2 TIMOTEUS 4:8 - BIBEL JAMITA NA DENGGAN

⁸ Jana saonnari upa ni hamonangan i noma sipainteonku. Di Ari Parpudi, pasahaton ni Tuhan Panguhum na tigor i ma upa i tu au, angke di bagasan pardomuan na denggan do au mangolu dohot Debata. Jana nada hum au sajo na giot manjagit upa i, tapi dohot do sudena halak na sai malungun paintehon haroro ni Tuhan i.

2 TIMOTEUS 4:8 ပူးပေါင်းရင်းမြစ်များ

PAMUNGKAAN 18:25

Pasti do na so ra Ho mamunu angka halak na so marsala i rap dohot na marsala. Inda masuk di akal! Inda mungkin ra Ho mambaen songon i. Sugari sura dibaen Ho songon i, gabe sarupama angka halak na so marsala dohot na marsala. Hape nian matua na tigor do anggo Panguhum ni sandok na adong.”

MASMUR 31:19

Na lobi do antong hadenggananMu na nipasingkopMu di halak na mabiar tu Ho! Diboto halak do sude sanga aha na nibaenMu, tu halak na marsilaung tu Ho.

MASMUR 7:11

Panguhum na tigor do Debata, sai hona uhumNia do halak na jahat.

PODA 4:9

Lehenonnia ma di ho bunga na niatak jeges jana dibasabasahon tu ho tuku na jogi.

MALEAKI 3:17

Didok Tuhan Na Markuaso i ma, “Jadi gabe bangsongKu ma halahi. Di ari na Hutontuhon i, gabe hasudungan ni rohangKu ma halahi jana Au nampunasa. Ibo ma rohangKu mida halahi, songon panghasiani ni ama-ama tu anakna na marpangoloion tuSia.

MATEUS 24:36

“Umpe sahalak umboto sanga andigan do arina dohot jomna. Angka surusuruan na di banua ginjang i pe nada diboto halahi i. Anak i sandiri pe nada diboto Ia. Hum Damang sajo do na umboto i.

MATEUS 7:22

Di ari parpudi bahat ma halak na mandok tu Au, ‘Tuhan, Tuhan, nada he mangasahon goarMu do hami manyurirangi? Nada he laing mangasahon goar ni Tuhan i do hami paorot angka setan, jana hami baen angka tanda hahomangan?’

LUKAS 10:12

Hudok ma di hamu: Umnayang do uhum na tu halak Sodom di ari parpudi, ulang pado kota na songon i!”

SURAT NI SI PAULUS TU PARLAGUTAN ROM 2:5

Tapi hara ni jogal ni rohamu na so ra muba, ditamba ho do rimas tu dirimu sandiri di ari haririmas dohot hapataran ni uhuman ni Debata na tigor i.

SURAT NI SI PAULUS TU PARLAGUTAN ROM 8:23

Tapi nada hum i sajo, dohot do hita manjagit patumonaan ni Tondi i, humolos muse do hita di bagasan rohanta huhut painte-intehon hadakdanahan i, i ma haluaan ni pamatangta.

1 KORINTUS 2:9

Tapi songon na nidok ni surat di Buku Na Badia i do, “Anggo di angka halak na manghaholongi Debata, madung dipasingkop Debata hian angka na so unjung diida mata, sanga dibege jolma, jana na so jungada muse dope tubu di bagasan roha ni jolma.”

1 KORINTUS 3:13

Muda ro saulahon Kristus, disi pe anso tarida parkarejoan ni halahi be. Harana api paruhuman do pataridahon karejo ni ganop be. Api i ma na manguji jana manontuhon hadengganan ni karejo i.

1 KORINTUS 9:25

Tapi ganop halak na marsiadu, diorom ia do sudena i. Dibaen halahi pe songon i anso dapot halahi do tuku na so manongtong, tapi anggo hita anso dapotan tuku na manongtong i do.

2 KORINTUS 5:2

Holsoan do hita anggo di bagasan bandarta na saonnari on, hara ni lungun ni rohanta tu bagasta na sian banua ginjang i anso dipapakehon ma i tu hita.

PILIPPI 3:11

Jana arop do rohangku, nisunggulan ma au sian hamatean anso mangolu mangulahi.

KOLOSSE 1:5

Hara ni angka na niarop ni rohamunu tu na niparade ni Debata di hamu di banua ginjang i, gabe porsaya jana marholong ni roha do hamu. Madung dibege hamu taringot tusi di na nipasahat tu hamu hatatangkas ni barita taringot tu Jamita Na Denggan i na sian Debata.

1 TESSALONIKA 1:10

Laing di hatahon halahi do sanga na bia ngolngolna pangkilalaanmunu painte-intehon haroro ni Anak Ni Debata sian banua ginjang; i ma Jesus na dung dipangolu Debata sian hamatean i. Laing Jesus i do na paluahon hita sian rimas ni Debata na giot ro i.

1 TESSALONIKA 5:4

Tapi anggo hamu angka dongan, nada di hagolapan hamu maringanan; na mambaen hamu gabe tarsonggot do baenon ari i songon na nisonggot ni panangko.

