2 TIMOTEUS 2:12 - BIBEL JAMITA NA DENGGAN

¹² Muda laing sobar hita, angkon laing mamarenta ma hita rap dohot Ia. Muda tatulak Ia, tulahonNia muse ma hita.

2 TIMOTEUS 2:12 ပူးပေါင်းရင်းမြစ်များ

PODA 30:9

Harana, muda ompot kayo au, betak na gabe dokkononku do, na so porlu Ho di au. Jana muda marpogos au, betak na manangko ma au, jadi gabe hodar goarMu.”

MATEUS 10:33

Tapi sanga ise na mamorso Au di jolo ni halak, i ma na so paboahon na mangihutkon Au do ia, Au pe porsoonKu ma ia di jolo ni Damang na di banua ginjang i.”

MATEUS 26:35

Dialusi si Petrus ma, “Sugari pe angkon tarpaksa mate au rap dohot Ho Tuhan, nada na dohononku na so hutanda Ho Tuhan!” Songon i ma dipandok sude anak sisean na asing i.

MATEUS 26:75

Jana taringot ma tu roha ni si Petrus hata ni Jesus tusia, “Dompak so martahuak manuk, madung diporso ho Au tolu noli.” Kehe ma si Petrus tu balian tangis panguncombopon.

MARKUS 10:33

“Tangihon hamu ma, saonnari manangkok ma hita tu Jerusalem. Pasahaton ma disi Anak Ni Jolma tu angka sintua ni malim dohot angka Siboto Surat. Dabuhonon ni halahi ma uhuman mate tuSia. Dung i pasahaton ni halahi ma Ia tu tangan ni angka halak na so Jahudi.

MARKUS 8:38

Angke sanga ise na maila hara ni Au dohot hatangKu di tonga-tonga ni halak na so setia dohot pardosa, maila muse ma Anak Ni Jolma i mida ia muda ro Ia di bagasan hasangapan ni AmangNia rap dohot surusuruanNia na badia i.”

LUKAS 12:9

Tapi barang ise na mamorso Au di jolo ni jolma, porsoon do ia di adopan ni angka surusuruan ni Debata.

LUKAS 22:29

Songon dia pangalehen ni Damang di Au kuaso laho mamarenta, laing songon i ma Hulehen kuaso di hamu laho mamarenta.

LUKAS 22:30

Tola ma hamu rap dohot Au marsonang-sonang di HarajaanKi. Jana juguhanmunu ma dua bolas habangsa laho manguhumi halak Israel sidua bolas marga i.”

LUKAS 9:26

Muda adong na maila hara ni Au jana maila hara ni pangajaranKu di adopan ni halak na asing, maila muse ma Anak Ni Jolma i mangokui halak sisongon i di haroroNia saulahon mardongan hasangapanNia, jana mardongan hasangapan ni Amangnia, songon i dohot hasangapan ni angka surusuruan na badia!

BAENON NI ANGKA RASUL 14:22

Dipapos halahi ma roha ni angka na mangihutkon Jesus, jana dipaingot halahi ma angka na mangihutkon Jesus i anso tongtong porsaya tu Jesus. “Angkon jolo bahat do taononta parkancitan baru pe anso maruli hita hatuaan ni Harajaan Ni Debata,” ninna rasul i mamodai angka na mangihutkon Jesus di angka kota nangkinan i.

SURAT NI SI PAULUS TU PARLAGUTAN ROM 5:17

Hara ni pangalaosion ni sada halak, gabe mangarajai ma hamatean i rarat sian halak na sada i. Hape dao dope gumodang akibat ni na nibaen ni Sada Halak na asing i, i ma Jesus Kristus, maradopkon bahat halak, na manjagit asi ni roha dohot silehen-lehen hatigoran i. Angkon mangolu jana mangarajai halahi markite-hite Kristus i.

