2 TIMOTEUS 2:16 - BIBEL JAMITA NA DENGGAN

¹⁶ Padao ma ho sian angka kecet rarat na so marguna jana na so ias. Hum mambaen jahat do angka pangkataion sisongon i.

2 TIMOTEUS 2:16 ပူးပေါင်းရင်းမြစ်များ

ESRA 10:10

Dung i jongjong ma si Esra jana mandok hata ma ia tu halahi, “Madung mardosa hamu dohot manambai hasalaan ni Israel hara ni na mambuat boru ni bangso na asing.

HOSEA 12:1

Didok Tuhan ma, “Dihuliangi Efraim do Au marhite gabus dohot sipaoto-oto; bangso Juda laing tongtong mangalo tu Au, Debata Na Badia jana na tigor.

1 KORINTUS 15:33

Ulang jabat tarpaoto-oto hamu! Muda dipardongan hamu halak na jahat, gabe jahat muse do parangemunu na denggan i.

1 KORINTUS 5:6

Nada denggan anggo na manggodang diri i hamu! Ning rohangku diboto hamu do pandohan on, “Saotik pe ragi i, gabe kombang do sude adonan i!”

1 TIMOTEUS 1:9

Angkon laing ingoton do, dibaen pe angka Tona ni ugamo i, nada na giot di halak na burju, tapi na giot tu halak pangalanggar Tona do i, tu angka na jahat, tu halak na so mananda Tuhan, tu halak pardosa, tu halak na so marugamo, tu parroha portibi, tu halak sibunu simatobangna, tu angka sibunu jolma,

1 TIMOTEUS 4:7

Padao ma ho sian angka turi-turian na so ture. Gumonan ma pasomal-somal dirimu marhadaulaton tu Debata.

1 TIMOTEUS 6:20

Sasude pos ni roha na nilehen di ho, denggan ma jagohon i sude Timoteus! Padao ma ho sian angka pangkataion na so marguna. Laing padao ma ho sian partangkangan taringot tu angka pangalaho na didok roha ni halak “Parbinotoan,” hape sian dalan na lilu.

2 TIMOTEUS 2:14

Paingotkon ma tu halak taringot tuson sudena. Di jolo ni Debata, paingot ma halahi anso ulang martangkangi hara ni angka pandohan. Nada adong guna ni i, gariada hum mambaen gaor pikiran ni halak na umbegesa do i.

2 TIMOTEUS 2:21

Sanga ise halak na paias dirina sian sude na jahat, i ma na nipake songon parkokas tu pangalaho na marsangap. Gabe nampuna hapunjungan jana na hasaya ma ia di tuanna. Na diparade hian do halak na songon i sipakeon tu angka ragam ni karejo na denggan.

2 TIMOTEUS 3:13

hape anggo angka parjahat dohot angka panipu i mur jumahat dope. Ditipu halahi ma halak na asing, hape hona tipu muse do halahi.

TITUS 1:11

Angkon dijait do giotna pamangan ni jolma sisongon i, harana madung bahat angka bagas ni halak na gabe gaor sudena hara ni angka pangajaran na so patut na nibaen ni halahi. Na manjalahi untung na so patut do antong halahi di karejona i!

TITUS 1:14

jana anso ulang marguru tu angka turiturian ni halak Jahudi dohot tu angka aturan na nibaen ni halak na marbalik sian hasintongan i.

TITUS 3:9

Padao ma ho sian angka partongkaran na so marguna dohot sian parsoalan ni angka tarombo. Ulang dohot-dohoti angka partangkangan dohot parbadaan taringot tu angka Tona ni ugamo. Inda adong guna ni i sude jana nada adong muse untungna.

IBRANI 12:15

Jagohon hamu ma anso ulang adong sanga ise na morot sian asi ni roha ni Debata; anso ulang adong na gabe duri dohot sihupi di tonga-tongamunu na parohon hasusaan jana na mambaen sego halak na bahat.

2 PETRUS 2:18

Sian angka pangkobarion ni halahi na mardongan lancap jana na rumar i dipake halahi ma hagiot na jat laho mangaronjomkon halak sanga ise na baru malua sian angka na mardalan dihaliluon di ngoluna.

2 PETRUS 2:2

Haru pe songon i laing bahat do halak na mangihutkon parngoluon ni angka guru pargabus na nirajaan ni angka hagiot na so denggan i. Jana parange ni angka guru pargabus i ma na mambaen gabe bahat halak pabilehon Dalan Na Tigor i na nilehen ni Debata.

HALUMBAAN 13:14

Dipatola do ia mambaen angka hahomangan; jana dipaoto-oto ia do sude jolma na mangolu di tano on hara ni angka hahomangan na nibaennia i di jolo ni binatang na parjolo i. Jana disuru ia ma halahi sudena pajongjong sada patung laho mamparsangapi binatang na mabugang dibaen podang i, hape laing mangolu.

HALUMBAAN 13:3

Sada sian uluna na pitu i songon na jungada do banga bugangna idaon, tapi madung malum bugangna i. Diihutkon portibi on ma sude binatang i mardongan pangkilalaan na homang-komang.