2 SAMUEL 16:21 - BIBEL JAMITA NA DENGGAN

²¹ Dialusi si Ahitofel ma, “Kehe ma raja i mandapotkon angka rading na nitadingkon ni amang ni raja i manjago bagas godang i, jana rap modom ma dohot halahi. Jadi gabe botoon ni Israel ma sude marhite pangalaho i, na dung dietong ni amanta hamu do musuna raja i. Jadi gabe mur barani ma sude angka na mangihut tu daulat i.”

2 SAMUEL 16:21 ပူးပေါင်းရင်းမြစ်များ

PAMUNGKAAN 34:30

Dung i didok si Jakob ma tu si Simeon dohot si Levi, “Dibaen hamu do hasusaan tu au. Saonnari gabe sihagigian ma au di halak Kanaan dohot halak Peris dohot sude pangisi ni luat on. So na sadia halakta; jadi ampot sai saroha halahi sude mangalo au jana manyerang au, harom ma sude hita na sabagas.”

PAMUNGKAAN 35:22

Di inganan i ma dipodomi si Ruben rading ni amangnia na margoar si Bilha. Tarbege ma i tu si Jakob, gabe muruk situtu ma ia. Dua bolas anak ni si Jakob.

PAMUNGKAAN 38:16

Jadi didapotkon si Juda ma ia di topi dalan i jana didok ia ma, “Sadia dipangido ho?” (Nanggo diboto ia na parumaenna i sandiri do anak boru i.) Disapai si Tamar ma, “Aha dehe na giot lehenonmu di au?” ning ia.

PAMUNGKAAN 6:4

Di hatiha i ma, dohot dung salpu ni i adong angka jolma raksasa di tano on; i ma pomparan ni angka dadaboru sian jolma dohot angka “anak ni Debata” i. Angka ulubalang na godang-godang do jolma raksasa i boti jolma na tarbarita di hatiha narobi.

2 SAMUEL 10:6

Torang ma diboto halak Amon na dung gabe musu ni halahi si Daud. Jadi diongkos halahi ma dua pulu ribu tentara ni Siria na adong di Bet-Rehob dohot si Zoba songon i muse dua bolas ribu tentara na sian Tob, dohot raja ni tano Maaka rap dohot saribu halak paranganna.

2 SAMUEL 12:11

Husumpahon ma angkon paroonKu sori mago tu ho na ro sian tonga-tonga ni pangisi ni bagasmu sandiri. BuatonKu ma angka dadaborumu di jolo ni matamu jana lehenonKu ma i tu halak na asing na mangangkupi halahi modom di arian raya.

2 SAMUEL 13:5

Dung i didok si Jonadab ma tusia, “Modom ma ho di podoman, tarsongon na marnyae. Muda ro amanta mangaligi ho, dokkon ma tusia, ‘Paloas ma jolo amang ro si Tamar mangalehen au mangan. Anggo tarbaen do mangaligi ia mangalompa sipanganon i dison, lobas au ma mangan.’ ”

2 SAMUEL 15:16

Jadi kehe ma raja i didongani sude pangisi ni bagasna maradu pagawena, asing ni radingnia sisampulu halak na ditadingkon laho manjago bagas godang i.

2 SAMUEL 16:20

Dung i didok si Absalom ma tu si Ahitofel, “Paboa ma sanga aha sipatupaonta.”

2 SAMUEL 17:7

Dialusi si Husai ma, “Anggo sanoli on, nada denggan usul ni si Ahitofel i.

2 SAMUEL 2:7

Sai gabe angka jolma na gogo-gogo ma hamu jana na togap mangalo. Madung marujung ngolu ni si Saul rajamunu i, jana madung dimiahi halak Juda au gabe raja ni halahi.”

2 SAMUEL 20:3

Dung lalu si Daud di bagas godangnia na di Jerusalem i, dibaen ia ma rading sisampulu halak na nitadingkon i manjago bagas godang i di bagasan sada bagas na dijago ni pangawal. Tuk do dibaen na porlu di halahi, tapi nada jungada be si Daud modom rap dohot halahi. Jadi gabe dipingit ma halahi jana songon na mabalu noma ngolu ni halahi lopus mate.

1 RAJA-RAJA 11:25

Laing songon si Hadad, marmusu muse ma Raja ni Siria tu Israel di hatiha ngolu ni si Salomo jana manggaori halahi di luat i.

1 RAJA-RAJA 2:17

“Aha ma pangidoanmi?” ning si Batseba manyapai. Dialusi si Adonia ma, “Pangidoanku anso kehe jolo ho inang mangido tu Raja Salomo, anso diisinkon ia marbagas au dohot si Abisag boru sian Sunem i. Porsaya do au nada tulahon ni si Salomo pangidoan ni inang i.”

1 RAJA-RAJA 2:22

“Biasi ho inang mangido na songon i tu au?” ning si Salomo manyapai. “Dos do i muda dipangido ho inang habangsa on disia. Nada he angkangku do ia? Dung i Malim Abyatar dohot si Joab sabola sian ia do!”

HAMALIMON 18:8

Ulang palayas amangmu marhite na marcampur dohot sada halak sian angka dadaborunia na asing.

HAMALIMON 20:11

Sada halaklahi na marcampur dohot dadaboru ni amangna, gabe parohon tilako tu amangna. Halaklahi bope dadaboru i angkon mate uhumon. Hamamate ni halahi hara ni hasalaan ni halahi sandiri.

ZAKARIA 8:13

Jana na jolo madung manjadi bura hamu di tonga-tonga ni angka bangso, o hamu halak Juda dohot halak Israel. Jadi saonnari giot paluaonKu noma hamu, anso gabe pasupasu hamu. Ulang hamu mabiar, patogu ma rohamunu!”

1 KORINTUS 5:1

Satutuna madung lalu tu au paboahon na adong deba sian hamu marpangalaho na so ture; adong sian hamu na pardadaboruhon na nialap ni amangna. Hape halak na so mananda Tuhan pe nada ra mambaen na songon i!

1 SAMUEL 13:4

Dipabotohon ma tu sandok bangso Israel bahaso na dung dibunu si Saul panglima ni Pilistin dohot na goyak sajo roha ni halak Pilistin di halak Israel. Jadi gabe dioloi rayat i ma pio-pio i laho mardomu rap dohot si Saul di Gilgal.

1 SAMUEL 27:12

Tapi pos do roha ni si Akhis di si Daud jana didok ia di bagasan rohania, “Songon i ma antong santakna goyak ni roha ni bangsonia sandiri tusia, lopus tarpaksa gabe naposongku ia sapanjang di ngolunia.”