SURAT NI SI PAULUS TU PARLAGUTAN ROM 8:17

Antong, muda dakdanak ni Debata hita, gabe panean ma hita na giot manjagit angka pasupasu na nipasingkop ni Debata di angka dakdanakNia. Rap manjagit ma hita dohot Kristus sanga aha na dung nipasingkop ni Debata. Angke muda manaon na hancit hita rap dohot Kristus, laing dipasangap muse ma hita rap dohot Ia.

PILIPPI 1:28

Angkon puluk do hamu tongtong; ulang mabiar hamu mida angka alomunu. I ma tandana di halahi, paboa na angkon talu halahi jana hamu ma na monang. Angke Debata sandiri do na mambaen hamu gabe monang.

1 TIMOTEUS 5:8

Muda halak na so paturehon koum sisolkotna, lumobi donganna samudar, na mamorso haporsayaanna do halak na songon i; jumatjat dope i sian halak na so porsaya.

JUDAS 1:4

Angke madung adong masuk tu tonga-tonganta sian angka halak na so porsaya so sian pamotoanta. Dipabalik-balik halahi do jamita taringot tu asi ni roha ni Tuhanta i, anso tarbaen halahi patuluskon angka parange ni halahi na so ture. Jana na so ra do halahi mangoku paboa Jesus Kristus do Parkuaso dohot Tuhanta na sasada i. Mamungka sian nahinan madung dipaboa hian di Buku Na Badia i uhuman na tu halahi.

HALUMBAAN 1:6

Madung dibaen Ia do hita gabe sada harajaan anso laing gabe malim hita na markarejo di Debata AmaNa i. DiSia ma hasangapan dohot kuaso ro disalolot ni lolotna. Amen!

HALUMBAAN 1:9

Si Johannes do au, kahanggi bope donganmunu saparjuangan na topet manaon parkancitan, di harajaan dohot di pohom ni roha paintehon Jesus. Na tarbuang do au di pulo Patmos hara ni na pararatkon jamita na sian Debata na nipasahat ni Jesus.

HALUMBAAN 2:13

Huboto do sanga di dia hamu maringanan. Di inganan ni kuaso ni Sibolis i do ingananmunu. Burju do hamu tu Au. Dompak na dibunu i pe si Antipas saksingKu na burju i di tonga-tongamunu di markas ni Sibolis i, disi pe nada disoadahon hamu paboa na porsaya hamu di Au.

HALUMBAAN 20:4

Dung i huida ma angka habangsa dohot angka halak na juguk di habangsa i; dilehen ma kuaso tu halahi laho mandabu uhuman. Huida muse dope angka tondi ni halak na hona ponggol uluna hara ni hasaksian taringot tu Jesus dohot hara ni hata ni Debata. Halak on ma na so jungada ra manyomba binatang i bope patungna i. Tanda ni binatang i pe nada jungada dijagit halahi di bohi sanga pe di tangan ni halahi. Gabe mangolu ma halahi mangulahi jana mamarenta ma halahi songon raja rap dohot Kristus di na saribu taon i.

HALUMBAAN 20:6

Martua jana na badia do, na taruli di hangongot na parjolo i. Nada markuaso be hamatean na paduahon i tu halahi. Gabe angka malim ni Debata ma halahi dohot malim ni Kristus; jana mamarenta ma halahi rap dohot Ia saribu taon honokna.

HALUMBAAN 3:10

Hara ni na dung nioloanmunu parentangKu anso sobar hamu, Au pe jagohononKu ma hamu anso laing horas torkis hamu mamolus hasusaan na giot masa tu sude portibi on. I ma na giot tarjadi laho manguji sasude jolma na satano on.

HALUMBAAN 3:21

Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i.

HALUMBAAN 3:8

Huboto do sanga aha na nibaenmunu. Haru so sadia pe gogomunu, tapi laing dioloi hamu do pangajaranKu jana unduk do hamu tu Au. Madung Hubuka sada pintu na godang di hamu na so tartutup sanga ise pe.

HALUMBAAN 5:10

Madung dibaen Ho halahi gabe sada bangso pinompar ni raja, anso laing gabe malim muse ma halahi na mangoloi Debatanta, jana mamarenta di ginjang ni tano on.”