AMOS 3:2 - BIBEL JAMITA NA DENGGAN

² “Sian sandok bangso na di tano on, hum sasada hamu sajo do bangso na Hutanda dohot na Huantoi. I ma mambaen godang dosamunu, jana angkon uhumanKu hamu.”

AMOS 3:2 ပူးပေါင်းရင်းမြစ်များ

PAMUNGKAAN 10:32

I ma angka pomparan ni si Noak mangihutkon partubuna be. Dung salpu aek na oto i, sude bangso na di tano on pomparan ni angka anak ni si Noak noma.

PAMUNGKAAN 18:19

Na Hupili do ia anso diparentahon ia tu angka dakdanaknia dohot tu pomparannia anso oloanna Au bope patulusonna sanga aha na denggan dohot na tigor. Muda mangoloi halahi, gohanKu ma janjingKu tu si Abraham.”

MASMUR 147:19

Dipabolkas Ia tonaNia tu bangsoNia, hatontuan dohot angka parenta tu bangso na nipiliNia.

HARURUAR 32:34

Tapi anggo ho kehe ma saonnari manogu-nogu bangso i tu inganan na dung Hupaboa tu ho; mardalan do surusuruanKu di jolomu; tapi di ari pamalosonKi baloskononKu ma tu bangso i dosa ni halahi i.”

JESAYA 63:19

Songon dia ma na so bangsoMu be hami songon na so mamarenta be Ho tu hami.

JEREMIA 1:15

Angke satutuna pioonKu ma sude angka bangso na di Utara anso ro halahi, ninna Tuhan, marroan ma halahi jana marsipajongjong tuku harajaanna be, di harbangan ni Jerusalem, halianganna ma tembok na i jana donok tu angka kota ni Juda.

JEREMIA 10:25

Tu angka na manghudukkon Ho ma, palalu parpiar ni murukMu dohot tu na so marsomba tu joloMu. Angke madung diabisi halahi sude pomparan ni si Jakob jana na mangaroncohon tano ni halahi.

JEREMIA 11:22

Jadi hara ni i, didok Tuhan Na Markuaso i ma, “UhumanKu ma halahi! Marmatean di parporangan ma angka doli-doli ni halahi; angka dakdanak ni halahi mate tangkuraparon.

JEREMIA 13:21

Giot aha ma he dokkononmu anggo angka jolma na nietong ni rohamunu angka donganmunu, hape manaluhon dohot mangarajai hamu? Musti hancitan hamu songon dadaboru na giot manubuhon dakdanak.

JEREMIA 14:10

Salaho tu bangso i didok Tuhan, “Nada jop rohangKu paida-ida angka jolma i na sai manadingkon Au, jana na so ra mangarajai dirina. Nada ra be Au manghalupahon hasalaan ni halahi, uhumanKu do halahi hara ni dosa ni halahi.”

JEREMIA 9:25

Didok Tuhan ma, “Dapot do i hatihana, uhumanKu halak Mesir, Juda, Edom, Amon, Moab dohot halak na mangingani padang halongonan na manggusting pendek obukna. Na dung marsunat do sude angka jolma i, hape halahi sandiri bope halak Israel nada maniop parjanjianKu na nigambarkon ni sunat i.”

JEHESKIEL 5:9

Hara ni sude pangalaho na jat i, angkon Hubaen tu hamu angka na so jungada Hubaen, jana nada be baenonKu songon i.

JEHESKIEL 9:6

Bunu hamu ma sude halaklahi dohot dadaboru, na matobang dohot na poso, na marsaripe dohot dakdanak. Tapi ulang hahua hamu anggo na mamake tanda di bohina. Jadi pungka hamu ma sian on, sian inganan na badiangKu.” Jadi dipungka halahi ma karejo i, dibunu halahi ma angka pamimpin ni Israel na topet marjongjongan di Bagas Na Badia i.

DANIEL 9:12

Tigor do pambaenanMu laing songon na nijanjihonMu tu hami dohot tu angka na markuaso di hami. Umposi do uhumMu tu Jerusalem martimbangkon angka kota na adong di tano on.

HOSEA 2:13

UhumanKu ma ia hara ni angka ari-ari na nipakenia manutung dupa tu Baal, jana mangias, mamake barang parhiasannia jana mangkojar angka haholongannia. Dihalupahon ia situtu do Au anggo di angka ari i. Au do Tuhan na mandok songon i.

