2 TESSALONIKA 1:3 - BIBEL JAMITA NA DENGGAN

³ Angkon sai tongtong do hami mandok tarimakasi tu Debata hara ni hamu ale angka dongan. Jana songon i do na patut baenonnami, angke mur porsaya do hamu tu Kristus jana mur marsihaholongan do hamu sude sama hamu.

2 TESSALONIKA 1:3 ပူးပေါင်းရင်းမြစ်များ

JOB 17:9

Angka halak na denggan dohot na so marsala, mur marpos ni roha di pardangolan ni ngoluna na tumbuk tu Debata.

MASMUR 84:7

Gogo ni halahi mur martamba, dompak na mardalan tu Sion laho mangadop tu Debata.

MASMUR 92:13

Tudos do halahi tu hayu na disuan di Bagas Ni Tuhan, jana manyarmak di Bagas Ni Debatanta;

PODA 4:18

Songon parbincar ni mataniari do anggo dalan na nibolus ni halak na denggan; mur lolot mur torang, jana ujungna ari pe gabe torang sajo.

LUKAS 15:32

Tapi anggo saonnari na patut do hita mambaen pesta jop ni roha, angke na dung mate do anggimi, hape saonnari mulak mangolu; madung lilu ia, hape saonnari madung mulak.’ ”

LUKAS 17:5

Didok angka rasul i ma tu Tuhan i, “O Tuhan, patogu ma haporsayaannami.”

JOHANNES 15:2

Diambungkon Ia do sude rantingKu na so marbatu; jana sude ranting na ramos dipaias Ia do anso mur ramos muse batuna.

SURAT NI SI PAULUS TU PARLAGUTAN ROM 1:8

Jumolo ma hudok tarimakasi tu Debatangku markite-hite Jesus Kristus hara ni hamu sudena; harana madung tarbonggal haporsayaanmunu tu sude portibi on.

1 KORINTUS 1:4

Sai tongtong do au mandok tarimakasi tu Debata hara ni hamu, dibaen madung dijagit hamu basa-basa na sian Debata markite-hite Jesus Kristus.

2 KORINTUS 10:15

Astuanna na hami dok disi, nada pagodang diri hami hara ni karejo ni halak na asing na di ruar ni batas na nitontuhon ni Debata di hami. Tapi sai mur martamba ma haporsayaanmunu, anso mur bidang tohap sikarejohonnami di tonga-tongamunu, haru pe laing tong dope di bagasan batas na nitontuhon ni Debata tu hami.

EPESUS 5:20

Mandok tarimakasi ma hamu tu Debata Ama i markite-hite Jesus Kristus Tuhanta i, sanga hara ni aha pe.

PILIPPI 1:7

Sai tongtong do di bagasan rohangku hamu sude. I do tutu tamana muda pe songon i pangkilalaanku taringot tu hamu. Angke na rap maruli do hamu sudena dohot au di silehen-lehen na nipasahat ni Debata di au; bope saonnari dompak tarhurung au sanga pe hatiha di ruar au laho mambela dohot mampartahankon Jamita Na Denggan i.

PILIPPI 1:9

On do tangiangku salaho tu hamu: Anso nian mur mabagas holong ni rohamunu mardongan parbinotoan na sintong bope dohot panatapan na tumbuk,

1 TESSALONIKA 3:12

Sai dipabahat, jana dipalobi Tuhanta ma holong ni roha di hamu sama hamu, bope mida ganop halak, laing songon hami mida hamu.

1 TESSALONIKA 3:6

Saonnari madung mulak si Timoteus jana madung dipalalu ia barita jop ni roha taringot tu haporsayaan dohot holong ni rohamunu. Pandoknia tu hami, denggan do parningotanmunu taringot tu hami di bagasan rohamunu. Jana por do rohamunu sugari mida hami, laing songon por ni rohanami sugari mida hamu.

1 TESSALONIKA 3:9

Nada tuk pamangannami laho pajojorkon sanga na bia godang ni hatarimakasionnami tu Debata hara ni sude hamogaan na hami jagit di jolo ni Debata hara ni hamu.

1 TESSALONIKA 4:1

Dung i muse ale angka dongan, ihutkon hamu ma pangajaran na nijagitmunu sian hami sanga bia na patut ngolumunu laho pasonangkon roha ni Debata. Tutu nian saonnari pe madung songon i ngolumunu. Tapi saonnari mangasahon kuaso ni Tuhan Jesus gomos hami pangido jana hami sosoi hamu anso mur marsitutu hamu mangkaburjuhon i!

2 TESSALONIKA 2:1

Taringot tu haroro ni Tuhanta Jesus Kristus, bope taringot tu hita na giot palagutonNia anso rap dohot Ia, on ma na hupangido dohot gomos sian hamu:

2 TESSALONIKA 2:13

Hamu angka dongan na nihaholongan ni Tuhan! Angkon sai tongtong do mandok tarimakasi hami tu Debata hara ni hamu, angke sian mulana madung dipili Debata hian hamu gabe halak sipaluaon. Sian parkarejoan ni Tondi Parbadia, di tonga-tongamunu do sudena i tarjadi laho mambaen hamu gabe halak na ias di Debata, boti hara ni haporsayaanmunu tu jamita na tutu i na sian Debata.

1 PETRUS 1:22

Hara ni na nioloanmunu ajaran na sian Debata, gabe dipaias hamu dirimunu jana holong do rohamunu mida angka halak na porsaya tu Kristus. Antong, marsihaholongan ma hamu sama hamu sian sandok rohana be.

2 PETRUS 1:13

Salolot mangolu au, na patut do huhilala manyungguli hamu taringot tusi.

2 PETRUS 3:18

Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.