1 TIMOTEUS 5:10 - BIBEL JAMITA NA DENGGAN

¹⁰ tarbarita ia songon sada ina na dung mambaen pangalaho na denggan; isarana: Denggan dipagodang-godang ia angka dakdanaknia, sonang rohana manjagit angka tamu di bagasna, tata bohina manyambut angka na porsaya, dohot na mangurupi halak na susa – pendekna madung dibaen ia sian situtu ni rohana sude ragam ni karejo na denggan.

1 TIMOTEUS 5:10 ပူးပေါင်းရင်းမြစ်များ

PAMUNGKAAN 18:4

Paloas hamu ma jolo au laho mangalap aek pamasu ni patmunu, jana di toru ni hayu on ma hamu jolo marsilaung maradian.

PAMUNGKAAN 19:2

jana didok ia ma, “Loas hamu ma au mangoloi hamu, tuan. Tu bagasta ma hamu masuk. Adong do parbasuan ni pat di bagasta dohot parbornginan. Ancogot tarbaen hamu do sigop ngot lalu paudutkon pardalananmunu.” Tapi dialusi halahi ma, “Tarimakasi ma da, dison pe hami marborngin di alaman ni kota on.”

PAMUNGKAAN 24:32

Jadi diihutkon hatoban i ma ia, masuk tu bagas. Dipaijur si Laban ma boban ni angka unto i jana dilehen ia ma durame dohot jampalon ni pahan-pahanan i. Dung i dibuat ia ma aek pamasu ni pat ni hatoban ni si Abraham i dohot donganna i.

PAMUNGKAAN 43:24

Dung i dioban ma si Simeon tu halahi, jana ditaruhon ia ma halahi tu bagas. Dilehen ia ma aek pamasu ni pat ni halahi, dohot ruput di halode ni halahi.

MASMUR 119:4

Dilehen Ho do, ale Tuhan, parentaMu tu hami, anso setia hami nian mandalankon i.

JESAYA 1:17

marsiajar ma hamu mambaen na denggan. Gogohon hamu ma anso tulus mardalan hatigoran – urupi ma halak na hona hapit; pasahat ma tu na so marama so marina na patut bagianna jana ondihon hamu ma angka na mabalu.”

HAMALIMON 25:35

Muda adong sada sian halak Israel na dung gabe pogos na rap dohot hamu, jabat nada dapot ia be ngolunia, angkon lehenonmunu disia sabahat ni na tarlehen hamu di halak na niupaan. Muda songon i gabe mangolu ma ia rap dohot hamu.

MATEUS 25:17

Laing songon i muse ma na manjagit dua ribu hepeng perak i, maruntung ma ia dua ribu hepeng perak.

MATEUS 5:16

Sugari angkon songon i ma nian torangna sinondangmunu di jolo ni halak. Anso diida halak parangemunu na denggan i. Gabe dohot ma halahi mamuji Amangmunu na di banua ginjang i.”

LUKAS 7:38

Jongjong ma ia di pudi ni Jesus di lambung patNa i, tangis ma ia disi, ditombur ia ma pat ni Jesus dohot ilunia, asa diapusi ia ma i dohot obukna, dung i diumma ia ma i jana diusehon ia ma miak na huskus i.

LUKAS 7:44

Dung i ditailihon Jesus ma tu dadaboru i, didok Ia ma tu si Simon, “Diida ho dehe anak boru on? Di na ro Au tu bagasmon, umpe adong aek diparade ho parbasuan ni patKu; hape anggo anak boru on madung dibasu ia patKu dohot ilu ni matania, jana dipahiang ia dohot obuknia.

BAENON NI ANGKA RASUL 10:22

Dialusi halahi ma, “Na nisuru ni kapten Kornelius do hami tuson. Halak na burju do ia jana mabiar mida Debata, boti sangap do ia dibaen halak Jahudi. Na ro do sahalak surusuruan na badia marsuru ia mangidohon anso ro tuan i tu bagasnia, angke giot begeonnia jamita sian ho.”

BAENON NI ANGKA RASUL 22:12

Adong ma disi sada bayo na margoar si Ananias. Na daulat do bayo i jana na burju do ia mandalankon angka Tona i. Sude do halak Jahudi na di kota Damaskus mamparsangapi ia.

BAENON NI ANGKA RASUL 6:3

Hara ni i, hamu ale angka dongan, pili hamu ma sian tonga-tongamunu sandiri pitu halak na tangkas burju jana na nigohan ni Tondi boti na bisuk, anso hami pabangkit halahi tu karejo na songon i.

BAENON NI ANGKA RASUL 9:36

Di Jope adong muse do sada anak boru na margoar si Tabita, na porsaya do ia tu Jesus. (Si Dorkas do goarnia di hata Junani, astuanna ursa.) Sai didatdati ia do mambaen na denggan jana sai diurupi ia do angka halak na pogos.