HOSEA 5:3

Hutanda do ho, Efraim jana Huboto do sudena taringot tu ho, angke madung markarosuan ho, ale Israel; jana madung dipahodar ho dirimu.”

HOSEA 8:13

Dihaulkon halahi do haul tu Au, jana dipangan halahi haul i, hape Au Tuhan nada manghajopkon angka haul i. Saonnari ingotonKu ma dosa ni halahi i jana uhumanKu noma halahi hara ni angka dosa i; tongosonKu ma halahi mangulahi tu Mesir!

HOSEA 9:9

Na lobi do jahatmunu songon na dung unjung dibaen halak Gibea. Ingoton ni Debata do hasalaanmunu jana uhumanNa hamu hara ni dosamunu i.

AMOS 2:4

Songon on ma didok Tuhan, “Hara ni na dung mardosa halak Juda marhite tolu hajahatan lopus tu opat hajahatan, nada tarikonKu be haputusanKi. Dilaosi halahi do angka parenta ni Tuhan, jana nada dimomosi halahi haputusanNia. Lilu do halahi dibaen angka debata na nisomba ni angka ompu ni halahi.

AMOS 3:3

Tarbaen he ma rap kehe dua halak anggo so jolo martahi?

AMOS 6:1

Marjaya ma hamu na sonang mangolu di Sion, dohot hamu na aman pangkilalaanna di Samaria – hamu angka panangian ni masarakat ni bangso Israel na godang on, hamu angka na somal ditopot-topot rayat.

MIKA 2:3

Hara ni i didok Tuhan ma, “Marsangkap do Au laho parohon parmaraan godang tu hamu, anso ulang adong na malua sian hamu. Nada tarbaen be gakgak pardalanmu angke anggo hatiha i, i ma hatiha na marmara.

NAHUM 3:4

Sudena, i hara ni bahatna parkarosuanon ni dadaboru panggampang, na jogi rupana jana tukang sihir, na patundukkon angka bangso marhite parmainanna dohot angka marga marhite sihirna.

BAENON NI ANGKA RASUL 17:26

Sian sada jolma dibaen Ia ma sude bangso jana disuru Ia halahi mangingani tano on sudena. Laing marguru diSia do sian mulana laho manontuhon sanga andigan hatihana jana olat ni dia batasna halahi tola mangolu.

SURAT NI SI PAULUS TU PARLAGUTAN ROM 2:9

Ganop halak na sai mambaen na jahat, markancit ma disi jana mangae; tarlobi-lobi tu halak Jahudi, songon i muse halak Junani.

1 KORINTUS 8:3

Tapi sanga ise na marsitutu mangkaholongi Debata, ditanda Debata do ia.

PANGARATAION 10:15

Songon i ma godang ni holong ni roha ni Tuhan mida ompumunu, gabe hamu ma na nipiliNia jana nada bangso na asing jana lopus tu saonnari pe laing hamu do na tarpili gabe bangsoNia.

PANGARATAION 26:18

Madung dijagit Tuhan hamu sadari on gabe bangsoNia sandiri, songon na nijanjihonNa i tu hamu, jana diparentahon Ia tu hamu anso oloanmunu sandok aturanNia i.

PANGARATAION 32:9

Hape anggo pompar ni si Jakob on dipili Tuhan diSia sandiri antong.

PANGARATAION 4:32

Tangkasi hamu ma hatiha na dung salpu, dao taran so sorang dope hamu, mamungka sian ari di na nitompa ni Debata jolma di tano on. Jalahi hamu ma di sandok portibi on. Unjung dehe tarjadi pangalaho na songon on godangna di jolo ni on? Adong dehe halak na jungada umbege taringot tu na masa sisongon on?

PANGARATAION 7:6

Baen hamu ma sudena i, dibaen bangso na badia di Tuhan Debatamu do hamu. Sian sasude bangso na di sisik ni tano on, hamu do na nipiliNia na gabe bangso hapunjunganNia.

1 PETRUS 4:17

Madung dapot hatihana, Debata manguhumi portibi on. Jana halak ni Debata sandiri do parjolo niuhuman. Antong, muda sian hita ma pungkaon ni Debata, tarbia muse noma ulaning na masa tu angka halak na so mangkaporsayai Jamita Na Denggan na sian Debata?