2 SAMUEL 18:9 - BIBEL JAMITA NA DENGGAN

⁹ Dompak mangalombut bagalnia si Absalom, ompot ma marsuo ia dohot parangan ni si Daud. Mamolus bagalnia i di toru ni hayu na godang, jana sangkot ma ulu ni si Absalom di sada dangka. Marlojong torus bagalnia i, gabe tinggal ma si Absalom disi laing gantung-gantung.

2 SAMUEL 18:9 ပူးပေါင်းရင်းမြစ်များ

2 SAMUEL 13:29

Dipatulus angka naposonia ma parenta ni si Absalom i jana dibunu halahi ma si Amnon. Marnida i, marsitengget bagalna be ma angka anak ni si Daud na deba nari i palua dirina.

2 SAMUEL 14:26

Obuknia na bolbolan, jana angkon pangkasonnia do i sanoli sataon, angke maginjangtu jana maborattu dihilala ia. Lobi do dua kilo borat ni obuknia na digusting i mangihutkon timbangan ni raja.

2 SAMUEL 17:23

Dung diida si Ahitofel na so diihutkon hatania i, dipasang ia ma palano ni halodenia, lalu mulak ma ia tu kotania sandiri. Dung dipasidung ia sude urusannia, manyingkot ma ia lalu ditanom di kuburan ni halahi sahorong.

2 SAMUEL 18:10

Adong ma sada sian parangan ni si Daud i marnida si Absalom na gantung-gantung i di hayu na godang i jana dipaboa ia ma tu si Joab, “Tuan, nangkin huida do si Absalom gantung-gantung di hayu na godang!”

2 SAMUEL 18:14

“Tuk ma i,” ning si Joab. Dung i dibuat si Joab ma tolu hujur jana ditihamkon ia ma i tu andora ni si Absalom na mangolu dope di hatiha i jana gantung di hayu i.

2 SAMUEL 18:8

Mabidang ma parporangan di luat i sude jana umbahat do na mate tarsosak di harangan i ulang pado na mate di galanggang ni porang i.

JOB 31:3

Diparo Ia do parmaraan dohot hasusaan tu halak na mambaen hajahatan.

PODA 20:20

Muda diburai ho simatobangmu, mago ma ngolumu songon lampu na mintop di borngin na golap.

PODA 30:17

Halak na mangincahi amangna sanga inangna na dung matobang, patutna do disampakkon tu ruar anso diturbing sigawak matana i jana dipangan rajawali bangkena i.

JEREMIA 48:44

Halak na malua sian ogor-ogor madabu ma i tu bagasan lubang, jana halak na haruar sian lubang i, alit muse ma i baenon ni jorat. Tarjadi do sudena i hara ni na dung Hutontuhon hatihana laho mangaroncohon Moab.

MATEUS 27:5

Gabe disampakkon ia ma hepeng perak i tu Bagas Ni Debata, dung i kehe ma ia manyingkot.

MARKUS 7:10

Na he ma didok si Musa hian do, ‘Pasangap ma amangmu dohot inangmu,’ jana ‘Sanga ise na palayaskon amangna dohot inangna, angkon mate ma niuhuman i.’

GALATIA 3:13

Madung ditobus Kristus hita sian bura ni Tona i, markite-hite na gabe bura hara ni hita, angke tarsurat do, “Na hona bura do sanga ise na hona gantung di hayu parsilang.”

PANGARATAION 21:23

nada tola padiaron bangke i disi saborngin i, tapi angkon di na sadari i do i kuburkonon, angke mangalap uhum ni Debata do bangke na gantung di tiang i. Dikuburkon ma bangke i anso ulang dipahodar hamu tano na giot silehenon ni Tuhan Debatamunu i di hamu.

PANGARATAION 27:16

‘Bura ni Debata ma di halak na palayas amangna dohot inangna.’ Dung i sude ma bangso i mandok: ‘I ma tutu!’

PANGARATAION 27:20

‘Bura ni Debata ma di halak na palayas amangna di na marcampur dohot sada sian ripe ni amangna.’ Dung i sude ma bangso i mandok: ‘I ma tutu!’