2 TIMOTEUS 1:12 - BIBEL JAMITA NA DENGGAN

¹² Hara ni i ma umbaen na hutaon sudena on, tapi nada maila au, angke tangkas do huboto sanga ise na huhaporsayai. Pos do rohangku, sanga aha na nipasahatNia tu au, tarjagohon Ia do i lopus tu Ari Parpudi i.

2 TIMOTEUS 1:12 ပူးပေါင်းရင်းမြစ်များ

MASMUR 25:2

o Tuhan, Ho do haposan ni rohangku! Ulang padiar dipaila au, jana disurahi angka musungku.

MASMUR 31:5

Hupasahat tu bagasan tanganMu ma tondingku, o ale Tuhan Debata na burju, na paluahon au.

MASMUR 56:9

Di ari na pio-pio au tu Ho, ale Debata, sumurut ma musungku hona ayak, angke pos do rohangku tu au do Ho marpihak.

MASMUR 9:10

Halak na mananda Ho, mararop ni roha tu Ho Tuhan, halak na mangalului Ho nada ra Ho maninggalkon.

JESAYA 12:2

Debata do da haluaanku, porsaya tuSia do au. Nada adong na mambaen au mabiar, angke Tuhan Debata do hagogoanku dohot ende-endengku, Debata do na paluahon au, Ia do haluaanku.

JESAYA 50:7

Hape nada mampan incak ni halahi, dibaen dilehen Tuhan Debata pangurupi. Hupatogu rohangku songon togu ni dolok batu, angke huboto nada au dibaen maila.

JESAYA 54:4

Ulang ho mabiar, nada pola pailaon be ho; nada layasan jabat mangirput ho. Halupahononmu ma na so turemu dompak poso ho; dohot na lungunmu dompak mabalu ho.

NAHUM 1:7

Na denggan do Tuhan i, ditolong Ia do bangsoNia taran marhasusaan, dijagohon Ia do halak na marsihohot tuSia,

MATEUS 12:21

jana mararop ni roha tuSia ma sude angka bangso.”

MATEUS 24:36

“Umpe sahalak umboto sanga andigan do arina dohot jomna. Angka surusuruan na di banua ginjang i pe nada diboto halahi i. Anak i sandiri pe nada diboto Ia. Hum Damang sajo do na umboto i.

MATEUS 7:22

Di ari parpudi bahat ma halak na mandok tu Au, ‘Tuhan, Tuhan, nada he mangasahon goarMu do hami manyurirangi? Nada he laing mangasahon goar ni Tuhan i do hami paorot angka setan, jana hami baen angka tanda hahomangan?’

LUKAS 10:12

Hudok ma di hamu: Umnayang do uhum na tu halak Sodom di ari parpudi, ulang pado kota na songon i!”

LUKAS 23:46

Dung i marsurak ma Jesus gogo, “Ale Amang! Tu bagasan tanganMu ma Hupasahat tondingKu!” Dung didok Ia songon i marujung ma ngoluNia.

JOHANNES 17:15

Nada Hupangido anso diparuar Damang halahi sian portibi on tapi on do na Hupangido, anso dijagohon Damang halahi maradopkon si Jahat i.

JOHANNES 6:44

Nada tarbaen sanga ise pe ro tu Au, anggo so disosoi Damang na marsuru Au halakna i tu Au; jana pangoluonKu ma halahi di Ari Parpudi.

BAENON NI ANGKA RASUL 13:46

Tapi mur barani do si Paulus dohot si Barnabas mandok hata. Didok halahi ma, “Tutu do i angkon jolo paboaon do hata ni Debata tu hamu. Tapi hara ni na so ra hamu manjagitsa disi ma ditontuhon hamu sandiri paboa na so tama hamu manjagit ngolu na so mantak i. Jadi saonnari tadingkononnami ma hamu, kehe ma hami mandapotkon bangso na asing.

BAENON NI ANGKA RASUL 13:50

Tapi dijajang halak Jahudi i ma angka dadaboru sian halak na sangap angka na mangkabiari Debata. Dipatubu halahi ma goyak ni roha mida si Paulus dohot si Barnabas, jana dipaorot halahi ma halahi na dua sian luat i.

BAENON NI ANGKA RASUL 21:13

Tapi dialusi ia ma, “Aha ma he gunana martangisan hamu songon on, hum mangarsahi ate-atengku do i. Angke nada hum nirahutan au rade, tapi na rade do au mate di Jerusalem humopkop goar ni Tuhan Jesus.”

BAENON NI ANGKA RASUL 7:59

Di na nidangguran ni halahi si Stefanus, pio-pio ma ia ning ia ma, “Ale Tuhan Jesus, jagit ma tondingku!”

BAENON NI ANGKA RASUL 9:16

Jana patuduhononKu do tusia angka sitaonon na giot taononnia hara ni Au.”

SURAT NI SI PAULUS TU PARLAGUTAN ROM 1:16

Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing.

SURAT NI SI PAULUS TU PARLAGUTAN ROM 9:33

Songon na tarsurat i, “Ligi da, Hupayakkon do di Sion sada batu partuktuhan dohot sada batu pardandian, jana barang ise na porsaya diSia, nada dipaila be.”

1 KORINTUS 1:8

Patoguon ni Kristus do rohamunu lopus tu ujungna, jadi muda ro Ia mangulahi, nada adong be na martihas di hamu.

1 KORINTUS 3:13

Muda ro saulahon Kristus, disi pe anso tarida parkarejoan ni halahi be. Harana api paruhuman do pataridahon karejo ni ganop be. Api i ma na manguji jana manontuhon hadengganan ni karejo i.

PILIPPI 1:20

Hum on ma i na sai hupangidohon dohot na huaropkon: Ulang nian gabe so tulus sidung karejongku. Sai diarop rohangku do tongtong lumobi saonnari anso mur puluk au sian sudena roha bope pamatangku – sanga mangolu sanga na mate pe au – laing nipasangap ma Kristus.

PILIPPI 3:10

Hum on ma na nipangido ni rohangku; anso hutanda nian Kristus jana hurasoi nian kuaso na pangoluhon Ia sian hamatean i. Por do rohangku markancit dohot Ia jana gabe sarupa dohot Ia di pangalaho ni parmateNia.

PILIPPI 3:21

Anggo pamatangta na gale boti na ra madangke on, paubaon ni Kristus do i gabe marsangap songon pamatangNia sandiri. Tarbaen do songon i angke adong do kuasoNia laho manaluhon sasudena.

PILIPPI 3:8

Nada hum i dope, huetong do sasudena i gabe angka na parugi-rugihon au sajo. Ummarga do na adong di au saonnari on: I ma na mananda Jesus Kristus Tuhanki. Hara ni Kristus, gabe hupalua do sasudena. Songon rompak-rompak noma i sude huhilala, anso laing dapot au Kristus,

1 TESSALONIKA 2:16

Dilarang halahi muse dope hami manjamitahon barita haluaan i tu angka bangso na asing. Jadi di na songon i, laing dipupu halak Jahudi do patamba-tamba dosana gabe mur martimbun lalu tu langit. Jana ujungna saonnari dondonan ni rimas ni Debata ma halahi!

1 TESSALONIKA 5:4

Tapi anggo hamu angka dongan, nada di hagolapan hamu maringanan; na mambaen hamu gabe tarsonggot do baenon ari i songon na nisonggot ni panangko.

1 TIMOTEUS 6:20

Sasude pos ni roha na nilehen di ho, denggan ma jagohon i sude Timoteus! Padao ma ho sian angka pangkataion na so marguna. Laing padao ma ho sian partangkangan taringot tu angka pangalaho na didok roha ni halak “Parbinotoan,” hape sian dalan na lilu.

