2 PETRUS 3:7 - BIBEL JAMITA NA DENGGAN

⁷ Tapi anggo langit dohot tano na saonnari on, i ma na giot abiskonon dohot api saulahon, dipauli-uli Debata dope i laing markite-hite hataNia anso nisimpan lopus dapot hatihana niuhuman jana nimatehon sudena angka jolma na so porsaya tu Debata.

2 PETRUS 3:7 ပူးပေါင်းရင်းမြစ်များ

MASMUR 102:26

Sude do i angkon mago, hum Ho do na sai hot; songon pakean sude do angkon mumut songon baju na buruk ambungkononMu noma i, gabe mago ma sudena i.

MASMUR 50:3

Na ro ma Debatanta, nada be so sajo Ia, dijoloani api na marjilam-jilam do Ia, jana dihaliangi habahaba na gogo.

JESAYA 51:6

Tatap ma tu langit, tailihon ma tu tano, mago ma langit i songon timus. Buruk do tano on songon abit, mate sude na mangingani i songon rongit. Tapi anggo haluaan na Hulehen i, hot do salolotna, hamonanganKu nada adong ujungna.

JESAYA 66:15

Giot ro ma Tuhan marhite api. Jana karetaNia songon halingsungsung, laho palaluhon rimasNa na marapi purun.

DANIEL 7:9

Di na torus au mangaligi, dihobasi ma sanga na piga habangsa. Jadi juguk ma ia Na Tongtong Mangolu i di sada sian angka habangsa i. PakeanNia dohot obukNia ias sajo mamontar songon hapas, gara-gara do habangsa i dohot angka rodana i hara ni jilam ni api.

ZEPANYA 3:8

Hara ni i painte ma Au – ninna Tuhan – di ari harorongKu jadi saksi. Harana haputusanKu i ma papunguhon angka bangso dohot harajaan anso Huusehon rimasKu na marapi purun, harana sude tano angkon abis dibaen api ni pangiburuonKu.

MALEAKI 4:1

Didok Tuhan Na Markuaso i ma, “Dapot do i arina, sude halak siginjang roha dohot na jahat surbuon ma i songon durame. Di ari i, abis ma halahi surbuon, jana nada adong be na tinggal sian halahi.

MATEUS 10:15

Satutuna ma na hudok on! “Numayang do taonon ni isi ni tano Sodom dohot Gomora di ari panguhuman i, ulang kota na songon i!”

MATEUS 11:22

Tapi Hudok ma tu hamu, ‘Numayang do uhuman na tu kota Tirus dohot Sidon di ari panguhuman i, ulang pado tu hamu!’

MATEUS 11:24

Tapi Hudok ma tu hamu, ‘Numayang do uhuman na tu tano Sodom di ari panguhuman i, ulang pado tu ho!’ ”

MATEUS 12:36

Tapi Hudok ma tu hamu, Angkon dialusi halak i do sogot di ari panguhuman i taringot tu sude hata na so hasaya, na ruar sian pamangan ni halahi.

MATEUS 24:35

Anggo langit dohot tano on mago do, tapi anggo hatangKi angkon hot do salolot-lolotna.”

MATEUS 25:41

Dung i didok Raja i ma tu halak na di siambirangNia i, ‘Morot ma hamu sian on, hamu angka na hona bura! Masuk ma hamu tu api na so ra mintop na niparade di Sibolis dohot di angka surusuruanna!

MARKUS 6:11

Tapi muda lalu hamu tu sada inganan hape inda ra halak na disi i manjagit hamu dohot manangihon hamu, morot ma hamu sian inganan i. Paspaskon hamu ma abuan na di palakpak ni patmunu i gabe songon parningotan di halahi!”

JOHANNES 12:48

Saulahon, adong do na manguhumi sanga ise na so ra manjagit Au jana na so ra patuluskon angka na Hudok. Jamita na Hupalalu i do na gabe panguhum maradopkon halahi di Ari Parpudi.

