2 TESSALONIKA 2:10 - BIBEL JAMITA NA DENGGAN

¹⁰ Pakeonnia ma sude bisuk na jahat laho paliluhon angka jolma na giot tu hamagoan. Uhumon ma halahi hara ni na so ra manjagit jana nada ringkot roha ni halahi di barita na sintong i na sian Debata, na tuk nian paluahon halahi.

2 TESSALONIKA 2:10 ပူးပေါင်းရင်းမြစ်များ

PODA 1:7

Laho maruli habisuhon angkon jumolo halak marpangkilalaan sangap dohot biar maradopkon Tuhan. Layas do roha ni halak na oto maradopkon habisuhon jana nada ra i niajaran.

PODA 8:17

Huhaholongi do na marholong ni roha di au; na manjalahi au, gabe dapot ia do au.

MATEUS 13:11

Dialusi Jesus ma, “Harana, tu hamu do por roha ni Debata paboahon sitabunian ni harajaanNia. Anggo tu na asing i, nada.

JOHANNES 3:17

Harana nada anso manguhumi portibi on umbaen na nitongos ni Debata AnakNia i tu tano on, tapi anso gabe Sipalua ni portibi on do.”

JOHANNES 5:34

Hupajojor pe i sudena, nada hara ni na porlu di Au hasaksian sian jolma, tapi anso dipalua do hamu.

SURAT NI SI PAULUS TU PARLAGUTAN ROM 10:1

Ale angka dongan, anggo pangidoan ni rohangku dohot tangiangku tu Debata anso dipalua halahi nian.

SURAT NI SI PAULUS TU PARLAGUTAN ROM 16:18

Harana anggo halak sisongon i nada tu Kristus Tuhanta i halahi markarejo, tapi laho palalu na di roha ni halahi sajo do. Markite-hite hata na lambok jana na tabo begeon, dipaoto-oto halahi do angka halak na bulus roha.

SURAT NI SI PAULUS TU PARLAGUTAN ROM 6:17

Tapi tarimakasi ma di Debata! Harana hatoban ni dosa do hamu najolo hape anggo saonnari sian sandok rohamunu dioloi hamu impola ni pangajaran na sintong na dung nipasahat tu hamu.

1 KORINTUS 1:18

Harana anggo di halak na hona uhum ni Debata, songon haotoan do barita taringot tu hamamate ni Kristus di parsilang i. Tapi anggo di hita na nipalua ni Debata, kuaso ni Debata do barita i.

1 KORINTUS 16:22

Sanga ise na so manghaholongi Tuhan Jesus, padiar ma diuhumi Debata ia. Maranatha – sigop ma Ho ro, Tuhan!

2 KORINTUS 11:13

Angka rasul na so tutu do i. Angka parkarejo na paoto-oto halak do i na pasuman-sumankon songon rasul ni Kristus.

2 KORINTUS 11:15

Jadi nada pola homang be roha muda dipasuman-suman angka pangoloi ni Sibolis i songon angka pangoloi na mambaen hatigoran. Anggo ujungna jagiton ni halahi do na hombar tu sude pangalaho ni halahi.

2 KORINTUS 2:15

Dibaen songon uap na huskus ni Kristus do hami adop Debata di tonga-tonga ni angka na dapotan haluaan, bope di tonga-tonga ni angka na giot kehe tu hamagoan i.

2 KORINTUS 2:17

Nada songon halak na asing anggo hami, na mambaen jamita na sian Debata i songon barang sigadison sajo. Polin do tujuannami, harana Debata do na marsuru hami markarejo. Jana diida Debata sandiri do hami songon naposo ni Kristus pasahat jamita i.

EPESUS 4:14

Jadi nada be dakdanak hita na so marhatontuan jana na taroban-oban tu jae tu julu baenon ni angka pangajaran na marragam rupa na sian halak na bisuk. Lilu do halak dibaen halahi hara ni malo-malo ni halahi.

1 TESSALONIKA 2:16

Dilarang halahi muse dope hami manjamitahon barita haluaan i tu angka bangso na asing. Jadi di na songon i, laing dipupu halak Jahudi do patamba-tamba dosana gabe mur martimbun lalu tu langit. Jana ujungna saonnari dondonan ni rimas ni Debata ma halahi!

2 TESSALONIKA 2:12

Jadi gabe hona uhum ma sudena halak na mangkagioti dosa dohot na so porsaya tu na tutu i.

2 TESSALONIKA 2:13

Hamu angka dongan na nihaholongan ni Tuhan! Angkon sai tongtong do mandok tarimakasi hami tu Debata hara ni hamu, angke sian mulana madung dipili Debata hian hamu gabe halak sipaluaon. Sian parkarejoan ni Tondi Parbadia, di tonga-tongamunu do sudena i tarjadi laho mambaen hamu gabe halak na ias di Debata, boti hara ni haporsayaanmunu tu jamita na tutu i na sian Debata.

1 TIMOTEUS 2:4

GiotNia ulang so nipalua halak sudena jana rap umboto di na sintong,

IBRANI 3:13

Jadi, anso ulang adong sanga ise sian hamu na hona tipu dibaen dosa, na mambaen gabe mangalo tu Debata, angkon marsipaingotan do hamu sama hamu ganop ari salolot mangolu hita di hatiha na nidok “Sadari on” di Buku Na Badia i.

2 PETRUS 2:12

Hape anggo angka guru pargabus i, songon binatang na so marakal do halahi, na tubu sian bakona, anso nitangkup jana nisambol. Inda marpikir halahi; na nionjar ni bakona sajo do na nibaen ni halahi, gabe incak-incak sajo ma didok halahi laho mangalo sude angka na so niastuan ni halahi. Hara ni angka parange ni halahi sandiri, angkon magete halahi songon binatang panyoro.

2 PETRUS 2:18

Sian angka pangkobarion ni halahi na mardongan lancap jana na rumar i dipake halahi ma hagiot na jat laho mangaronjomkon halak sanga ise na baru malua sian angka na mardalan dihaliluon di ngoluna.