2 TIMOTEUS 1:14

Mardongan pangurupi ni Tondi Parbadia na maringanan di bagasan hita, angkon jagohononmu ma sadenggan-dengganna angka na mararga na dung dihaporsayahon tu ho.

2 TIMOTEUS 1:16

Tapi anggo na sian bagas ni si Onesiporus madung adong sanga na piga noli dipajop ia rohangku. Ibo ma roha ni Tuhan, sai dilehen ma tu halahi asi ni rohaNa. Haru pe tarhurung au, nada pola maila si Onesiporus marnida na masa tu au.

2 TIMOTEUS 1:18

Jana di Epesus pe na dung bahat sajo do pangurupinia tu au. Taringot tusi pe madung diboto ho i. Sai denggan ma roha ni Tuhan mangalehen asi ni rohaNa tusia muda ro Tuhan manguhumi sudena jolma manusia.

2 TIMOTEUS 1:8

Jadi hara ni i, ulang ma maila ho pajojorkon hasaksian taringot tu Tuhanta jana ulang maila ho hara ni au na tarhurung hara ni Ia. Gumonan ma dohot ho manaon parkancitan hara ni Jamita Na Denggan i mangasahon gogo na sian Debata.

2 TIMOTEUS 2:9

Hara ni na manjamitahon Jamita Na Denggan i do umbaen na markancit au; lopus tarrante dope songon sada halak parjahat, tapi nada tarrante anggo hata ni Debata.

2 TIMOTEUS 4:8

Jana saonnari upa ni hamonangan i noma sipainteonku. Di Ari Parpudi, pasahaton ni Tuhan Panguhum na tigor i ma upa i tu au, angke di bagasan pardomuan na denggan do au mangolu dohot Debata. Jana nada hum au sajo na giot manjagit upa i, tapi dohot do sudena halak na sai malungun paintehon haroro ni Tuhan i.

TITUS 3:8

Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak.

IBRANI 12:2

Tu Jesus ma tatatap, na manogu-nogu hita di bagasan haporsayaan, jana na maroban haporsayaanta i tu hasanggaman. Ditaonkon Ia do mate di hayu parsilang gonti ni jop ni roha na dung diparade diSia, jana juguk do Ia nuaeng di siamun ni habangsa ni Debata.

IBRANI 2:18

Dohot dalan na songon i, haurupan Ia ma sanga ise halak na hona pandugaan, harana Ia sandiri pe madung jungada hona pandugaan jana manaon parkancitan.

IBRANI 7:25

Jadi hara ni i sanga andigan pe tarbaen Jesus do paluahon sanga ise halak na ro tu Debata markite-hite Ia. Tarbaen Jesus pe songon i hara ni na mangolu do Ia sapanjangna laho pasahatkon tu Debata angka pangidoan ni halahi.

1 PETRUS 1:5

Di hamu do i sudena, hara ni na dung porsaya hamu tu Debata. Gabe dijago kuaso ni Debata ma hamu anso dohot hamu manjagit haluaan na dung singkop giot pabotohonon di hatiha parpudi.

1 PETRUS 4:16

Tapi muda manaon parkancitan hamu hara ni na Kristen hamu, ulang ma maila hamu hara ni i. Mandok tarimakasi ma hamu tu Debata hara ni na dipanggoarkon tu hamu goar ni Kristus sandiri.

1 PETRUS 4:19

Hara ni i, muda adong sanga ise halak na manaon parkancitan hara ni hagiot ni Debata, angkon laing tigor ma ngolu ni halak na songon i jana dipasahat halahi ma diri ni halahi tu Sipanompa i. Sai patulusonNa do na nijanjihonNia.

JUDAS 1:24

Debata do na margogo manjagohon hamu, anso ulang tinggang, jana na pajongjongkon hamu di adopan ni hasangapanNia di bagasan jop ni roha, jana nada martihas.