2 KORINTUS 7:10 - BIBEL JAMITA NA DENGGAN

¹⁰ Angke anggo hamarsahan na tumbuk tu roha ni Debata do, parohon haubaan ni roha na paluahon do i. Jana nada manyosal halak sisongon i. Tapi anggo hamamarsak na sian tano on, arsak na mamatehon do i.

2 KORINTUS 7:10 ပူးပေါင်းရင်းမြစ်များ

PAMUNGKAAN 30:1

Hape anggo si Rahel laing so maruntungan do. Jadi gabe mangiburu ma ia mida angkangnia i, jana didok ia ma tu si Jakob, “Lehen ma da di au anak! Anggo inda, mate noma da au.”

2 SAMUEL 12:13

Dung i didok si Daud ma tu si Natan, “Madung mardosa au maradopkon Tuhan.” Dialusi si Natan ma, “Madung diampuni Tuhan raja i; jadi nada jabat mate be raja i.

2 SAMUEL 13:4

Didok si Jonadab ma tu si Amnon, “Biasi sai songon i marsak idaon anak ni raja i ganop ari? Aha do na masamu?” Dialusi si Amnon ma, “Na ro do rohangku manghaholongi si Tamar, iboto ni si Absalom kahanggingki.”

2 SAMUEL 17:23

Dung diida si Ahitofel na so diihutkon hatania i, dipasang ia ma palano ni halodenia, lalu mulak ma ia tu kotania sandiri. Dung dipasidung ia sude urusannia, manyingkot ma ia lalu ditanom di kuburan ni halahi sahorong.

1 RAJA-RAJA 21:4

Mardongan arsak, dohot muruk hara ni hata na nidok ni si Nabot i tusia, mulak ma si Ahab lalu modom ma ia di podomannia manjorbing adop dingding i jana nada ra ia mangan.

MASMUR 38:18

Huoku do hasalaanku, marsak rohangku hara ni angka dosangku.

PODA 15:13

Muda marjop ni roha halak, mikim ia; tapi muda marsak, markaremut bohina.

PODA 15:15

Totop do susa ngolu ni na pogos, tapi sai marjop ni roha do halak na sonang.

PODA 17:22

Muda jop roha, sehat do pamatang. Muda gondok roha, marhancit ma badan.

PODA 18:14

Bisa do halak dapotan gogo na manaon parkancitanna, tapi muda so dapotan gogo, mago ma arop ni roha.

PARJAMITA 7:3

Gumonan do hamarsahan umpado na martata. Padiar ma murhing bohi, asal ma bahat pangastuion.

JEREMIA 31:9

Mardongan ilu-ilu mardalan halahi, Huapoi jana Huiring-iring halahi. Huoban halahi mamolus sian inganan na bahat aek, mamolus dalan na hornop na so tartuktuk patna be. Anggo di Israel songon ama do Au; Efraim ma anak panggoaran di Au.”

JEHESKIEL 7:16

Malua do nian deba jana maporus ma i tu partoran songon darapati na nihabur sian rura. Mangangguhi be ma i hara ni angka dosa ni halahi.

JUNUS 3:10

Diida Debata ma sude pangalaho ni halahi i; diida Ia ma na dung ditadingkon halahi pangalaho ni halahi na jat i. Jadi gabe dipauba Ia ma haputusanNia i, gabe nada tulus be halahi hona uhum dibaen Ia.

JUNUS 3:8

Jolma dohot pahan-pahanan angkon mamake abit goni. Songon tanda ni panyolsolion angkon martangiang sude jolma sian situtu ni rohana tu Debata. Angkon padengganonna be pangalahona na jahat i dohot parangena na gok dosa i.

JUNUS 4:9

Tapi didok Debata ma tusia, “Nada didalanna gabe songon i arsakmu hara ni suan-suanan i!” Didok si Junus ma mangalusi, “Biasi nada? Dalanna ma da au muruk sajo lopus mate.”

MATEUS 26:75

Jana taringot ma tu roha ni si Petrus hata ni Jesus tusia, “Dompak so martahuak manuk, madung diporso ho Au tolu noli.” Kehe ma si Petrus tu balian tangis panguncombopon.

LUKAS 15:10

Hudok ma di hamu! Laing songon i ma angka surusuruan ni Debata. Marjop ni roha ma halahi muda adong sada halak na jahat paubahon rohana.”

LUKAS 18:13

Tapi anggo sitagi pajak i jongjong ma ia mandao-dao jana inda puluk ia mardongak adop langit. Ditompuhi ia andorania i didok ia ma, ‘O ale Debata, ibo ma rohaMu mida au pardosa on!’ ”

BAENON NI ANGKA RASUL 11:18

Jadi dung dibege halahi hata nangkinan i, nada be sai dialo halahi si Petrus. Dung i dipuji halahi ma Debata. Didok halahi ma, “Antong dipadohot Debata do halak na so marugamo Jahudi laho paubahon roha sian angka dosana be anso mangolu halahi.”

BAENON NI ANGKA RASUL 3:19

Hara ni i, pauba hamunu ma rohamunu sian angka dosamunu jana mulak ma hamu tu Debata, anso disesa Ia sude angka dosamunu i.

2 KORINTUS 12:21

Songon na biar do rohangku, betak sai dipatoruk Debata au di jolomunu muda hutopot hamu. Sak muse do rohangku, bahat sian hamu na mardosa hian nabaruon, patangiskon au hara ni na laing so ra muba jana laing so mantak halahi marpangalaho na so ture, na hodar dohot na so tama.

2 KORINTUS 7:9

Tapi anggo saonnari jop do rohangku nada hara ni na gabe marsak i hamu, tapi hara ni na dung muba do pangalahomunu hara ni arsak ni rohamunu i. Denggan do tutu di Debata arsak ni rohamunu na songon i. Jadi, nada rugi hamu hami baen.

IBRANI 12:17

Diboto hamu do, por do rohania, hape ditulak do ia, angke nada adong be hatiha disia giot paubahon roha, haru pe marilu-ilu matana manjalahi.

1 SAMUEL 30:6

Giot marmara tutu do si Daud, dibaen sun do marsakna parangan ni si Daud i hara ni na agoan anak dohot dadaboru. Jadi gabe giot didangguri halahi do si Daud dohot batu. Jadi targogot situtu ma si Daud, tapi laing dipatogu Tuhan Debatania mangulahi rohania.