1 TESSALONIKA 4:3 - BIBEL JAMITA NA DENGGAN

³ Angka na songon on ma na nipangido ni roha ni Debata sian hamu: Angkon badia do ngolumunu dipangido roha ni Debata jana nada tola marharorangon.

1 TESSALONIKA 4:3 ပူးပေါင်းရင်းမြစ်များ

MASMUR 143:10

Ajari ma au patuluskon hagiot ni rohaMu angke Ho do Debatangku. Sai ditogu TondiMu na burju i ma au di dalan na hornop.

MASMUR 40:8

Jop rohangku patuluskon hagiotMu, ale Debata, tarsimpan do pangajaranMu di bagasan rohangku.”

HAMALIMON 15:18

Muda dung marcampur halaklahi dohot dadaboru, angkon maridi do, tapi laing ramun do halahi lalu tu andospotang.

MATEUS 12:50

Halak na patuluskon na nipangido ni roha ni Damang na di banua ginjang i, i do kahanggingKu, i do ibotongKu, i do dainang.”

MATEUS 15:19

Harana sian roha i do haroroan ni angka pikiran na jat, gabe mamunu jolma, mangalangkup, mambaen na so ture, manangko, margabus, dohot na manilakoi.

MATEUS 5:32

Tapi anggo saonnari Au mandok di hamu: Sanga ise na manyirangkon dadaboruna, asing ni na manyimbil dadaborunia i, bayo i do na mambaen gabe markarosuan dadaborunia i, muda marbagas ma anakboru i. Bayo na mambuat anakboru na songon i pe dohot do i markarosuan.”

MATEUS 7:21

“Nada sude halak na mamiohon Au, ‘Tuhan, Tuhan’, giot masuk tu Harajaan Ni Banua Ginjang. Tapi hum halak na patuluskon hagiot ni Damang na di banua ginjang i do.

MARKUS 3:35

Halak na mambaen lomo ni roha ni Damang, angka i do kahanggingKu dohot ibotongKu dohot Dainang.”

JOHANNES 4:34

Dung i didok Jesus ma, “Anggo sipanganonKi, i ma na mangihutkon hagiot ni na marsuru Au, jana pasidungkon parkarejoan na nilehenNia sikarejohononKu.

JOHANNES 7:17

Sanga ise na ra mangihutkon hagiot ni Debata, botoon ni halahi ma sanga na sian Debata do pangajaranKi, sanga na sian roha-rohangKu sandiri.

BAENON NI ANGKA RASUL 15:20

Tapi angkon laing tatongos ma surat tu halahi paingotkon halahi anso ulang dipangan halahi angka sipanganon na hodar na nihaulkon tu gana-ganaan, sanga markarosuan, sanga pe na mangankon pahan-pahanan na nisongkik sanga mangan mudar. Boti anso laing dipadao halahi dirina sian angka pangalaho na jorngang.

BAENON NI ANGKA RASUL 15:29

Ulang ma pangan hamu sipanganon na nihaulkon tu gana-ganaan, ulang pangan hamu mudar, ulang pangan hamu binatang na nisongkik, jana ulang ma adong sian hamu angka pangalaho na markarosuan. Muda dipadao hamu dirimunu sian angka pangalaho na songon i, na denggan noma baenonmunu. Horas ma di hamu, botima!”

BAENON NI ANGKA RASUL 20:32

Saonnari hupasahat ma hamu tu Debata, anso laing dipature-ture Ia hamu jana anso laing marsitiopan tu jamita na paboahon asi ni roha ni Debata i hamu. Markuaso do Debata laho patoguhon hamu bope laho mangalehen angka pasupasu na dung dipasingkop Ia tu halakNia sudena.

BAENON NI ANGKA RASUL 26:18

mangungkap parnidaan ni halahi anso morot halahi sian hagolapan jana masuk tu na torang; anso malua halahi sian gomgoman ni Sibolis gabe dirajai Debata halahi. Jadi dung porsaya halahi tu Au, niampunan ma sude dosa ni halahi jana gabe anggota na tarpili ma halahi songon halak ni Debata.’ ”

SURAT NI SI PAULUS TU PARLAGUTAN ROM 1:29

Hum na jat noma sude na manggohi roha ni halahi: Hageduhan, ahut tu diri, gutgut dohot dongki; hum na giot mamunu manggohi roha ni halahi, marbadai, paoto-otohon dohot na jingar. Pahata-hata halak,

SURAT NI SI PAULUS TU PARLAGUTAN ROM 12:2

Ulang pahombar hamu dirimunu tu hasiangan on, tapi pauba hamu ma dirimunu markite-hite haimbaruon ni rohamunu anso tartimbang hamu sanga dia do hagiot ni Debata: Na denggan, na tumbuk jana na sanggam.

SURAT NI SI PAULUS TU PARLAGUTAN ROM 6:22

Tapi anggo saonnari, dung dipalua hamu sian dosa jana madung gabe naposo ni Debata hamu, dapotan parbatu anso gabe badia ma hamu, jana ngolu na manongtong do ujungna i.

1 KORINTUS 1:30

Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita.

1 KORINTUS 7:2

Tapi anso ulang targoda di angka pangalaho na markarosuan, dumenggan do ganop halaklahi adong be dadaboruna, bope dadaboru adong be halaklahina sandiri.

