2 TIMOTEUS 2:14 - BIBEL JAMITA NA DENGGAN

¹⁴ Paingotkon ma tu halak taringot tuson sudena. Di jolo ni Debata, paingot ma halahi anso ulang martangkangi hara ni angka pandohan. Nada adong guna ni i, gariada hum mambaen gaor pikiran ni halak na umbegesa do i.

2 TIMOTEUS 2:14 ပူးပေါင်းရင်းမြစ်များ

JEREMIA 16:19

O Tuhan, Ho do na mangondihon au dohot na margogoihon au; diurupi Ho do au taran di hagogotan. Marroan ma angka bangso sian ujung ni tano on tu Ho jana dokkononna ma, “Hum debata na so tutu jana na so marguna do debata ni ompunami.

JEREMIA 2:11

Nada jungada sada bangso manggonti debatana haru pe i nian nada Debata na satutuna. Hape anggo bangsongKu ditulak do Au jana marsomba tu na so margogo mambaen bagi aha.

JEREMIA 2:8

Angka malim nada adong be na marsapa sanga di dia Au, Tuhanna. Angka na pajongjong uhum pe nada mamboto sanga ise Au. Angka na markuaso mangalo do tu Au. Mangasahon goar ni Baal mandok hata angka panurirang, jana marsomba gana-ganaan na so marguna i.”

JEREMIA 23:32

Au Tuhan, giot aloonKu do angka panurirang i na palaluhon angka nipina na gok gabus. Dipalilu halahi do bangsongKu marhite gabus dohot buras ni halahi. Nada Au marsuru angka panurirang i. Nada marguna halahi saotik pe anggo di bangsongKu. Au Tuhan, madung mandok songon i.”

JEREMIA 23:36

Nada tola be pakeon ni halahi pandohan ‘boban ni Tuhan’. Muda adong dope na mamake hata i, angkon baenonKu tonangKi gabe boban na tutu tusia. Madung dipabalik-balik halak Israel hata na Hudok, Au Debata ni halahi, Debata na mangolu, Tuhan Na Markuaso.

JEREMIA 7:8

Tapi anggo satutuna, porsaya tu gabus do hamu.

HABAKUK 2:18

Aha ma he guna ni patung gana-ganaan? Aha ma he guna ni patung gana-ganaan sibaen gabus i? Harana porsaya do na mambaenna di parkarejoanna, hape nian angka gana-ganaan na ngungu do na nibaenna i.

MATEUS 16:26

Aha ma he labo ni halak, muda ia nampuna sude na satano on, anggo mago do sian ia ngolunia? Targonti ma he ngolu i sanga na dohot aha?

BAENON NI ANGKA RASUL 13:10

didok ia ma, “O anak ni Sibolis! Ho ma musu ni sude na denggan. Biasi dope laing so ra mantak ho manyego-nyego Dalan Ni Tuhan na tigor i?

BAENON NI ANGKA RASUL 15:24

Hami bege do adong sian hami on na ro mandapotkon hamu jana mambaen gurgar rohamunu jana gaor pikiranmunu hara ni na niajarkon ni halahi i. Hape nada na hami suru halahi.

SURAT NI SI PAULUS TU PARLAGUTAN ROM 14:1

Jagit hamu ma halak na gale dope haporsayaanna, ulang ma uhumi hamu pandapot ni halahi.

GALATIA 1:7

Anggo satutuna nada adong “jamita na denggan na asing”. Umbaen na hudok pe songon i hara ni na adong do halak marroan parundut pikiranmunu jana na giot mamutar-balikkon Jamita Na Denggan taringot tu Kristus i.

EPESUS 4:17

Jadi husaksihon di bagasan goar ni Tuhan, on do na giot dokkononku dohot patangkasonku: Ulang be songon halak na so mananda Debata ngolumunu na mamikirkon angka na so haru binoto.

1 TESSALONIKA 4:1

Dung i muse ale angka dongan, ihutkon hamu ma pangajaran na nijagitmunu sian hami sanga bia na patut ngolumunu laho pasonangkon roha ni Debata. Tutu nian saonnari pe madung songon i ngolumunu. Tapi saonnari mangasahon kuaso ni Tuhan Jesus gomos hami pangido jana hami sosoi hamu anso mur marsitutu hamu mangkaburjuhon i!

2 TESSALONIKA 3:6

Mangasahon kuaso ni Tuhan Jesus Kristus hami paingot ma hamu ale angka dongan, paholang hamu ma dirimunu sian angka dongan na losok, jana na so manangihon pangajaran na hami ajarkon tu hamu.

1 TIMOTEUS 1:4

Paingot ma halahi, anso ulang sai kehe be roha ni halahi tu angka turi-turian bope angka barita ni asal mula na so marnasidung. Hum parohon partangkangan sajo do i jana nada mambaen maju sangkap ni Debata na bisa taboto hum sian haporsayaan sajo.

1 TIMOTEUS 1:6

Adong do deba halak, na so songon i be ngoluna. Lilu do halahi di angka hata na so marguna.

1 TIMOTEUS 4:8

Pangoromon ni pamatang, saotik do guna ni i, tapi anggo latihan ni roha, i ma na marguna tu sude pangalaho, angke dijamin i do ngolunta di tano on lopus tu ari parpudi.

1 TIMOTEUS 5:21

Gomos pangidoanku tu ho di adopan ni Debata, dohot Jesus Kristus bope angka surusuruan todoan, anso diihutkon ho angka na hudok on so pola mardongan biar ni roha maradopkon sanga ise pe jana nada mamihak-mihak.

1 TIMOTEUS 6:13

Jana saonnari pe, di jolo ni Debata na mangalehen hosa tu sasudena dohot di jolo ni Jesus Kristus na mangalehen hasaksian na tutu di jolo ni si Pontius Pilatus, hutonahon ma tu ho songon on:

2 TIMOTEUS 1:6

Hara ni i hupaingot ho, anso dipasunggul-sunggul ho silehen-lehen ni Debata, na di bagasan ho, hara ni na hupayakkon tanganku tu ho.

2 TIMOTEUS 2:16

Padao ma ho sian angka kecet rarat na so marguna jana na so ias. Hum mambaen jahat do angka pangkataion sisongon i.

2 TIMOTEUS 2:23

Ulang ma dohoti angka partongkaran ni angka halak na oto na so umboto sanga aha. Angke diboto ho do i hum na parohon partangkangan do i.

2 TIMOTEUS 4:1

Ro dope Kristus Jesus tu tano on manguhumi angka jolma na mangolu dohot na mate; jana ro ma Ia mamarenta songon Raja. Jadi hara ni i gomos ma pangidoanku tu ho, di jolo ni Debata dohot Kristus Jesus:

TITUS 3:1

Paingot ma sudena ruasmu anso tunduk halahi tu angka pamimpin dohot na markuaso di negara, jana mangoloi dohot na patuluskon sandok na denggan.

IBRANI 13:9

Ulang ma padiar-diar hamu angka pangajaran na marragam-rupa i mangaliluhon hamu. Angkon denggan ni roha ni Debata do na patogu rohanta, i do na denggan; ulang ma angka paraturan ni sipanganon. Angke angka halak najolo na mangihutkon paraturan i nada adong pola gunana dapot halahi.

2 PETRUS 1:13

Salolot mangolu au, na patut do huhilala manyungguli hamu taringot tusi.

1 SAMUEL 12:21

Ulang antong ihutkon hamu angka debata na so tarbaen mangurupi dohot paluahon hamu, angke na so tutu do adong halahi.