1 TIMOTEUS 2:8 - BIBEL JAMITA NA DENGGAN

⁸ Sanga na di dia pe angkon martangiang do angka halaklahi tu Debata sian roha na ias jana ulang mardongan muruk dohot salisi.

1 TIMOTEUS 2:8 ပူးပေါင်းရင်းမြစ်များ

1 RAJA-RAJA 3:11

gabe didok ma tusia, “Dibaen habisuhon do dipangido ho laho mamarenta di bagasan hatigoran, nada umur na ginjang sanga hamoraonmu sanga pe hamamate ni angka musumu,

JOB 16:17

hape nada au mangasa hagogoan; tangkas do na bulus pangidoanku maradopkon Tuhan.

MASMUR 134:2

Angkat ma tanganmunu adop inganan na badia, jana puji ma Tuhan!

MASMUR 141:2

Jagit ma tangiangku songon haul hamonyan, tanganku na hupahortang songon haul borngin.

MASMUR 24:4

Halak na ias di roha dohot pambaenan, na so marsumpa na pargabus sanga na manyomba gana-ganaan.

MASMUR 26:6

O Tuhan, hubasu tanganku tanda na so marsala au, jana dohot au mardalan manghaliangi langgatanMu,

MASMUR 28:2

Tangihon ma pangidoanku, muda huangkat tanganku adop BagasMu.

MASMUR 35:13

Dompak marnyae halahi, marsak do au jana nada mangan, martangiang au lalu paunduk simanjujung,

MASMUR 63:4

Mandok tarimakasi do au tu Ho salolot au mangolu, angkatonku ma tanganku lalu martangiang tu joloMu.

MASMUR 66:18

Sugari na sonang rohangku mamikir hajahatan, pasti nada ra Tuhan umbegean.

PODA 15:8

Sonang do roha ni Tuhan muda denggan halak martangiang, tapi anggo haul ni halak na jahat ditulak Ia.

PODA 21:27

Nada jop roha ni Tuhan tu haul ni jolma na so hasaya, lumobi muda na dihaulkon mardongan maksud na targora.

JESAYA 1:15

Muda pe diangkat hamu tanganmunu martangiang, nada Huterge be i. Nada parduli Au sanga na sadia bahat tangiangmunu i, nada ra Au manangihonsa angke dohot tanganmunu i madung bahat hamu mamunu.

MATEUS 21:21

“Satutuna, Hudok ma tu hamu, anggo porsaya do hamu jana inda adong ganggu ni roha, tarbaen hamu do songon na Hubaen i tu bona ni gala-gala i. Inda hum i sajo, salangkan tu dolok an pe tardokkon hamu do, ‘Morot ma ho, ambung ma ho tu laut.’ Tulus do i!

MATEUS 5:44

Tapi saonnari Au mandok di hamu: Haholongi ma alomu jana tangiangkon ma halak na mamparkanciti ho,

MATEUS 6:12

sesa ma angka dosanami, songon hami manyesa dosa ni angka na mardosa tu hami,

LUKAS 23:34

Dung i martangiang ma Jesus, “Ale Amang, sesa ma hasalaan ni halahi! Angke nada diboto halahi sanga aha na nibaen ni halahi.”

LUKAS 24:50

Dung i dioban Jesus ma halahi tu balian, lopus tu Betania. Diangkat Ia ma disi tanganNia mamasumasu halahi.

JOHANNES 4:21

Didok Jesus ma, “Porsaya ma ho di Au. Sada hatiha sombaon ni halak ma Damang, nada be di dolok on jana nada muse di Jerusalem.

BAENON NI ANGKA RASUL 10:2

Halak na mangkabiari Debata do ia jana sude do halahi sabagas sai marsomba tu Debata. Bahat do ditolong ia halak Jahudi na pogos-pogos jana sai martangiang do ia tu Debata.

BAENON NI ANGKA RASUL 10:31

Didok ia ma, ‘Kornelius! Madung dijagit Debata tangiangmi jana diingot Ia do denggan ni rohamu.

BAENON NI ANGKA RASUL 10:4

Diligi ia ma tu surusuruan i mardongan biar, didok ia ma, “Aha do ulaning Tuan?” Dialusi surusuruan i ma, “Madung dijagit Debata tangiang dohot denggan ni rohamu jana diingot Debata do ho.

BAENON NI ANGKA RASUL 21:5

Tapi dung dapot hatihana sai honok hami disi, hami tadingkon ma halahi, hami patorus ma pardalanannami. Sude ma halahi pataru hami, na menek na magodang, ama dohot ina lopus tu ruar ni kota i. Di topi ni laut i marsinggang ma hami martangiang disi.

BAENON NI ANGKA RASUL 7:60

Marsinggang ma ia, dipagogo ia ma sorania mandok, “Ulang ma dijujur dosa on tu halahi, ale Tuhan!” ning ia. Dung didok ia songon i, marujung ma ngolunia. Si Saulus pe moga ma dihilala ia hara ni na mamunu jolma i.

1 KORINTUS 1:2

tu parlagutan ni Debata na di Korintus, i ma angka na diparbadiai di bagasan Kristus Jesus jana na nipiohon gabe angka halak na badia, dohot tu sude halak di sude ingananna, na mamiohon goar ni Tuhanta Jesus Kristus, i ma Tuhan ni halahi dohot Tuhanta.

1 KORINTUS 7:7

Anggo satutuna nian, gumonan do didok rohangku sugari songon au on sudena halak. Tapi bia ma baenon, paasing-asing be do silehen-lehen na nijagit sian Debata. Deba songon on do hasurungan na nijagitna, hape na asing nada songon i.

2 KORINTUS 2:14

Tapi tarimakasi ma di Debata, tongtong do diuluhon Ia hami mangihutkon uduran ni hamonangan ni Kristus. Dipake Debata do hami anso songon uap na huskus jamita taringot tu Kristus i.

PILIPPI 1:12

Giotku diboto hamu ma nian, anggo angka pangalaho na masa tu au, i do mambaen mur rarat Jamita Na Denggan i.

1 TESSALONIKA 1:8

Angke mamungka sian hamu do rarat barita taringot tu Tuhan Jesus tu Makedonia dohot Akaya. Jana nada hum i sajo; barita ni haporsayaanmunu pe tu Debata, madung tarbonggal sun tu dia, gabe nada adong be pola na porlu sidokkononnami.

1 TIMOTEUS 5:14

Hara ni i ma dibaen na dumenggan hudok marbagas mangulahi angka na mabalu na poso dope. Denggan ma i mardakdanak halahi dohot na mangurus rumahtanggana anso ulang adong tarbaen angka musunta i dalan pajatjat-jatjatkon goarta.

TITUS 3:8

Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak.

IBRANI 10:22

Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan.

JAKOBUS 4:8

Pasolkot hamu ma tu Debata, jana Debata pe padonohonNa ma tu hamu. Hamu dongan na mardosa, paias hamu ma tanganmunu! Hamu na mardua roha, paias hamu ma rohamunu.

1 PETRUS 3:7

Bope hamu angka ama, mardongan bisuk ma hamu maradopkon dadaborumunu jana mardongan roha na torang, ingot hamu ma halak na gale do halahi. Sangap ma baen hamu halahi, angke rap na giot hasahatan ni ngolu na tutu na sian Debata do halahi dohot hamu. Di ngolu na songon i, nada adong be na mangambati tangiangmunu maradopkon Tuhan.