2 KORINTUS 3:2 - BIBEL JAMITA NA DENGGAN

² Hamu sandiri do surat pujiannami na tarsurat di bagasan rohanami jana na bisa botoon dohot siseon ni sude halak.

2 KORINTUS 3:2 ပူးပေါင်းရင်းမြစ်များ

SURAT NI SI PAULUS TU PARLAGUTAN ROM 1:8

Jumolo ma hudok tarimakasi tu Debatangku markite-hite Jesus Kristus hara ni hamu sudena; harana madung tarbonggal haporsayaanmunu tu sude portibi on.

1 KORINTUS 3:10

Hara ni hamaloon na nilehen ni Debata di au, songon tukang bagas na malo madung sidung hubaen ojahan ni bagas i, jana halak na asing do pajongjongkon bagas di ginjang ni ojahan i. Angkon jolo tangkas do parrohahonon ni tukang i sanga songon dia bagas na giot pajongjongonnia i di ginjang ni ojahan i.

2 KORINTUS 11:11

Biasi hudok songon i? Adong he ulaning na so holong rohangku mida hamu? Debata ma na umboto holong ni rohangku!

2 KORINTUS 12:15

Jadi hara ni i sudena, sian jop ni rohangku ra do au mangalehen sasudena hara ni hamu, haru diringku sandiri pe ra do au pasahatkon i tu hamu. Muda songon i ma holong ni rohangku tu hamu, tama dope he laing hurang holong ni rohamunu mida au?

2 KORINTUS 3:1

Adong he songon na mamuji-muji diri hami idaon mangulahi? Betak na porlu do di hami surat pujian maradopkon hamu, sanga sian hamu, songon angka halak na deba na mamorluhon songon i?

2 KORINTUS 7:3

Hudok pe songon i, nada na giot pasalahon hamu au. Angke songon na hudok nabaruon, solkot sajo do hamu anggo di rohanami, jana dongan sahangoluan sahamatean do rohangku maradopkon hamu!

PILIPPI 1:7

Sai tongtong do di bagasan rohangku hamu sude. I do tutu tamana muda pe songon i pangkilalaanku taringot tu hamu. Angke na rap maruli do hamu sudena dohot au di silehen-lehen na nipasahat ni Debata di au; bope saonnari dompak tarhurung au sanga pe hatiha di ruar au laho mambela dohot mampartahankon Jamita Na Denggan i.

1 TESSALONIKA 1:8

Angke mamungka sian hamu do rarat barita taringot tu Tuhan Jesus tu Makedonia dohot Akaya. Jana nada hum i sajo; barita ni haporsayaanmunu pe tu Debata, madung tarbonggal sun tu dia, gabe nada adong be pola na porlu sidokkononnami.