1 TIMOTEUS 6:9 - BIBEL JAMITA NA DENGGAN

⁹ Tapi sanga ise angka halak na giot kayo, targoda jana hona jorgong ma i dibaen hagiot na oto na marragam rupa boti na manyegohon. Angka hagiot na songon i ma na mangalantuk dohot na mangagohon halak.

1 TIMOTEUS 6:9 ပူးပေါင်းရင်းမြစ်များ

1 RAJA-RAJA 21:6

Dialusi si Ahab ma, “Hara ni na so tabo do huhilala pambaen ni si Nabot. Por rohangku manobusi kobun anggurnia i, sanga muda giot rohania, nigonti disia dohot kobun na asing. Hape inda ra ia!”

MASMUR 11:6

Tu halak na jahat diparo do udan api dohot barerang, diuhum Ia halahi dohot haba-haba na manutung lopus marragean.

PODA 15:27

Ro ma hasusaan tu keluarga ni halak na mambaen korupsi, tapi mangolu do sanga ise na margoyak ni roha di hepeng suap.

PODA 20:21

Mur mura halak dapotan sinadongan mur so denggan do panginonaanna.

PODA 21:6

Sinadongan na dapot sian na so jujur maradu tibu do i mago jana i ma maroban halakna i tu kubur.

PODA 22:16

Sanga ise na mamisat halak na so marnampuna jana marsilua tu halak na mora mardongan maksud anso mamora gabe marpogos situtu do i di ujungna.

PODA 23:4

Ulang nihalojahon laho makayo, tinggalkon ma hagiotmi.

JESAYA 5:8

Marjaya ma hamu! Ditobusi hamu ma angka bagas dohot angka ladang laho manamba sinadonganmunu. Nada sadia honok nari abis ma inganan di halak na asing jana hum hamu sajo noma na maringanan di luat i.

ZAKARIA 11:5

Dimatehon angka nampunasa ma angka biri-biri i marroha-roha, jana nada hona uhum halahi. Digadisi halahi ma juhut ni biri-birina i jana didok halahi ma, ‘Nipuji ma da Tuhan! Saonnari madung mamora hita!’ Salangkan angka parmahan i sandiri nada maribo ni roha mida angka biri-biri na niparmahanna i.

BILANGAN 31:8

dohot ma disi lima raja ni Midian, i ma: Si Ewi, si Rekem, si Zur, si Hur dohot si Reba. Si Bileam anak ni si Beor i pe dibunu do.

MATEUS 13:22

Same na madabu tu tonga-tonga ni duri i, i ma tarsongon halak na mambege jamita i, tapi humolos ma halahi hara ni ngolu ni halahi. Sai giot marlobi-lobi do ngolu ni halahi. Jadi tarhapit ma jamita i di bagasan roha ni halahi, gabe nada marbatu.

MATEUS 19:22

Dung dibege doli-doli i hata nangkinan i, kehe ma ia mardongan arsak. Angke halak na kayo do ia.

MATEUS 26:15

Didok ia ma tu halahi, “Aha ma lehenonmunu di au muda hupasahat Jesus tu hamu?” Dung i dietong halahi ma tolu pulu hepeng perak. Dilehenkon halahi ma hepeng i tusia.

MATEUS 6:19

“Ulang ma palagut arta hamu di portibi on. Harana anggo di portibi on adong do ngitngit dohot harat na manyegohon arta i. Dung i muse tarbungkar jana tartangko panangko do i.

MARKUS 4:19

tapi disegohon pangkilalaan na humolos ma taringot tu ngolu ni halahi. Sai giot maradong. Marragam ma hagiot na mangganggui roha ni halahi. Gabe mate ma hata i na sian Debata, inda marguna be di roha ni halahi.

LUKAS 12:21

Laho paujungkon carito i didok Jesus ma, “Songon i ma pangalaho ni halak na sai torus palagut arta tu dirina sandiri sajo, tapi nada mamora di adopan ni Debata.”

LUKAS 21:35

Angke songon tirangkap do parro ni ari i tu halak na satano on.

BAENON NI ANGKA RASUL 8:20

Tapi dialusi si Petrus ma, “Tu hamagoan ma ho dohot hepengmi! Diambang ho do lakna tartobusi hepeng, silehen-lehen ni Debata?

EPESUS 4:22

Ambungkon hamu ma bakomunu na honok i, na mur sego dibaen angka hagiotna na mangaliluhon i.

PANGARATAION 7:25

Angkon tutunganmunu do sude angka patung na nisomba ni halahi, ulang por rohamunu di sere sanga perak na lohot di angka patung i jana ulang buat hamu muse i baen di hamu sandiri. Muda dilanggar hamu parenta on, mate ma hamu, angke magigi do Tuhan maradopkon parsombaan tu patung.

1 TIMOTEUS 1:9

Angkon laing ingoton do, dibaen pe angka Tona ni ugamo i, nada na giot di halak na burju, tapi na giot tu halak pangalanggar Tona do i, tu angka na jahat, tu halak na so mananda Tuhan, tu halak pardosa, tu halak na so marugamo, tu parroha portibi, tu halak sibunu simatobangna, tu angka sibunu jolma,

1 TIMOTEUS 3:7

Angkon na denggan do goarna di tonga-tonga ni halak na bahat; angke anggo nada songon i, dipalayas halak do ia, gabe madabu ma ia tu sambil ni Sibolis baenon ni i.

1 TIMOTEUS 6:10

Angke sian holong ni roha tu hepeng do haroroan ni sude ragam ni hajahatan. Adong do deba halak na sai mangkojar hepeng jana na so mangihut be tu ajaran ni Kristen, lopus gabe didondoni pardangolan halahi, mambaen gabe marsak roha ni halahi.

1 TIMOTEUS 6:17

Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu – songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita.

2 TIMOTEUS 2:26

Jadi anso gabe torang roha ni halahi mangulahi jana talgang sian sambil ni Sibolis na manjorat halahi jana na mamaksa halahi mangihutkon hagiotna.

TITUS 2:12

Na mangajari hita do hadengganan ni roha ni Debata i anso ulang be maralo ngolunta tu hagiot ni Debata jana nada be mangihutkon hagiot ni portibi on; diajari do hita anso malo hita mangarajai dirinta, tigor jana manghaholongi Debata.

JOSUA 7:11

Na mardosa do halak Israel. Madung Huparentahon tu halahi laho mangoloi parjanjian antara ni halahi dohot Au hape dilaosi halahi do i! Angka barang-barang sironcohononkon pe laing adong do dibuat halahi. Ditangko jana dibunihon halahi do i di antara ni barang-barang ni halahi, jana dipaula so diboto halahi ma i!

2 PETRUS 2:3

Hara ni na ahut tu dirina, caritohonon ni angka guru pargabus i ma tu hamu angka carito na nibaen ni halahi sandiri anso dapotan untung halahi sian hamu. Tapi anggo panguhuman laho manguhum halahi madung tibu dipasingkop jana hamagoan na dung ditontuhon pe tu halahi madung paintehon tu halahi.

JUDAS 1:11

Marjaya ma halahi! Dalan ni si Kain do na nibolus ni halahi. Anso dapotan upa, gabe didohoti halahi do angka hasalaan songon na nibaen ni si Bileam. Jana mago do halahi hara ni na manggaori songon na nibaen ni si Kora.