKu jana manutungi songon api na so haintopan sanga na ise pe, hara ni sude angka parbuatanmunu na jahat i.”

JEREMIA 7:20

Au Tuhan Debata, padondonkononKu ma murukKu na jorbut i tu bagas paribadatan on, tu jolma dohot tu binatang dohot tu suan-suanan dohot tu suha ni tano. Marjimbur-jimbur ma murukKu songon api na so haintopan.”

JEHESKIEL 21:3

Au Tuhan mandok songon on, ‘Musumu do Au. SintahonKu ma podangKu jana bunuonKu hamu sude, na jahat dohot na burju.

JEHESKIEL 33:11

Dokkon ma tu halahi, mangasahon Au na mangolu, Tuhan Debata nada jop rohangKu muda mate halak parjahat i; tapi sugari mulak ma nian ia manadingkon angka dosana anso tongtong ia mangolu. Ale bangso Israel, antak hamu ma mambaen na jahat! Biasi angkon sai mate hamu?”

JEHESKIEL 37:19

dokkon ma tu halahi na giot buatonKu, papan ni si Josep na ditangan ni si Efraim, Au Tuhan Debata giot mambuat tungkot na manggambarkon Israel i. Jana padomuonKu ma halahi gabe tungkot ni Juda gabe pasadaonKu ma halahi di tanganKu gabe sada papan.

AMOS 3:14

Di ari i di na manguhum Au tu halak Israel hara ni dosana, sarsarkononKu ma angka langgatan na adong di Betel. Ponggolkonon ma sude ujung ni angka langgatan i, anso dabu sude tu tano.

AMOS 5:14

Parayak hamu ma mambaen na denggan jana ulang ma mambaen na jahat, anso mangolu hamu. Gabe tutu situtu ma maringanan Tuhan, Debata Na Markuaso i di tonga-tongamunu songon na nidokmunu i.

AMOS 5:4

Didok Tuhan ma tu halak Israel, “Mulak ma hamu tu Au, anso gabe mangolu hamu.

AMOS 6:6

Minum anggur ma hamu sian bokor, jana dipake hamu ma miak na humuskus, hape nada adong arsak ni rohamunu mida hasesego ni Israel.

ZEPANYA 2:3

Jalahi ma Tuhan, ale hamu angka na toruk roha di luat on, na mangoloi parentaNia; jalahi ma hatigoran, jalahi ma toruk ni roha; betak na adong dope di hamu parlinggoman di hatiha hamumuruk ni Tuhan.

ZAKARIA 10:6

“PargogoanKu halak Juda, halak Israel Hupalua. ObanonKu halahi mulak tu tano ni halahi, angke holong do rohangKu mida halahi. BaenonKu ma halahi, songon bangso na so unjung Hugagai. Au ma da Tuhan Debata ni halahi, sandok tangiang ni halahi Huparrohahon mangulahi.

PANGARATAION 32:22

Mamulatak ma murukKu songon api na mangabiskon sasude na di portibi. Api na rarat lalu tu taruma ni tano i manutung dolok lalu tu angka uratna i.

PANGARATAION 4:24

dibaen songon api do Tuhan Debatamunu i na mamosokkon; nada ra Ia padiarkon adong imbangNia.

JOSUA 18:5

Dibagi pitu ma tano i baen di halahi. Anggo Juda torus ma i di Selatan, jana Josep di luat na di Utara.