2 TESSALONIKA 2:2 - BIBEL JAMITA NA DENGGAN

² Ulang ma manigor ganggu sanga tarsonggot rohamunu hara ni angka barita na mandok, na dung ro Ari Ni Tuhan i. Betak sian na hasusuran do haroro ni barita i sanga na nidok halak sajo do; sanga betak na adong do halak na mandok jungada hami suratkon songon i di suratnami.

2 TESSALONIKA 2:2 ပူးပေါင်းရင်းမြစ်များ

JESAYA 26:3

Dilehen Ia do dame dohot hasonangan tu halak na togu rohana, hara ni na porsaya ia tuSia.

JESAYA 7:2

Di na tarbege tu si Ahas raja ni Juda na masuk tentara ni Siria tu luat ni Israel, gabe sun ma biar ni rohania dohot bangsona, jabat humitir halahi songon bona ni hayu na niombus ni alogo.

MIKA 2:11

Sugari ro sahalak na sai margabus, ‘Paboanku ma hasurirangon tu hamu, taringot tu anggur dohot arak.’ Jadi ia do na patut manyurirangi tu bangso on!”

MATEUS 24:24

Harana, marroan do disi angka kristus pargabus dohot angka panurirang pargabus. Patupaon ni halahi ma angka pambaenan na luar biasa dohot angka na pahomang roha laho paoto-otohon halak. Sugari tarbaensa, dohot bangso ni Debata i pe giot paoto-otoon ni halahi muse do.

MARKUS 13:7

Muda dibege hamu sora ni na marporang dohot angka barita ni porang, ulang mabiar hamu. Angkon masa do sisongon i. Tapi nada podo hasidunganna.

LUKAS 21:19

Muda martahan hamu jana sobar, dapotan ngolu ma hamu.”

LUKAS 21:9

Ulang pola mabiar muse hamu umbege barita taringot tu angka porang dohot hagaoran. Angke angkon jolo masa do sudena i. Tapi i pe nada na giot ari parpudi dope.”

JOHANNES 14:1

Didok Jesus ma, “Ulang pola marsak rohamunu. Porsaya ma hamu tu Debata jana porsaya ma hamu tu Au.

JOHANNES 14:27

Hasonangan do Hutadingkon di hamu. Hasonangan na sian Au sandiri do na Hulehen tu hamu. Nada songon pangalehen ni portibi on anggo pangalehenKu hasonangan i tu hamu. Ulang pola susa rohamunu; ulang hamu mabiar.

1 KORINTUS 1:8

Patoguon ni Kristus do rohamunu lopus tu ujungna, jadi muda ro Ia mangulahi, nada adong be na martihas di hamu.

1 KORINTUS 14:32

Dibaen anggo tondi ni panurirang mangoloi do tu panurirang i.

1 KORINTUS 7:26

Marnida ragam ni hasusaan na ro di hatiha on, anggo ning rohangku gumonan do sugari laing songon na adong sisaonnari on ngolu ni halak.

EPESUS 5:6

Ulang jabat tarpaoto-oto hamu dibaen angka pangkataion na rumar. Angke angka pangalaho na songon on ma mambaen muruk Debata tu angka halak na so ra mangoloi Ia.

1 TESSALONIKA 3:3

anso ulang adong sahalak pe sian hamu na dumaol-daol hara ni angka parkancitan on. Hamu sandiri pe diboto hamunu do na nitontuhon ni Debata hian do angka parkancitan i gabe bagianta.

1 TESSALONIKA 4:15

Taringot tusi, songon on do na niajarkon ni Tuhan sipasahatonnami tu hamu: Anggo di haroro ni Tuhan Jesus, hita angka na mangolu dope, nada tarbaen manjoloi angka na dung parjolo monding i.

1 TESSALONIKA 5:2

Angke hamu sandiri pe tangkas do i diboto hamu, songon haroro ni panangko borngin do anggo haroro ni Ari Ni Tuhan i.

2 TESSALONIKA 2:15

Antong hamu ale angka dongan, sai tongtong ma hamu burju jana togu marsitiopan tu pangajaran na dung hami pasahat tu hamu markite-hite hata bope dohot suratnami.

2 TESSALONIKA 3:17

Tabe sian au, si Paulus. Na nisurat ni tanganku sandiri do on. Songon on ma tandana disude angka suratku.

HALUMBAAN 19:20

Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang.