1 TESSALONIKA 5:11 - BIBEL JAMITA NA DENGGAN

¹¹ Hara ni i, marsipaingotan ma hamu jana marsipatoguan di haporsayaan, laing songon na nibaenmunu saonnari.

1 TESSALONIKA 5:11 ပူးပေါင်းရင်းမြစ်များ

EPESUS 4:29

Muda mandok hata hamu, ulang ma pake hamu angka hata na so ture. Angka pandohan na manogu dohot na mangurupi tu dongan na asing ma pake hamu. Angka pandohan na songon i do na padenggankon tu angka dongan na umbegesa.

IBRANI 10:25

Ulang ma tatinggalkon parlagutanta i, songon na nibaen ni na deba. Angkon mur umburju ma nian hita marsipaingotan sama hita, angke taboto do, ro ne ma Tuhan i.

SURAT NI SI PAULUS TU PARLAGUTAN ROM 15:2

Gumonan do hita manjalahi hasonangan ni dongan, laho parayakkon hadenggananna jana paulihonsa.

IBRANI 3:13

Jadi, anso ulang adong sanga ise sian hamu na hona tipu dibaen dosa, na mambaen gabe mangalo tu Debata, angkon marsipaingotan do hamu sama hamu ganop ari salolot mangolu hita di hatiha na nidok “Sadari on” di Buku Na Badia i.

1 TESSALONIKA 4:18

Antong marsipatoguan roha ma hamu, mardongan angka pandohan on.

SURAT NI SI PAULUS TU PARLAGUTAN ROM 14:19

Jadi hara ni i, siparayahanta do tongtong angka pangalaho na mambaen hasosonang jana na marsipadengganan.

1 KORINTUS 14:12

Taringot tu hamu sandiri, huboto do na por rohamunu maruli angka hasurungan sian Tondi i. Tapi anggo na dumenggan, angkon marusaho do hamu laho mamake hamaloon i, mangurupi parlagutan i tu hamajuon.

EPESUS 4:12

Dibaen Ia sasudena i anso singkop do sudena halak na porsaya laho mangoloi Tuhan bope laho mambangun pamatang ni Kristus i.

JUDAS 1:20

Tapi anggo hamu ale angka dongan, tambori hamu ma ngolumunu mardongan haporsayaan tu Tuhan; ias sun do haporsayaanmunu i. Laing martangiang ma hamu mardongan kuaso ni Tondi Parbadia

EPESUS 4:16

Muda Ia do uluan na mamimpin hita, sude angka bagian ni pamatang i maraturan do sude parsusun ni i, na nipadomu-domu ni angka ruasna be na sada tu na asing. Jadi muda denggan do marsikarejohon karejona be angka anggota i songon na sapatutna, gabe mur magodang ma sude pamatang i jana mur margogo markite-hite holong ni roha.

1 KORINTUS 10:23

Ninna halak, “Tola do baenonta sanga na aha giotta.” Tutu do i! Tapi nada sude giotta i marguna. “Tola do baenonta sanga na aha giotta” – tapi nada sude na tahagioti i padenggankon ngolunta.

2 PETRUS 1:12

Hara ni i, angkon laing pupuonku do paingotkon na songon i tu hamu, haru pe nian madung tangkas i di hamu jana na dung situtu hamu porsaya tu hatigoran na sian Debata na nijagitmunu i.

2 KORINTUS 12:19

Betak na dipikir rohamunu do na laho mangabarahon dirinami sandiri hami maradopkon hamu sahonokna on. Di adopan ni Debata dohot Kristus hami dokkon ma: Sasudena i dikarejohon laho patoguhon haporsayaanmunu.

1 KORINTUS 14:29

Taringot tu angka panurirang, denggan do dua sanga tolu halak mangkobari, jana laing manangi-nangi ma anggo na asing i manimbang sanga aha na nidoknia i.

SURAT NI SI PAULUS TU PARLAGUTAN ROM 15:14

Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari.

1 TIMOTEUS 1:4

Paingot ma halahi, anso ulang sai kehe be roha ni halahi tu angka turi-turian bope angka barita ni asal mula na so marnasidung. Hum parohon partangkangan sajo do i jana nada mambaen maju sangkap ni Debata na bisa taboto hum sian haporsayaan sajo.

1 TESSALONIKA 4:10

Jana taringot tuson madung dipatuduhon hamu i maradopkon angka dongan Kristen na di Makedonia sudena. Tapi hamu ale angka dongan, gomos hami pangido tu hamu, anso laing mur tu dengganna dope i nian.

1 KORINTUS 14:5

Denggan sajo do sugari nian malo hamu sude mangkobari di hata na so niastuan. Tapi na dumenggan, sugari nian malo ma hamu sude manyurirangi. Angke gumodang do halak na manyurirangi ulang pado halak na mangkobari di angka hata na so niastuan; asing ma rupani muda adong halak na mangkobari di hata na marragam na so niastuan, tapi laing malo muse ia patorangkon sanga aha na nidoknia i, anso sudena parlagutan i dapotan parsaulian.