2 KORINTUS 8:2 - BIBEL JAMITA NA DENGGAN

² Na dung hona uji do halahi di angka hasusaan na borat situtu. Tapi di tonga-tonga ni hasusaan i pe laing marjop ni roha do halahi jana miduk do silehen-lehen ni halahi laho mangurupi halak na asing, haru pogos sajo pe halahi, tapi na mora do halahi di asi ni roha.

2 KORINTUS 8:2 ပူးပေါင်းရင်းမြစ်များ

PODA 11:25

Halak na mangalehen pasupasu, mur bahat manjagit pasupasu, halak na sai manolong, laing dapotan tolongan ia.

MATEUS 20:15

Na so tola do lakna hubaen roha-rohangku tu sinadonganku? Sanga na pis do matamu muda burju au tu halak na asing?’ ”

SURAT NI SI PAULUS TU PARLAGUTAN ROM 12:8

Halak na laho paingotkon dongan, angkon marsitutu ma paingotkon halak na asing. Halak na marsilehen-lehen na adong disia, angkon sian burju ni roha na patut ma i dibaen. Halak na mamimpin, angkon dihaburjuhon ma na mamimpin i. Halak na maribo ni roha tu na asing, angkon sian jop ni rohana do i baenonna.

SURAT NI SI PAULUS TU PARLAGUTAN ROM 2:4

Sanga na marlayas ni roha do ho di godang ni denggan basaNia, lambok dohot burju ni rohaNia? Nada he diboto ho, denggan basa ni Debata do maroban ho tu haubaan ni roha?

2 KORINTUS 1:12

Anggo na pagodang rohanami on do: Dipapos taroktoknami do rohanami taringot tu sude na hami karejohon di tano on – lumobi na marpardomuan tu hamu – sian roha na ias jana na polin na sian Debata do hami baen i sudena, nada sian habisuhon ni portibi, tapi sian asi ni roha ni Debata do.

2 KORINTUS 2:9

Hubaen pe surat i tu hamu, laho manguji rohamunu do au sanga na tongtong do hamu ra mangoloi angka sipaingotku.

2 KORINTUS 6:10

Haru pe dipaarsak rohanami, hape sai marjop ni roha do hami. Anggo idaon pogos do hami, hape bahat do halak gabe maradong hami baen. Anggo idaon na so adong do sanga na ahanami, tapi anggo satutuna sasudena do adong di hami.

2 KORINTUS 9:11

Dipamora do hamu taringot tu sudena i gabe basa ma hamu marsilehen-lehen, anso patubuhon hatarimakasion ni halak tu Debata hara ni angka silehen-lehenmunu i markite-hite hami.

2 KORINTUS 9:13

Hara ni hadengganan na dipataridahonmunu, gabe bahat halak pasangapkon Debata, angke diida halahi ma antong burju ni rohamunu maradopkon Jamita Na Denggan i na patorangkon Jesus Kristus na niihutkonmunu i. Mardomu muse hara ni habasaonmunu laho mambagi-bagihon sanga aha na adongmunu tu halahi bope tu sude halak na asing.

PANGARATAION 15:4

Pasupasuon ni Tuhan Debatamunu ma hamu di tano na giot silehenonNia di hamu. Di tonga-tonga ni bangsomunu nada adong dapot be halak na pogos

1 TESSALONIKA 1:6

Madung gabe ditiru hamu tiruannami dohot tiruan ni Tuhan i. Haru pe markancit situtu hamu, laing dijagit hamu do hata i mardongan jop ni roha. Tondi Parbadia do na mangalehen jop ni rohamunu i.

1 TESSALONIKA 2:14

Jana hamu pe angka dongan, madung ditiru hamu angka parlagutan ni Debata, arta ni Kristus na di Judea. Hamu pe madung ditaon hamu parkancitan sian dongan sabangsomunu sandiri laing songon na nitaon ni angka parlagutan ni Debata na di Judea sian angka halak Jahudi.

JAKOBUS 2:5

Hamu angka dongan na nihaholongan, tangihon hamu ma! Angka halak na pogos ninna roha ni portibi on, i do na dipili Debata anso gabe halak na mora di haporsayaanna tu Tuhan. Halahi do na maruli di Harajaan Ni Debata na nijanjihonNa i tu angka halak na mangkaholongi Ia.

HALUMBAAN 2:9

Huboto do hasusaanmunu; na pogos do hamu – tapi anggo satutuna na mora do hamu! Huboto do angka adu-aduan na nituhaskon ni angka na manggoari dirina halak Jahudi, hape nian nada tutu; parlagutan ni sibolis do halahi!