2 SAMUEL 15:10 - BIBEL JAMITA NA DENGGAN

¹⁰ Tapi painte so i na dung disuru ia humani do angka suruannia tu sude marga ni Israel maroban tona, “Muda dibege hamu sora ni sarune, pio-pio ma hamu mandok, ‘Madung gabe raja si Absalom di Hebron!’ ”

2 SAMUEL 15:10 ပူးပေါင်းရင်းမြစ်များ

2 SAMUEL 13:28

Diparentahon ia ma tu angka naposonia songon on, “Parate-atehon hamu denggan, muda dung mabuk si Amnon hara ni na minum anggur, hulehen pe tandana, bunu hamu ma ia. Ulang mabiar hamu. Au sandiri do na martanggung jawab di pangalaho on. Ulang ganggu-ganggu rohamunu tapi baen hamu mardongan habaranion!”

2 SAMUEL 14:30

Dung i didok ia ma tu angka naposonia, “Diboto hamu dehe ladang ni si Joab na di hombar ni ladangku panyuanan ni bajaure i? Kehe ma hamu, surbu hamu ma ladangna i.” Jadi kehe ma halahi manyurbusa.

2 SAMUEL 15:9

Dialusi raja i ma, “Antong kehe ma ho.” Dung i kehe ma si Absalom tu Hebron.

2 SAMUEL 19:10

Tamiahi si Absalom gabe raja, hape ma mate ia di parporangan. Biasi nada adong hum sahalak pe na marusaho maroban mulak Raja Daud?”

2 SAMUEL 2:1

Dung i marsapa ma si Daud tu Tuhan, “Diparhagiot rohaMu do Tuhan kehe au tu Juda mangarajai sada kota na adong disi?” “Olo,” ninna Tuhan mangalusi. “Kota dia ma i?” ning si Daud manyapai. “Hebron,” ninna Tuhan.

2 SAMUEL 2:11

jana di Hebron do si Daud mamarenta di Juda, pitu satonga taon honokna.

2 SAMUEL 5:5

Di Hebron pitu satonga taon honokna ia mamarenta Juda, jana di Jerusalem diparenta ia sudena Israel dohot Juda tolu pulu tolu taon honokna.

1 RAJA-RAJA 1:11

Kehe ma si Natan manopot si Batseba, inang ni si Salomo, mandok tusia, “Nada he dibege na mora i, na dung diangkat si Adonia anak ni si Hagit i dirinia gabe raja, salang Raja Daud nada diboto ia bagi aha taringot tuson?

1 RAJA-RAJA 1:34

Disi ma diojakkon si Zadok dohot si Natan ia gabe raja ni Israel. Dung i palu hamu ma sarune lalu marsurak, ‘Horas ma di Raja Salomo!’

2 RAJA-RAJA 9:13

Manigor marsibuat jubana ma angka dongan-dongan ni si Jehu; jana dipahembang halahi ma di tangga i di jolo ni si Jehu, jana marsarune ma halahi lalu marsurak, “Si Jehu noma rajanta!”

1 JUJUR TAON 11:3

Dibaen si Daud ma parjanjian dohot halahi di Hebron. Jadi diangkat halahi ma ia gabe raja ni Israel laing songon na nijanjihon ni Tuhan marhite sian si Samuel.

1 JUJUR TAON 12:23

Dompak di Hebron si Daud, bahat do angka parporang na malo na ro mandongani si Daud. Diurupi halahi ma ia anso tarbaen gabe raja manggontihon si Saul, songon na nijanjihon ni Tuhan. Songon on ma bahat ni halahi: Juda: 6.800 halak singkop parince dohot hujurna. Simeon: 7.100 halak na gogo boti tongam. Levi: 4.600 halak. Joyada dohot anak buania pomparan ni si Harun: 3.700 halak. Zadok, doli-doli parporang na barani songon i dohot koum sisolkotna: 22 halak na tarpatujolo. Benyamin (marga ni si Saul): 3.000 halak. Umbahat dope nian sian Marga Benyamin na mangihut tu si Saul. Efraim: 20.800 halak na godang-godang sian horong ni halahi be. Manase Hasundutan: 18.000 halak na nitodo anso dohot kehe laho mangangkat si Daud gabe raja. Isakar: 200 halak pamimpin rap dohot na nipimpin ni halahi. Angka na malo do pamimpin on manontuhon sanga aha sibaenon ni rayat Israel di hatiha na tumbuk. Zebulon: 50.000 halak na malo mamake ragam-ragam ni sinjata jana na singkop tu porang; angka halak na burju-burju do halahi jana haposan. Naftali: 1.000 halak pamimpin rap dohot 37.000 halak parajurit na marparince dohot martombak. Dan: 28.600 halak na dung tarlatih. Aser: 40.000 halak na singkop tu porang. Angka marga na di Habincaran ni Batang aek Jordan, i ma Ruben, Gad dohot Manase Parhabincaran: 120.000 halak na dung malo mamake sude ragam ni sinjata.

1 JUJUR TAON 12:38

Kehe ma sudena halahi tu Hebron di bagasan ni na dung singkop tu porang jana na dung sada rohana laho mangangkat si Daud gabe raja ni sude Israel. Jana halak Israel na deba nari i pe sudena madung saroha.