SURAT NI SI PAULUS TU PARLAGUTAN ROM 2:5

Tapi hara ni jogal ni rohamu na so ra muba, ditamba ho do rimas tu dirimu sandiri di ari haririmas dohot hapataran ni uhuman ni Debata na tigor i.

1 KORINTUS 3:13

Muda ro saulahon Kristus, disi pe anso tarida parkarejoan ni halahi be. Harana api paruhuman do pataridahon karejo ni ganop be. Api i ma na manguji jana manontuhon hadengganan ni karejo i.

PILIPPI 1:28

Angkon puluk do hamu tongtong; ulang mabiar hamu mida angka alomunu. I ma tandana di halahi, paboa na angkon talu halahi jana hamu ma na monang. Angke Debata sandiri do na mambaen hamu gabe monang.

2 TESSALONIKA 2:3

Sanga na bia pe i, ulang jabat tartipu hamu dibaen halak. Angke painte so dapot Ari i, angkon jolo masa do na songon on: Bahat ma halak marbalik sian Kristus, jana tangkas ma tarida Jolma Na Jahat na dung ditontuhon hian tu api narako.

1 TIMOTEUS 6:9

Tapi sanga ise angka halak na giot kayo, targoda jana hona jorgong ma i dibaen hagiot na oto na marragam rupa boti na manyegohon. Angka hagiot na songon i ma na mangalantuk dohot na mangagohon halak.

IBRANI 12:29

Angke songon api na mangabiskon do tutu anggo Debatanta i.

2 PETRUS 2:9

Jadi anggo taringot tu angka halak na mangihutkon hagiot ni Tuhan, diboto Tuhan do sanga na bia dalanna baenonNia laho paluahon halahi sian angka ujian na masa tu halahi. Jana taringot tu angka jolma na jahat pe, diboto Tuhan do manabunihon halahi anso hona siksa di Ari Paruhuman,

2 PETRUS 3:10

Tapi anggo Ari haroro ni Tuhan na padua nolihon i, songon haroro ni panangko do i. Anggo di Ari i mago ma langit mardongan sora na gogo, jana mosok ma sude angka na adong di langit jana mago muse ma tano on dohot sude isina.

2 PETRUS 3:12

salolot painte-intehon jana na patibuhon haroro ni Ari Ni Debata i hamu. Abis ma mosok sudena di Ari i sandok langit i, jana hara ni milasna gabe malala ma gabe songon aek sandok na adong di langit i.

1 JOHANNES 4:17

Sanggam do holong ni roha i dipatupa di bagasan dirinta anso marpos ni roha hita di Ari Paruhuman i, harana tudos songon Ia, hita pe di portibi on do.

JUDAS 1:7

Laing ingot hamu ma kota Sodom dohot Gomora dohot angka kota na humaliang i, na niinganan ni halak angka na mambaen pangalaho songon na nibaen ni angka surusuruan i. Angka pangalaho na rorang dohot na mangoloi hagiot ni sibukna do dipambaeni halahi, gabe hona uhum ma halahi dohot api na so ra mintop, baen sipaingot tu halak sudena.

HALUMBAAN 17:11

Jana binatang na jungada i mangolu tapi na so adong i be saonnari, ia sandiri do raja na pasalapankon jana bope songon i sada sian na pitu i kehe ma tu hamagoan i.

HALUMBAAN 17:8

Anggo binatang na dung niidami madung adong do i, tapi nada adong, na giot manaek ma ia sian rura hamatean anso kehe ma ia tu hamagoan. Jadi homang ma roha ni angka na maringanan di tano on, i ma angka na so tarsurat goarna di buku hangoluan sian mula-mula ni hasiangan on, muda diida halahi binatang i na dung adong, tapi nada adong, jana na giot ro muse.

HALUMBAAN 20:11

Dung i huida ma sada habangsa na godang, jana na bontar. Huida muse do Ia na juguk di habangsa i. Mago ma langit dohot tano sian joloNia lopus nada haidaan.

HALUMBAAN 21:1

Jadi huida ma sada langit na imbaru dohot tano na imbaru. Mago ma langit na parjolo dohot tano na parjolo i jana laut pe, mago ma.