1 TESSALONIKA 3:5 - BIBEL JAMITA NA DENGGAN

⁵ Jadi dung so tartaon be lungunna, gabe husuru ma si Timoteus, anso huboto sanga na bia pangalaho ni haporsayaanmunu. Songon na ganggu do rohangku betak na nigoda ni tukang goda i do hamu, gabe sayang sude halojaonnami i.

1 TESSALONIKA 3:5 ပူးပေါင်းရင်းမြစ်များ

JESAYA 49:4

Ningku ma, “Magopo do halolojangku, parcuma do hupuntial gogongku!” Tapi haru songon i pe, pos do rohangku ampinan ni Tuhan do au, balosonNia do di au marguru tu pambaenanku.

DANIEL 6:19

Dung i kehe ma raja i tu bagas godangnia jana nada mangan ia saborngin i; nada disuru ia anso ro angka panghibur, jana nada bisa ia tarpodom.

MATEUS 4:3

Ro ma Sibolis i didok ma tuSia, “Muda Anak Ni Debata do Ho, dokkon ma tu angka batu on anso gabe roti.”

BAENON NI ANGKA RASUL 15:36

Nada sadia honok dung i, didok si Paulus ma tu si Barnabas, “Beta ma tatopoti mangulahi angka dongan sahaporsayaan di sude kota na dung tatopoti i nabaruon, tajamitahon ma disi hata ni Tuhan i, anso laing taida sanga na tarbia do pangalaho ni halahi,” ning ia.

1 KORINTUS 7:5

Ulang ma marsipadaoan halak na saripe, muda so sian tumbuk ni tahi sanga sadia lolotna, anso bisa hamu rap martangiang. