2 TIMOTEUS 1:10 - BIBEL JAMITA NA DENGGAN

¹⁰ Jana saonnari dipatidahon Debata ma denggan ni rohaNia i tu hita sian haroro ni Sipaluanta Kristus Jesus. Ditaluhon Jesus do kuaso ni hamatean jana dilehen Ia ngolu na so ra mantak markite Jamita Na Denggan i.

2 TIMOTEUS 1:10 ပူးပေါင်းရင်းမြစ်များ

JESAYA 43:3

Angke Au do Tuhan, Debatamu. Debata Na Badia ni Israel, Sipaluamu. Hulehen Mesir gabe partobusmu, Sudan dohot Seba baen gontimu.

JESAYA 45:15

Debata na paluahon Israel bangsoNia i, i ma Debata na pasimohon diri.

JESAYA 45:21

Paboa jana patuduhon ma sidalianmu, olo, padiar ma halahi rap martahi, Ise dehe na paboahon sian na robi, jana mambaritahonsa? Nada he Au, Tuhan? Nada adong na asing, nada adong Debata asing sian Au! Debata na tigor jana Sipalua, nada adong asing sian Au!”

HOSEA 13:14

Giot paluaonKu dehe bangso on sian kuaso ni inganan ni jolma na mate? Jo hamatean, sarsarkon ma balamu! Padalan ma karejomu na manyegohon i! Nada be ibo rohangKu mida bangso on.

LUKAS 11:36

Muda sude pamatangmi hona sinondang jana nada adong be deba na golap, gabe torang sajo ma sude pamatangmi, sarupa ma i tu hatiha na nisondangan ni cahaya ni lampu ho.”

LUKAS 13:7

Jadi didok ia ma tu panjago kobun i, ‘Ligi ma, madung tolu taon honokna ro au tuson laho manjalahi batu ni gala-gala on, hape sada pe nada adong dapot au. Aha dope, taba ma bonana i. Aha gunana laing torus ia disi mangolu mangabiskon napu ni tano i!’

LUKAS 2:11

Madung sorang sadari on di Kota Ni si Daud, Sipalua i, i ma Kristus Tuhan i.

JOHANNES 1:9

Torang na tutu na manorangi sandok jolma, ro tu portibi on.

JOHANNES 14:6

Ninna Jesus ma mangalusi, “Au do dalan i dohot hasintongan dohot hangoluan. Nada adong na tarbaen ro tu Ama i anggo so markite-hite Au.

JOHANNES 20:31

Umbaen na nisurat pe sudena na tarsurat di bagasan buku on, anso porsaya do hamu bahaso Jesus do Kristus i, i ma Anak Ni Debata; jana anso dapotan hangoluan hamu markite-hite haporsayaan di goarNia.

JOHANNES 4:42

Didok halahi ma tu anak boru i, “Saonnari madung porsaya hami, nada hara ni angka na nipaboami be tu hami, tapi hara ni na dung hami bege sandiri sian Ia, jana madung hami boto tutu do Ia Sipalua ni portibi on.”

JOHANNES 5:40

Hape nada ra hamu ro tu Au laho manjagit hangoluan na so mantak.

BAENON NI ANGKA RASUL 13:23

Sian pomparan ni si Daud i ma dipabangkit Debata sada Sipalua di halak Israel, laing songon na nijanjihonNia i hian. Jana Jesus do Kristus i.

BAENON NI ANGKA RASUL 5:31

Jana madung dipabangkit Debata Ia markite tangan siamunNia gabe Pamimpin dohot Sipalua; anso marhamubaan ni roha dohot manjagit hasesaan ni dosa Israel i.

SURAT NI SI PAULUS TU PARLAGUTAN ROM 16:26

Madung dipatidahon do saonnari hasimoon i markite-hite surat ni angka panurirang i, mangihutkon parenta ni Debata na salolot ni lolotna, jana dipabotohon i di sude bangso, anso porsaya halahi sude jana mangoloi tu Debata.

SURAT NI SI PAULUS TU PARLAGUTAN ROM 2:7

Lehenon ni Debata ma ngolu na manongtong tu sude na mangkaburjuhon na denggan, hasangapan na sanggam jana na manongtong i.

SURAT NI SI PAULUS TU PARLAGUTAN ROM 3:31

Muda songon i, na mangagohon Tona i do lakna hami markite-hite haporsayaan i? Dao ma i! Tapi hami pajongjong do Tona i.

SURAT NI SI PAULUS TU PARLAGUTAN ROM 6:6

Dibaen madung taboto, madung diparsilangkon hajolmaonta na honok i, anso mago gogo ni dosa na disi jana ulang diparhatoban dosa i be hita.

1 KORINTUS 15:26

Anggo musu na parpudi patunduhonNia, i ma hamatean.

1 KORINTUS 4:5

Antong, anggo so dapot dope hatihana, ulang ma matibutu tontuhon hamu marsala sada-sada halak sanga nada. Painte hamu ma lopus tu haroro ni Tuhan i. BukaonNia do sude angka rahasia na buni di na golap. RungkaranNia ma sudena rahasia na buni na di bagasan roha ni jolma. Di hatiha i pe anso jagiton ni halak ganop pujian na patut jagitonna sian Debata.

2 KORINTUS 5:4

Salolot di bandar on hita maringanan, sai holsoan do hita hara ni dokdok ni pananggunganta. Nada hara ni na por rohanta malua sian pamatangta na sian tano on, tapi hara ni na lungun do rohanta laho manyolukkon pamatang na sian banua ginjang i tu na parjolo i anso dibondut hangoluan i pamatangta na ra mate on.

GALATIA 5:4

Muda sian na mandalankon Tona do diusahahon hamu mardenggan dohot Debata, gabe digotapkon hamu ma parsambunganmunu sian Kristus. Di balian ni hadengganan ni roha ni Debata noma hamu mangolu.

EPESUS 1:18

Hupangidohon anso torang mata ni rohamunu dibaen Ia, anso diastui hamu sanga aha na patut aropon ni rohamunu sian Debata na mamiohon hamu, bope hamoraon ni hasangapan, siteanon na nitontuhonNia di angka halak na porsaya.

EPESUS 1:9

Sian rohaNia sandiri dipaboa Debata do tu hita rahasia ni sangkapNia. I ma sangkap na dung nitontuhonNia humani sian mulana, angkon markite-hite Kristus do i pasidungonNia.

2 TESSALONIKA 2:8

disi pe anso tarida Jolma Na Jahat i. Jadi bunuon ni Tuhan Jesus ma Jolma Na Jahat i dohot hosa na sian pamangan ni Tuhan Jesus sandiri. Jana roncohononNia ma i dohot sinondang ni haroroNia.

2 TIMOTEUS 1:1

Sian si Paulus, rasul ni Kristus Jesus markite-hite hagiot ni Debata, giot mamarintahon janji taringot tu ngolu di bagasan Kristus Jesus.

2 TIMOTEUS 1:8

Jadi hara ni i, ulang ma maila ho pajojorkon hasaksian taringot tu Tuhanta jana ulang maila ho hara ni au na tarhurung hara ni Ia. Gumonan ma dohot ho manaon parkancitan hara ni Jamita Na Denggan i mangasahon gogo na sian Debata.

2 TIMOTEUS 4:1

Ro dope Kristus Jesus tu tano on manguhumi angka jolma na mangolu dohot na mate; jana ro ma Ia mamarenta songon Raja. Jadi hara ni i gomos ma pangidoanku tu ho, di jolo ni Debata dohot Kristus Jesus:

2 TIMOTEUS 4:8

Jana saonnari upa ni hamonangan i noma sipainteonku. Di Ari Parpudi, pasahaton ni Tuhan Panguhum na tigor i ma upa i tu au, angke di bagasan pardomuan na denggan do au mangolu dohot Debata. Jana nada hum au sajo na giot manjagit upa i, tapi dohot do sudena halak na sai malungun paintehon haroro ni Tuhan i.

TITUS 2:11

Harana madung dilehen Debata asi ni rohaNia laho paluahon jolma sudena.

TITUS 2:13

Saonnari na painte-intehon Ari na niarop ni rohanta i do hita. Anggo di Ari i, idaon ni portibi on ma hasangapan ni Jesus Kristus, i ma Debata Na Gumodang i jana Jesus Kristus Sipalua hita.

TITUS 3:4

Tapi madung dipatuduhon Debata Sipalua hita, holong dohot denggan ni rohaNa tu hita.

IBRANI 10:32

Ingot hamu ma sanga na bia pangalahomunu di hatiha na salpu. Anggo di hatiha i, dung ditorangi sinondang ni Debata hamu, bahat do parhancitan ditaon hamu; haru songon i pe laing marsitutu do hamu marjuang.

2 PETRUS 1:1

Sian si Simon Petrus, naposo jana rasul ni Jesus Kristus, tu angka na rap dohot hami manjagit haporsayaan i markite-hite hatigoran ni Debatanta dohot Sipalua hita, Jesus Kristus.

2 PETRUS 1:11

Jadi muda songon i, lehenonNa ma di hamu hak na gok anso gabe anggota ni Harajaan Na Manongtong, i ma Harajaan Ni Tuhan dohot Sipalua hita, i ma Jesus Kristus na mamarenta salolot ni lolotna.

2 PETRUS 1:3

Dipio Debata do hita anso dohot hita mangkilalahon hagodanganNa dohot mandai hadengganan ni rohaNia. Mardongan kuasoNia sandiri bope sian na taboto taringot tuSia sandiri, dilehen Debata na mamiohon hita i do tu hita sanga aha na porlu anso mangolu hita songon halak na maribadat tu Debata.

2 PETRUS 2:20

Muda dung ditanda sanga ise Tuhan i dohot Sipaluanta, Jesus Kristus i, jana hara ni i madung malua ia sian angka na marpardomuan tu portibi on na manyegohon parange ni jolma, hape tarjorat muse ia mangulahi jana ditaluhon angka pangalaho ni portibi on, ujungna gabe jumatjat dope na masa tusia ulang pado na parjolo i.

2 PETRUS 3:18

Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.

2 PETRUS 3:2

Husosoi hamu anso diingot hamu mangulahi angka hata na nidok ni angka panurirang ni Debata nahinan, dohot parenta ni Tuhan, Kristus na nipasahat tu hamu markite-hite angka rasul.

1 JOHANNES 1:2

Madung dipaboa hangoluan i tu portibi on, jana madung hami ida. I ma umbaen na hami saksihon taringot tusi jana hami jamitahon taringot tu ngolu na manongtong na adong hian rap dohot Ama i jana na dung dipatidahon tu hami.

1 JOHANNES 4:14

Madung hami ida sandiri Anak Ni Debata, jana saonnari hami saksihon, na dung disuru Ama i do Ia ro tu portibi on anso gabe Sipalua di portibi on.

HALUMBAAN 18:1

Dung salpu i, huida ma sada surusuruan na asing mijur sian banua ginjang. Na godang do kuasonia jana gabe torang ma tano on sudena hara ni sahalania.

HALUMBAAN 2:7

Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangankon parbatu ni hayu hangoluan, na di Pirdaus.”

HALUMBAAN 20:14

Dung i didanggurkon ma hamatean dohot harajaan banua toru i tu bagasan laut api. (Laut api on ma hamatean na paduahon.)

HALUMBAAN 22:14

Martua do sanga ise halak na paiaskon baju jubana lopus ias. Halahi do na tola mangankon batu ni hayu hangoluan dohot na tola mandalani masuk tu kota i sian harbanganna i.

HALUMBAAN 22:17

Didok Tondi i dohot Boru Oroan i ma, “Beta ma!” Jana ganop halak na umbege on angkon laing dohot ma mandok, “Beta ma!” Sanga ise na manguas, ro ma ia! Jana sanga ise na marpor ni roha, dibuat ma aek na mangalehen hangoluan i so pola mangalehen bagi aha panggararna!