1 TIMOTEUS 4:8 - BIBEL JAMITA NA DENGGAN

⁸ Pangoromon ni pamatang, saotik do guna ni i, tapi anggo latihan ni roha, i ma na marguna tu sude pangalaho, angke dijamin i do ngolunta di tano on lopus tu ari parpudi.

1 TIMOTEUS 4:8 ပူးပေါင်းရင်းမြစ်များ

JOB 36:11

Muda dioloi halahi do Debata jana marsomba tuSia, mangolu di bagasan dame ma halahi jana sonang lopus tu ujung ni ngoluna.

MASMUR 145:19

Dipasonang Ia do roha ni angka na burju marugamo, ditangihon Ia do pio-pio ni halahi jana dipalua Ia.

MASMUR 37:11

Halak na serep marroha, i do nampuna tano, na mangarasoi dame dohot hasonangan na tarlobi.

MASMUR 37:29

Halak na daulat do nampuna tano teanan, jana manginganisa sapanjangna.

MASMUR 37:9

Angke agohonon do sanga ise na mambaen jahat, tapi anggo na mararop roha tu Tuhan, i do nampuna tano teanan.

MASMUR 84:11

Angke pangondian na gogo do Tuhan Debata, na mangalehen sangap dohot basa-basa di hita. Sai marpupu do dilehen Ia hadenggananNia tu halak na patuluskon hagiotNia.

PODA 19:23

Biar mida Tuhan parohon hangoluan, jadi marbongin ma jolma di bagasan jop ni roha, nada ditinggang parhancitan.

PODA 22:4

Halak na burju mangoloi Tuhan jana patoruk rohana, gabe martua, sangap jana sonang ngoluna.

PARJAMITA 8:12

Haru pe dibaen sada pardosa saratus hajahatan, laing totop do ia mangolu jana umurna ginjang. Ninna, sanga ise na mangoloi Debata, mur maradu mura do ngoluna.

JESAYA 3:10

Dokkon ma martua halak na tigor! Harana panganan ni halahi ma suha ni parkarejoanna.

JESAYA 33:16

Jadi gabe malua do hamu jana sonang, songon na tinggal di bagasan benteng na togu. Singkop do sipanganon dohot siinumon di hamu.

JEREMIA 6:20

Aha ma guna ni hamonyan na dioban ni halahi di Au sian Seba, sanga parmasak na sian luat na dao i? Nada ringkot rohangKu manjagit haul ni halahi i; nada giot Au angka haul na nitutung ni halahi.

MATEUS 12:32

Halak na mandok hata laho mangalo Anak Ni Jolma, tarsesa do i. Tapi anggo halak na mandok hatana laho mangalo Tondi Parbadia, bagi na bia pe nada tarsesa be i, bope di portibi on sanga pe di ari na giot ro!”

MATEUS 19:29

Angke sanga ise na maninggalkon bagasna, sanga kahanggina, sanga ibotona, sanga pe inangna dohot amangna, sanga dakdanakna, sanga sabana hara ni Au, saratus lompit ma jagiton ni halahi mangulahi. Nilehen muse dope disia hangoluan na so mantak.

MATEUS 6:33

Sai jumolo ma jalahi hamu Harajaan Ni Debata dohot hatigoranNa, jadi lehenonNia ma di hamu sasude na songon i.

MARKUS 10:30

jagiton ni halahi ma umbahat sian di hatiha saonnari. Dapot ia ma saratus noli umbahat bagas, kahanggi, iboto, dakdanak, saba dohot ladang, dohot parkancitan. Dung i di hatiha na giot ro jagiton ni halahi ma hangoluan na so mantak.

LUKAS 5:38

Anggo anggur na baru angkon di inganan na imbaru do nisimpan!

SURAT NI SI PAULUS TU PARLAGUTAN ROM 8:28

Taboto do, Debata do na mangatur sasudena, anso gabe manjalak tu dengganna di angka halak na mangkaholongi Ia jana na nipiohonNia hombar tu sangkapNia.

1 KORINTUS 3:22

Si Paulus, bope si Apollos, bope si Kepas, portibi on, hangoluan dohot hamatean, bope hatiha saonnari dohot hatiha na giot ro, hamu do nampuna i sasudena.

1 KORINTUS 8:8

Satutuna nada pola mur solkot hita tu Debata hara ni sipanganon i. Haru tapangan pe sipanganon i nada pola maruntung hita bagi aha. So tapangan pe sipanganon i nada pola adong ruginta sanga aha.

1 TIMOTEUS 4:7

Padao ma ho sian angka turi-turian na so ture. Gumonan ma pasomal-somal dirimu marhadaulaton tu Debata.

1 TIMOTEUS 6:3

Adong do halak na mangajarkon asing sian i jana na so satujuan muse tu pangajaran na sintong na sian Tuhanta Jesus Kristus. Nada satuju muse halahi tu pangajaran ni ugamonta.

1 TIMOTEUS 6:5

dohot parsalisian na so marujung. Na dung puntol do pikiran ni halak na songon i jana sala. Diambang halahi tarbaen ma dapotan untung sian ugamo.

1 TIMOTEUS 6:6

Tutu nian dilehen hadaulaton i do bahat untung muda sonang roha ni halak di sinadonganna.

2 TIMOTEUS 3:5

Haru pe di sihapataran ringgas halahi mandalankon angka na niaturkon ni ugamo, tapi anggo hagogoon ni ugamo i sandiri nada adong be diboto halahi. Padao ma ho sian angka halak sisongon i.

TITUS 3:8

Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak.

IBRANI 13:9

Ulang ma padiar-diar hamu angka pangajaran na marragam-rupa i mangaliluhon hamu. Angkon denggan ni roha ni Debata do na patogu rohanta, i do na denggan; ulang ma angka paraturan ni sipanganon. Angke angka halak najolo na mangihutkon paraturan i nada adong pola gunana dapot halahi.

1 JOHANNES 2:25

Jana on ma na nijanjihon ni Kristus sandiri tu hita, i ma ngolu na manongtong.

HALUMBAAN 3:12

Sanga ise na monang, baenonKu ma gabe songon tiang partunggul di bagas na badia inganan ni DebatangKu, jana nada morot-morot be ia sian inganan i. SuratkononKu ma tu halahi sandiri goar ni DebatangKu dohot goar ni kota ni DebatangKu – i ma Jerusalem na imbaru na giot mijur sian banua ginjang. Laing suratkononKu ma dohot goarKu na imbaru tu diri ni halahi.

HALUMBAAN 3:21

Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i.

1 SAMUEL 15:22

Tapi didok si Samuel ma, “Dia do na jumop roha ni Tuhan, pangoloion tu Tuhan do ulang pado na manghaulkon haul? Marpangoloion tu Tuhan, dumenggan do i sian na manghaulkon haul. Dumenggan do i sian tabo-tabo ni biri-biri.