AMOS 1:14 - BIBEL JAMITA NA DENGGAN

¹⁴ Hara ni i, tongosonKu ma api tu angka tembok ni kota Raba, jana surbuonKu lopus abis angka bentengna i. Tarbege ma disi hagaoron ni sora ni porang, jana mur jebu ma porang i songon pangalingkup ni ombak.

AMOS 1:14 ပူးပေါင်းရင်းမြစ်များ

2 SAMUEL 11:1

Somalna sai di musim bunga do angka raja kehe marporang. Jadi dung salpu taon baru di taon i disuru si Daud ma si Joab kehe mamorangi rap dohot angka donganna parpangkat dohot sude tentara ni Israel i; dung i ditaluhon halahi ma halak Amon jana dihobuk halahi ma kota Raba. Tapi anggo si Daud, tinggal do di Jerusalem.

2 SAMUEL 12:26

Marporang dope di hatiha i anggo si Joab mangalo Raba kota sabungan ni Luat Amon jana dirampas ia ma kota hundulan ni harajaan i.

2 SAMUEL 12:31

Tamba ni i dioban muse dope halak kota i jana disuru maroban gargaji, pangkur bosi, dohot kapak bosi jana dibaen ma halahi markarejo di inganan partukangan ni batu bata. Laing songon i ma dibaen ia tu angka kota ni halak Amon na asing. Dung salpu i, mulak ma si Daud dohot sude tentarania i tu Jerusalem.

1 JUJUR TAON 20:1

Di pamungkaan ni musim logo na mangihut, disi ma hasomalan ni angka raja-raja kehe marporang, dioban si Joab ma tentarania ruar jana ditaluhon halahi ma Luat Amon. Nada dohot anggo Raja Daud hatiha i, tading do ia di Jerusalem. Dihuliangi si Joab dohot tentarania i ma kota Raba, diserang ia ma lalu diabiskon ia.

JOB 39:25

Marngiho-ngiho ma ia ganop tarbege sora ni sarune taranggo uap ma dihilala ia porang sian na dao dope; dibege ia ma panggora ni angka perwira di na mangalehen angka tanda.

MASMUR 83:15

Ayak-ayak ma halahi dohot haba-habaMi, songgoti ma halahi dohot alogoMi.

JESAYA 29:6

paluaon ni Tuhan Na Markuaso i kota i marhite bade dohot lalo na gogo. ParoonNia halingsungsung dohot api na marjembur-jembur.

JESAYA 30:30

Patubegehonon ni Tuhan ma soraNia na tongam i jana ganop halak hilalaonna ma hamuruhonNia na sogen i. ParoonNia ma api na mangabiskon, udan potir, ambolas dohot bade.

JESAYA 9:5

Sipatu ni tentara na mangolat dohot bajuna na margulu mudar, gabe bagian ni api lopus puntung sasudena.

JEREMIA 23:19

Ligima, alogo na gogo ni Tuhan, i ma haririmas ni muruk, na mangalapat jana na mijur tu ulu ni halak parjahat.

JEREMIA 49:2

Tapi dapot do i hatihana baenonKu halak na mangingani Raba, kota sabungan ni Luat Amon i, umbege surak-surak ni parporangan. Gabe tading sego-segona noma kota i jana angka huta pagaran na humaliang i pe abis masurbu. Dung i buaton ni halak Israel ma mangulahi tanona i sian angka jolma na mangarampassa na salpu i.

JEHESKIEL 21:20

Gambar ma sian dalan dia haroro ni podang i mangalo Raba kota ni Amon, jana mangalo Juda, na marbenteng di Jerusalem.

JEHESKIEL 21:22

Madabu tu tangan siamunna anak ni pana na manudu Jerusalem! Na nidokna disi, angkon hobuhon ni raja i ma kota Jerusalem. Dung i disurakkon ia ma surak-surak parporangan anso dihobasi angka tentarania i angka parkokas sipakeon laho mangonjar, dipasang ma i di angka pintu ni horbangan ni Jerusalem, manimbun tano mambaen tembok pangkobuhan dohot manghuar angka bondar.

JEHESKIEL 21:25

Jana tu raja ni Israel hudok do, “Ale raja na jahat jana na hodar! Madung donok hatihana di ho manjagit uhuman na parpudi.

JEHESKIEL 25:5

PaubaonKu ma kota Raba gabe parmahanan ni unto, jana tano Amon sudena Hubaen gabe inganan parmahanan ni biri-biri. Jadi gabe botoonmunu ma Au do Tuhan.’ ”

JEHESKIEL 25:7

Jadi hara ni i, pasahatonKu ma hamu tu bahat bangso na giot manyamun dohot mangarampasi sude sinadonganmunu. Jorbut baenonKu mangabisi hamu, lopus nada be sada bangso hamu jana nada be adong tanomunu sandiri. Jadi gabe botoonmunu ma Au do Tuhan.”

DANIEL 11:40

Muda marayak marujung ma kuaso ni raja Siria i, ro ma raja ni Mesir mamorangi ia. Jadi baloson ni raja ni Siria ma parangan i lopus marujung. Padohotonnia ma bahat kareta porang, kudo, dohot kapal. Mangaroro ma ia songon aek magodang jana solatonna bahat luat.

AMOS 2:2

Hara ni i tongosonKu ma api tu tano Moab jana surbuonna sude angka benteng ni Keriot lopus abis. Marmatean ma halak Moab di tonga-tonga ni hagaoron ni porang, di na mangkuling sarune jana taran disurakkon tanda ni parporangan.

ZAKARIA 7:14

Songon halingsungsung, Huombuskon halahi tu tonga-tonga ni angka bangso na so nitanda ni halahi. Dung i mamolngit ma tano i, nada adong be na manginganisa. Songon i ma tano na jeges i gabe mamolngit dibaen halahi.”

PANGARATAION 3:11

Hum Raja Og noma, na mangolu sian halak Refaim. Sian batu do dibaen poti ni bangkena, opat meter ginjangna, jana bidangna mardonok dua meter mamake suhat-suhat na somal. Lopus saonnari tarida dope i di Raba, kota ni halak Amon.)