1 TIMOTEUS 3:13 - BIBEL JAMITA NA DENGGAN

¹³ Sanga ise angka na mangurupi di parlagutan i mur dipasangap halak do i jana mur puluk ma ia mangkobari tu halak, taringot tu haporsayaan ni halahi maradopkon Kristus.

1 TIMOTEUS 3:13 ပူးပေါင်းရင်းမြစ်များ

MATEUS 20:28

Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak.”

MATEUS 25:21

‘Ma denggan i,’ ning tuan i, ‘ho ma ibana naposo na burju jana na denggan. Angke haposan do ho di na otik, hulehen ma pos ni rohangku tu ho taringot tu na umbahat. Dohot ma ho masuk marsonang-sonang rap dohot au!’

LUKAS 19:17

Didok tuan i ma, ‘Ma denggan i, ho ma naposo na burju! Angke haposan do ho di bagasan pangalaho na menek pe, hubaen noma ho gabe pangarajai tu sampulu kota.’

BAENON NI ANGKA RASUL 21:35

Dung lalu ia dioban halahi tu tanggana i, songon i ma pangamuk ni angka na mambaen gaor i, gabe songon na niusung noma paroban ni si Paulus.

BAENON NI ANGKA RASUL 6:15

Marsiligi ma sude halak na disi i tu si Stefanus. Jana tarida ma disi bohi ni si Stefanus songon bohi ni surusuruan.

BAENON NI ANGKA RASUL 6:5

Rap manjagit ma halahi sude di na nidok ni angka rasul i. Dung i dipili halahi ma si Stefanus, sada halak na porsaya situtu tu Jesus jana na nirajaan ni Tondi Parbadia. Laing tarpili ma disi si Pilipus, si Prokorus, si Nikanor, si Timon, si Parmenas dohot si Nikolaus na sian Antiokia i; nada nian halak Jahudi ia tapi madung marbalik ia tu ugamo Jahudi.

BAENON NI ANGKA RASUL 6:8

Tapi anggo si Stefanus na gok asi ni roha dohot hagogoon, mambaen angka tanda-tanda dohot hahomangan na godang do di tonga-tonga ni halak na bahat i.

1 KORINTUS 16:15

Adong dope sada nari pangidoanku tu hamu ale angka dongan. Diboto hamu do, anggo si Stefanus dohot donganna sabagas, i ma angka halak na parjolo porsaya di Akhaya, jana dipasahat do dirina mangoloi angka na porsaya.

PILIPPI 1:14

Jana dung di bagasan hurungan on au, gabe bahatan ma angka dongan sahaporsayaan gabe mur marpos ni roha tu Tuhan, mambaen halahi gabe mur puluk manjamitahon hata ni Debata so pola mardongan biar.

1 TESSALONIKA 2:2

Diboto hamu do dompak so ro hami mandapotkon hamu tu Tessalonika, na dung jolo marhancit do hami jana marlayas di Pilippi. Hape madung dilehen Debata do tu hami habaranion laho manjamitahon Jamita na Denggan na sian Debata i tu hamu haru bahat pe paraloan tu hami.

1 TIMOTEUS 3:14

Ning rohangku, santongkin nari ro ma au mandapotkon ho. Haru pe songon i, laing hubaen do surat on tu ho,

2 TIMOTEUS 2:1

Amang Timoteus! Sai margogo ma ho hara ni asi ni roha na nilehen di hita hara ni pardomuanta i dohot Kristus.

IBRANI 6:10

Nada Debata na so tigor. Nada halupahononNia sanga aha na denggan na nibaenmunu tuSia. Sai na ingotonNia do holong ni roha na nipatuduhonmunu tuSia di bagasan pangurupionmunu na nipasahatmunu maradopkon angka dongan Kristen na asing i. Jana lopus saonnari pe laing dilehen hamu do pangurupion i.