2 TIMOTEUS 4:10 - BIBEL JAMITA NA DENGGAN

¹⁰ harana madung ditinggalkon si Demas au hara ni holong ni rohania tu portibi on. Madung kehe ia tu Tessalonika. Si Kreskes pe madung kehe tu Galatia jana si Titus tu Dalmatia.

2 TIMOTEUS 4:10 ပူးပေါင်းရင်းမြစ်များ

MATEUS 12:32

Halak na mandok hata laho mangalo Anak Ni Jolma, tarsesa do i. Tapi anggo halak na mandok hatana laho mangalo Tondi Parbadia, bagi na bia pe nada tarsesa be i, bope di portibi on sanga pe di ari na giot ro!”

MATEUS 26:56

Tutu do nian, angkon tarjadi do sude na masa on anso tulus muse sanga aha na nisuratkon ni angka panurirang di Buku Na Badia i.” Dung i markehean ma sude anak sisean ni Jesus i maninggalkon Ia.

LUKAS 14:33

Ujungna ninna Jesus ma, “Laing songon i ma hamu. Umpe sahalak sian hamu tarbaen gabe siihutkon Au, anggo so tartinggalkon ia do sasude na adong disia.”

LUKAS 16:13

“Umpe adong sada halak naposo, na bisa gabe naposo ni dua tuan rap sanoli mangoloi; angke goyak do rohania tu tuannia na sada jana dihaholongi ia na sada nari, sanga pe dipasangap ia na sada hape na sada nari diapasi ia. Nada tarbaen jolma gabe pangoloi tu Debata dohot muse pangoloi tu mammon.”

LUKAS 17:32

Ingot hamu ma na masa tu dadaboru ni si Lot!

BAENON NI ANGKA RASUL 13:13

Sian Papos markapal ma si Paulus rap dohot angka dongannia i tu Perga na di kota Pamfilia. Ditadingkon si Johannes ma halahi disi, mulak ia tu Jerusalem.

BAENON NI ANGKA RASUL 15:38

hape nada tumbuk be tu roha ni si Paulus padohot si Markus, hara ni na so ra ia rap markarejo dohot halahi di na nitadingkonnia halahi di Pamfilia, na salpu i.

BAENON NI ANGKA RASUL 16:6

Nada dipatola Tondi Parbadia pararaton ni si Paulus dohot si Silas hata ni Debata anggo di Asia. Jadi tu Prigia dohot tu Galatia noma dipatorus halahi mardalan.

BAENON NI ANGKA RASUL 17:1

Didatdati si Paulus dohot si Silas ma pardalanan ni halahi i, dibolus halahi ma Ampipolis dohot Apolonia lopus lalu tu Tessalonika. Adong do disi bagas paribadatan ni halak Jahudi.

BAENON NI ANGKA RASUL 17:11

Umburju do roha ni halak Berea ulang pado halak na di Tessalonika. Jop do roha ni halahi umbege barita taringot tu Jesus, jana ganop ari do dipareso-reso halahi Buku Na Badia i laho patangkaskon sanga na tutu do na niajarkon ni si Paulus.

BAENON NI ANGKA RASUL 17:13

Jadi dung diboto halak Jahudi na di Tessalonika na dung dihobarkon ni si Paulus muse hata ni Debata di Berea, gabe ro muse ma halahi tu Berea laho mangirang-irangi halak anso ganggu rohana.

BAENON NI ANGKA RASUL 18:23

Dung adong sanga sadia honok disi, kehe ma ia mangulahi manopot Luat Galatia dohot Prigia laho patoguhon roha ni angka na porsaya i.

2 KORINTUS 2:13

Tapi inda sonang huhilala, hara ni na so marsuo au dohot donganta si Titus disi. Gabe huparmisihon noma tu halak kota i lalu kehe au tu Makedonia.

2 KORINTUS 7:6

Tapi tuani ma, sai dipagodang Debata do roha ni halak na menek roha; dipatogar Ia do rohanami markite-hite haroro ni si Titus.

2 KORINTUS 8:16

Tarimakasi do hami dok tu Debata hara ni na dung mangalehen ringgas ni roha tu si Titus gabe songon hami laho mangurupi hamu!

2 KORINTUS 8:23

Anggo taringot tu si Titus, ale-alengku do i, donganku saparkarejoan laho mangurupi hamu. Jana taringot tu angka dongan na asing i na rap kehe dohot ia, angka utusan ni parlagutan i do halahi – gabe sada puji-pujian di Kristus i.

2 KORINTUS 8:6

Hara ni i do umbaen na gomos hami sosoi si Titus – anso laing didatdati ia karejo na denggan i di tonga-tongamunu, songon na dung dipungkana hian.

PILIPPI 2:21

Anggo na asing i do, hum na pareso tu dirina sandiri be do, jana nada tu haporluan ni Jesus Kristus.

1 TIMOTEUS 6:10

Angke sian holong ni roha tu hepeng do haroroan ni sude ragam ni hajahatan. Adong do deba halak na sai mangkojar hepeng jana na so mangihut be tu ajaran ni Kristen, lopus gabe didondoni pardangolan halahi, mambaen gabe marsak roha ni halahi.

1 TIMOTEUS 6:17

Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu – songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita.

2 TIMOTEUS 1:15

Diboto ho do na dung morot sude halak na di Luat Asia manadingkon au, dohot ma disi si Pigelus dohot si Hermogenes.

2 TIMOTEUS 4:16

Di na parjolo hupajojor pambelaanku umpe sahalak na ro mandongani au; kehe do sude manadingkon au. Sai ulang ma nian dipasala Debata halahi taringot tusi!

TITUS 1:4

Tu si Titus, anakku, mangihutkon haporsayaanta. Asi ni roha dohot hasonangan ma di ho, sian Debata Ama dohot Kristus Jesus, Sipalua hita.

PILEMON 1:24

Laing jagit ma tabe ni angka donganku: Si Markus, si Aristarkus, si Demas dohot si Lukas.

2 PETRUS 2:15

Gabe lilu do halahi hara ni na so ra halahi mangihutkon dalan na tingkos. Dalan na nibolus ni si Bileam anak ni si Beor nahinan, i do diihutkon halahi. Na sai por sajo do roha ni si Bileam mida upa ni pambaenan na jat.