BAENON NI ANGKA RASUL 9:39

Manigor jongjong ma si Petrus mangihutkon halahi. Jadi dung lalu disi, dioban ma ia tu bilik na di ginjang i. Martangisan ma sude angka ina na mabalu mangarongomi si Petrus, dipatidahon halahi ma tusia angka baju dohot juba na nijait ni si Dorkas di halahi dompak mangolu ia.

SURAT NI SI PAULUS TU PARLAGUTAN ROM 12:13

Urupi hamu ma na patukkon haporluan ni angka halak na porsaya tu Debata jana sonang ma rohamunu manjagit haroro ni halahi tu bagasmunu.

EPESUS 2:10

Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita.

KOLOSSE 1:10

Jadi gabe tarbaen hamu ma mangolu mangihutkon na nipangido ni roha ni Debata bope na pasonangkon rohaNia tongtong, anso sai tarpatidahon hamu angka pangalaho na denggan di sude karejomunu. Jana mur martamba muse ma parbinotoanmunu taringot tu Debata.

1 TIMOTEUS 2:10

Gumonan ma angka pangalaho na denggan dibaen halahi pakeanna songon na patut di angka dadaboru na marsomba tu Debata.

1 TIMOTEUS 3:2

Hara ni i, sanga ise na gabe pamimpin ni parlagutan, angkon halak na so martilako ma; angkon sada sajo do dadaborunia; bisa mangorom dirina, na malo jana na maraturan; angkon jop do rohana manjagit tamu di bagasna; jana ringgas mangajari halak;

1 TIMOTEUS 3:7

Angkon na denggan do goarna di tonga-tonga ni halak na bahat; angke anggo nada songon i, dipalayas halak do ia, gabe madabu ma ia tu sambil ni Sibolis baenon ni i.

1 TIMOTEUS 5:16

Tapi muda adong sada halak Kristen na adong koumna na mabalu, angkon urupan ni dongan Kristen i ma angka na mabalu i; ulang pola dipainte-inte angkon sai parlagutan mananggung halahi. Jadi muda songon i tarbaen parlagutan i ma mangurupi angka na mabalu na so markoum sisolkot.

1 TIMOTEUS 5:25

Songon i muse do angka pambaenan na denggan manigor habotoan do i. Salang na maol i pe anso haidaan, nada tarbunihon i tongtong.

1 TIMOTEUS 6:18

Paingot ma halahi laho patuduhon hadengganan, laho patupahon bahat pangalaho na denggan, habasaon dohot haburjuon mangalehen.

2 TIMOTEUS 1:5

Taringot do tu rohangku situtu ni haporsayaanmu tu Kristus, sarupa tu haporsayaan ni ompungmu si Lois dohot inanta si Eunike. Jana au pe pos do rohangku, laing songon i muse haporsayaanmu.

2 TIMOTEUS 2:21

Sanga ise halak na paias dirina sian sude na jahat, i ma na nipake songon parkokas tu pangalaho na marsangap. Gabe nampuna hapunjungan jana na hasaya ma ia di tuanna. Na diparade hian do halak na songon i sipakeon tu angka ragam ni karejo na denggan.

2 TIMOTEUS 3:15

Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus.

2 TIMOTEUS 3:17

Mardongan Buku Na Badia i dipasingkop do sadenggan-dengganna sanga ise na mangoloi Debata di sude ragam ni parkarejoan na denggan.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

TITUS 2:7

Jana ho sandiri pe, angkon patuduhononmu do parange na denggan na gabe tiruan di sude pangalaho. Muda mangajari ho, angkon tigor do baenonmu.

TITUS 3:1

Paingot ma sudena ruasmu anso tunduk halahi tu angka pamimpin dohot na markuaso di negara, jana mangoloi dohot na patuluskon sandok na denggan.

TITUS 3:14

Angkon marsiajar do angka ruasta i patupahon angka na denggan anso tarbaen manggohi angka na porlu situtu; ulang jabat gabe halak na so marguna ngolu ni halahi.

TITUS 3:8

Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak.

IBRANI 10:24

Jana marsipamanatan ma hita sama hita anso tarbaen hita marsiparinggasan patupahon angka na denggan dohot patuduhon holong marsihaholongan.

IBRANI 13:2

Ulang pola gamang hamu manjagit dongan na so haru tangkas dope ditanda hamu. Angke di na patupahon na songon i sian na so pamotoan, madung dijagit ia surusuruan di bagasnia.

IBRANI 13:21

Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen.

1 PETRUS 2:12

Angkon denggan do pangalahomunu di tonga-tonga ni angka halak na so porsaya tu Kristus, jadi haru pe diincahi halahi hamu songon halak na jahat, gabe idaon ni halahi ma angka pambaenanmunu na denggan i, jana gabe pujion ni halahi ma Debata di haroro ni Debata tu portibi on.

1 PETRUS 4:9

Marsijagitan ma hamu na sada tu na asing di bagasna be, so pola humolos.

3 JOHANNES 1:12

Sude do halak mamuji si Demetrius. Sian jamita na sintong na sian Debata pe tarpuji do ia. Hami pe dohot do mamuji ia jana diboto hamu do, tutu do pamujinami i.