2 KORINTUS 12:21

Songon na biar do rohangku, betak sai dipatoruk Debata au di jolomunu muda hutopot hamu. Sak muse do rohangku, bahat sian hamu na mardosa hian nabaruon, patangiskon au hara ni na laing so ra muba jana laing so mantak halahi marpangalaho na so ture, na hodar dohot na so tama.

GALATIA 5:19

Tangkas do karejo na nibaen ni bako humani na jat i di bagasan angka pangalaho on: Na markarosuan, harorangan, hahodaron;

EPESUS 5:17

Ulang hamu maoto, tapi sihiri hamu ma sanga aha giot ni Tuhan i sibaenonmunu.

EPESUS 6:6

Ulang ma hum hatiha dijagoi baen hamu songon i; jana ulang ma hum na giot mambuat roha ni jolma sajo. Tapi angkon gabe songon naposo ni Kristus do hamu na mangoloi hagiot ni Debata sian sandok roha.

KOLOSSE 1:9

I do umbaen na hami tangiangkon hamu tongtong mamungka hami bege taringot tu hamu. Hami pangido do tu Debata anso dilehen Tondi Parbadia nian di hamu hamaloan dohot pangastuion anso diboto hamu tangkas sanga aha na nipangido ni roha ni Debata.

KOLOSSE 3:5

Hara ni i, matehon hamu ma angka hagiot ni portibi on na manyego-nyego dirimunu, i ma angka na mambaen na so ture, pangalaho na hodar, hisap ni sibuk, parhagiot na jahat, na songkal (halak na songkal sarupa do i dohot na marsomba gana-ganaan).

KOLOSSE 4:12

Tabe ni si Epafras di hamu. Laing sian hamu on do asalnia. Naposo ni Jesus Kristus do ia, na sai manangiangkon hamu. Marsitutu do ia mangido tu Debata anso margogo hamu nian jana anso tongtong togu; boti muse anso laing mardongan pos ni roha na togu hamu mangoloi hagiot ni Debata.

1 TESSALONIKA 4:2

Harana madung diboto hamu angka sipaingot na hami lehen i di hamu mangasahon Tuhan Jesus.

1 TESSALONIKA 4:4

Ganop halaklahi sian hamu angkon malo ma mangaririt sada dadaboru na gabe dongan saripena dohot dalan na badia jana na pantun.

1 TESSALONIKA 5:18

Di sude pangalaho na masa, tongtong ma hamu mandok tarimakasi, angke na songon i do dipangido roha ni Debata sian hamu songon angka na mangolu marsada dohot Jesus Kristus.

1 TESSALONIKA 5:23

Debata pardame i ma paiaskon hamu sasudena, dipaburju Ia ma hamu anso hum tuSia sajo ngolumunu. Sai dijagohon Debata ma nian hamu sudena, di tondi, di roha bope pamatangmunu, anso ulang targora lopus tu ari haroro ni Tuhanta Jesus Kristus mangulahi.

2 TESSALONIKA 2:13

Hamu angka dongan na nihaholongan ni Tuhan! Angkon sai tongtong do mandok tarimakasi hami tu Debata hara ni hamu, angke sian mulana madung dipili Debata hian hamu gabe halak sipaluaon. Sian parkarejoan ni Tondi Parbadia, di tonga-tongamunu do sudena i tarjadi laho mambaen hamu gabe halak na ias di Debata, boti hara ni haporsayaanmunu tu jamita na tutu i na sian Debata.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

IBRANI 10:36

Porlu do sobar hamu, jana muda dung dipatulus hamu hagiot ni Debata, jagitonmunu ma janji i.

IBRANI 12:16

Jagohon hamu ma anso ulang adong na gabe siparkamainan sanga na so mangargahon angka pangalaho na badia songon na nibaen ni si Esau. Digadis ia haknia songon anak siangkaan, hum hara ni samangkuk sipanganon.

IBRANI 13:21

Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen.

IBRANI 13:4

Dipatuduhon ganop halak ma sangap di parsaripeonna, hara ni i angkon burju do na mardongan saripe tu donganna saripe i. Halak na markamainan dohot na mambaen na so ture adilan ni Debata do i.

1 PETRUS 1:2

mangihutkon sangkap ni Debata Ama jana na niparbadiai ni Tondi, anso mangoloi Jesus Kristus jana manjagit pamispion ni mudarNia. Mur martamba ma asi ni roha dohot hasonangan di hamu.

1 PETRUS 4:2

Hara ni i, salolot mangolu hamu di tano on tu pudi on, ihutkon hamu ma hagiot ni Debata, ulang be mangihut di hagiot ni jolma hamu.

1 JOHANNES 2:17

Na giot mago do portibi on bope sasudena na adong di bagasanna na nihalungunkon ni jolma. Tapi anggo halak na patulus hagiot ni Debata, mangolu do salolot-lolotna.

HALUMBAAN 21:8

Tapi anggo angka parbiar, angka na so tontu, angka na so ture, sibunu jolma, angka na rogon, angka pardatu-datu, angka na manyomba gana-ganaan dohot sudena pargabus, laut api do inganan ni halahi dohot barerang na gara-gara, i ma hamatean na paduahon i.”

HALUMBAAN 22:15

Tapi sanga ise halak na mambaen habilean, angka na marhadatuon, angka halak na mambaen rorang, angka halak sibunu jolma, angka halak na marsomba gana-ganaan, dohot angka halak pargabus di hatana sanga markite-hite pambaenanna, di balian ni kota i do anggo inganan ni angka halak sisongon i.