2 KORINTUS 8:7 - BIBEL JAMITA NA DENGGAN

⁷ Burju do hamu di sude pangalaho. Denggan do hamu di na mangkaporsayai, di na paboahon pandapot, di parbinotoan, di ragam-ragam ni karejo, dohot di bagasan holong ni rohamunu maradopkon hami. Jadi hara ni i, angkon laing umburju muse ma hamu nian di karejo na denggan on.

2 KORINTUS 8:7 ပူးပေါင်းရင်းမြစ်များ

MATEUS 25:22

Dung i masuk muse ma naposo na manjagit sidua ribu hepeng perak i. ‘Tuan,’ ning ia, ‘dua ribu hepeng perak do na nipasahat ni tuan i tu au. Diligi tuan i ma saonnari. Maruntung do au dua ribu nari.’

SURAT NI SI PAULUS TU PARLAGUTAN ROM 15:14

Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari.

1 KORINTUS 1:5

Gabe mamora do hamu taringot tu sudena pangalaho, dung Kristus nampuna hamu. Parbinotoanmunu pe madung bagas situtu taringot tu sude pangalaho jana malo muse do hamu mangajarkon parbinotoan i.

1 KORINTUS 12:13

Angke markite-hite sada Tondi, nipandidihon do hita sude gabe sada pamatang, bope halak Jahudi bope halak Junani, bope naposo bope halak na malua. Songon i muse, nipainum do hita dohot Tondi na sada i.

1 KORINTUS 12:8

Tu na sada dilehen Tondi i do hamaloon mandok hata di bagasan habisuhon, jana tu na asing, dilehen Tondi i do hamaloon mandok hata di bagasan parbinotoan.

1 KORINTUS 13:2

Sugari malo au manyurirangi, jana huboto sude na buni dohot sude parbinotoan, jana adong di au haporsayaan jabat tarpaorot au angka dolok, tapi nada adong di au holong ni roha, songon na soada do au.

1 KORINTUS 13:8

Nada ra luntur holong ni roha i. Anggo hamaloon laho manyurirangi, di sada hatiha abis do i dibaritahon. Taringot tu hamaloon laho mangkobari di hata na marragam-ragam na so niastuan i, di sada hatiha mago do i. Taringot tu hamaloon laho mangastui sasude, sada hatiha mago do i.

1 KORINTUS 14:12

Taringot tu hamu sandiri, huboto do na por rohamunu maruli angka hasurungan sian Tondi i. Tapi anggo na dumenggan, angkon marusaho do hamu laho mamake hamaloon i, mangurupi parlagutan i tu hamajuon.

1 KORINTUS 4:7

Ise dehe na mambaen hamu marhasurungan sian na asing? Nada he na nijagitmunu do sude sian Debata? Antong biasi ma he manggodang diri hamu songon dia ma na adong di hamu songon na so nilehen i di hamu?

2 KORINTUS 7:7

Nada hum hara ni haroro ni si Titus umbaen na tarapul rohanami, tapi dohot do hara ni boa-boania na tarapul ia sandiri hara ni hamu. Pandoknia tu hami: Na lungun sajo do rohamunu marsuo dohot au; na manyosal situtu rohamunu jana saonnari sian sonang ni rohamunu giot urupanmunu ma au. Angka i ma na mambaen mur tamba jop ni rohangku.

2 KORINTUS 8:6

Hara ni i do umbaen na gomos hami sosoi si Titus – anso laing didatdati ia karejo na denggan i di tonga-tongamunu, songon na dung dipungkana hian.

2 KORINTUS 9:14

Halahi pe dioban do hamu di tangiangna, jana lungun do rohana di hamu hara ni na marningot asi ni roha na sumurung na sian Debata tu hamu.

2 KORINTUS 9:8

Bisa do Debata mangalehen pasupasu mardapot-dapot tu hamu, anso laing singkop sibaenonmunu; marlobian dope tehe tarbaen hamu mangkarejohon na denggan.

EPESUS 4:29

Muda mandok hata hamu, ulang ma pake hamu angka hata na so ture. Angka pandohan na manogu dohot na mangurupi tu dongan na asing ma pake hamu. Angka pandohan na songon i do na padenggankon tu angka dongan na umbegesa.

PILIPPI 1:11

Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

PILIPPI 1:9

On do tangiangku salaho tu hamu: Anso nian mur mabagas holong ni rohamunu mardongan parbinotoan na sintong bope dohot panatapan na tumbuk,

2 TESSALONIKA 1:3

Angkon sai tongtong do hami mandok tarimakasi tu Debata hara ni hamu ale angka dongan. Jana songon i do na patut baenonnami, angke mur porsaya do hamu tu Kristus jana mur marsihaholongan do hamu sude sama hamu.

2 TIMOTEUS 2:1

Amang Timoteus! Sai margogo ma ho hara ni asi ni roha na nilehen di hita hara ni pardomuanta i dohot Kristus.

IBRANI 12:28

Hara ni na dung tajagit harajaan na so tarhutur i, beta ma tadok tarimakasi jana mangoloi tu Debata mangihutkon angka tona na tama tuSia, mardongan sangap dohot biar.

1 PETRUS 1:22

Hara ni na nioloanmunu ajaran na sian Debata, gabe dipaias hamu dirimunu jana holong do rohamunu mida angka halak na porsaya tu Kristus. Antong, marsihaholongan ma hamu sama hamu sian sandok rohana be.

2 PETRUS 3:18

Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.

HALUMBAAN 3:17

Didok hamu, ‘Madung mamora hami jana tuk sude; sada pe nada adong be na hurangnami.’ Hape umpe diboto hamu sanga songon dia dangolmunu dohot parkancitanmunu! Na pogos do hamu, marsaemara jana na mapitung.