2 PETRUS 2:21 - BIBEL JAMITA NA DENGGAN

²¹ Na gumonan hian do indangkon jungada ditanda angka jolma na songon i dalan na tigor na sian Debata i, ulang pado ditanda halahi hape dung salpu i nada ra halahi mangoloi angka parenta na nilehen ni Debata tu halahi.

2 PETRUS 2:21 ပူးပေါင်းရင်းမြစ်များ

MASMUR 125:5

Tapi muda diuhum Ho halak na jahat, uhumi muse ma sanga ise na manyimbil sian dalanMu. Sai horas torkis ma bangsoMi!

MASMUR 85:8

Giotku ma manangihon hata ni Tuhan Debata, dibaen madung dijanjihon Ia pardamean tu hita, bangso na nihaholonganNia, muda tatadingkon antong angka dosanta.

PODA 12:28

Hasintongan do dalan tu hangoluan; tapi tu hamatean do dalan ni na jahat.

PODA 16:31

Halak na jujur maruli umur na ginjang; ubanna i songon tuku na marsinondang.

JEHESKIEL 18:24

Tapi muda adong sada halak na burju na so mambaen na denggan be, jana na mambaen hajahatan dohot sude pangalaho si hagigian na dihasomalkon ni halak na jahat, torus ma he ia mangolu? Nada! Sada pe sian angka pambaenannia na denggan i, nada adong be siingoton. Mate noma ia patunda ni na mambaen dosa dohot hara ni na so burju tu Au.

JEHESKIEL 23:13

Nada ture Huida si Oholiba i laing songon i angkangna i.

JEHESKIEL 3:20

Muda dipungka sada halak na burju mambaen dosa, jana Hupaadop ia tu batu partuktuhan, mate ma ia. Hara ni na so dipaingot ho ia, mate ma ia di bagasan dosana, jana angka pangalahonia na denggan i nada ingotonKu be i. Tapi anggo patunda ni hamamatenia, sian ho do i tungguonKu.

JEHESKIEL 33:13

Bolas jadi do na dung Hujanjihon laho paluahon halak na burju i, tapi anggo dipungka ia do mambaen dosa jana diarop rohania giot paluaonKu ia hara ni hadengganannia na salpu i, sala do ia disi. Nada paingot-ingotonKu be hadengganan na dung unjung dibaen ia jana mate noma ia hara ni angka dosania i.

ZEPANYA 1:6

AbiskononKu ma halahi na so ro tu Au sanga na so mangido panogu-noguon tu Au dohot na dung marbalik manadingkon Au jana na so ra be mangihutkon Au.”

MATEUS 21:32

Haru madung ro si Johannes Pandidi paboahon dalan na tutu tu hamu, hape nada ra hamu manghaporsayai na nidoknia. Hape anggo angka sijagit pajak dohot angka anak boru siparkarosuan, ma pola porsaya disia. Haru pe na dung diida hamu sudena i, hape laing so dipauba hamu dope rohamunu manghaporsayai ia.”

LUKAS 12:47

Naposo na umboto hagiot ni tuanna, hape nada hobas ia jana nada dibaen ia hagiot ni tuannia i, sisambohon do i sagogona.

JOHANNES 15:22

Sugari sura na so jungada Au ro jana nada unjung Huhatahon sudena i tu halahi, nada tarsalahon halahi. Tapi anggo saonnari nada adong be sidalian ni halahi taringot tu dosa ni halahi.

JOHANNES 9:41

Dialusi Jesus ma, “Anggo sugari mapitung hamu, so na mardosa hamu. Tapi hara ni na nidokmunu i, ‘Marnida do hami,’ i ma patandahon laing na mardosa hamu.”

SURAT NI SI PAULUS TU PARLAGUTAN ROM 7:12

Jadi badia do Tona i, parenta i pe badia do, tigor jana denggan.

GALATIA 6:2

Marsiurupan ma hamu mamorsan boban na dokdok i, songon i ma baen hamu patuluskon parenta ni Kristus i.

1 TESSALONIKA 4:2

Harana madung diboto hamu angka sipaingot na hami lehen i di hamu mangasahon Tuhan Jesus.

1 TIMOTEUS 6:14

Patulus ma sude na hutonahon i tu ho sian roha na ias jana ulang targora, lopus tu haroro ni Tuhanta Jesus Kristus mangulahi.

IBRANI 10:26

Harana anggo dung dipasahat do tu hita jamita na sian Debata, hape laing tapupu do tasangajo mambaen dosa, gabe nada adong sada haul pe na tarbaen manyesa dosanta.

JAKOBUS 4:17

Jadi hara ni i, mardosa do sanga ise na umboto na denggan sipatupaonnia nian, hape nada dipatulus ia.

2 PETRUS 3:2

Husosoi hamu anso diingot hamu mangulahi angka hata na nidok ni angka panurirang ni Debata nahinan, dohot parenta ni Tuhan, Kristus na nipasahat tu hamu markite-hite angka rasul.

JUDAS 1:3

Angka dongan na nihaholongan! Tutu situtu do ringgas do rohangku mambaen surat on tu hamu taringot tu haluaan na dung tadalani i. Tapi saonnari taronjar do rohangku paingot hamu markite-hite surat on anso laing torus hamu marjuang hara ni haporsayaan i na nilehen tu angka halak na badia.