2 TESSALONIKA 2:8

disi pe anso tarida Jolma Na Jahat i. Jadi bunuon ni Tuhan Jesus ma Jolma Na Jahat i dohot hosa na sian pamangan ni Tuhan Jesus sandiri. Jana roncohononNia ma i dohot sinondang ni haroroNia.

1 TIMOTEUS 6:19

Songon i ma baenon ni halahi dalanna laho palagutkon arta na gabe poko na denggan tu ari pangapudian ni halahi. Jadi muda songon i, maruli ma halahi ngolu na manongtong i ma ngolu na satutuna i.

2 TIMOTEUS 1:10

Jana saonnari dipatidahon Debata ma denggan ni rohaNia i tu hita sian haroro ni Sipaluanta Kristus Jesus. Ditaluhon Jesus do kuaso ni hamatean jana dilehen Ia ngolu na so ra mantak markite Jamita Na Denggan i.

2 TIMOTEUS 1:12

Hara ni i ma umbaen na hutaon sudena on, tapi nada maila au, angke tangkas do huboto sanga ise na huhaporsayai. Pos do rohangku, sanga aha na nipasahatNia tu au, tarjagohon Ia do i lopus tu Ari Parpudi i.

2 TIMOTEUS 1:18

Jana di Epesus pe na dung bahat sajo do pangurupinia tu au. Taringot tusi pe madung diboto ho i. Sai denggan ma roha ni Tuhan mangalehen asi ni rohaNa tusia muda ro Tuhan manguhumi sudena jolma manusia.

2 TIMOTEUS 2:5

Sada halak parolah raga nada tarbaen ia gabe juaro di bagasan partandingan anggo so diihutkon ia angka paraturan.

2 TIMOTEUS 4:1

Ro dope Kristus Jesus tu tano on manguhumi angka jolma na mangolu dohot na mate; jana ro ma Ia mamarenta songon Raja. Jadi hara ni i gomos ma pangidoanku tu ho, di jolo ni Debata dohot Kristus Jesus:

TITUS 2:13

Saonnari na painte-intehon Ari na niarop ni rohanta i do hita. Anggo di Ari i, idaon ni portibi on ma hasangapan ni Jesus Kristus, i ma Debata Na Gumodang i jana Jesus Kristus Sipalua hita.

IBRANI 12:11

Tutu nian dompak hona ajar hita, nada sonang rohanta manjagit pangajaran i, hum na pahancit roha sajo do i nihilala. Hape dung salpu i, dilehen do di halahi parbatu ni hatigoran, na mangalehen hasonangan.

IBRANI 9:28

Laing songon i do Kristus i, hum sanoli sajo do Ia nihaulkon songon haul laho manyesa dosa ni bahat halak. Ro dope Ia nian paduanolihon tapi nada mamorsan dosa be; na giot paluahon angka jolma na paintehon haroroNia noma.

JAKOBUS 1:12

Martua do sanga ise na sobar di na manaon pandugaan. Angke muda dung disalpui ia pandugaan i, manjagit upa ma ia, i ma hangoluan na nijanjihon ni Debata tu angka na mangkaholongi Debata.

1 PETRUS 1:4

Hara ni i do umbaen na mararop ni roha hita maruli di pasupasu na nipasingkop ni Debata di halakNia, i ma angka pasupasu na nipasingkopNia di banua ginjang, gabe nada ra sego, sanga busuk, sanga manyocang.

1 PETRUS 5:4

Jadi muda ro Parmahan Bolon i, jagitonmunu ma tuku hamuliaon na so ra malos.

HALUMBAAN 1:7

Ligi da, na ro ma Ia dihaliangi ombun! Idaon ni sude halak ma Ia, dohot halahi na maniham Ia. Mangangguhi ma sasudena bangso na di tano on manangisi dirina be hara ni Ia. Olo, tutu do na songon i! Amen!

HALUMBAAN 19:11

Dung i huida ma mungkap banua ginjang, haruar ma sada kudo na bontar, jana na juguk di ginjangna i margoar, “Na Setia dohot Na Sintong,” jana markite-hite hatigoran do Ia manguhumi dohot marporang.

HALUMBAAN 2:10

Ulang ho mabiar taringot tu na giot taononmu. Ligi ma dabuon ni sibolis ma deba sian hamu tu bagasan hurungan, anso niuji hamu, jana manaon parkancitan ma hamu salolot sampulu ari. Sai bonar ma rohamunu lopus tu hamatean i, dung i lehenonKu ma di ho tuku hangoluan.

HALUMBAAN 22:20

Didok na manyaksihon sudena on do, “Olo, tibu ma Au ro!” Amen! Ro ma Ho, ale Tuhan Jesus!

HALUMBAAN 4:10

manungkap ma pangituai na dua pulu opat i di jolo ni na juguk di habangsa i, marsomba tuSia na mangolu i salolot-lolotna. Dung i dipayakkon halahi ma tuku ni halahi i tu jolo ni habangsa i jana ninna halahi ma,

HALUMBAAN 4:4

Adong ma dua pulu opat habangsa na asing martingko mangkaliangi habangsa i. Juguk ma disi dua pulu opat angka pangituai marpakean na bontar, jana martuku sere.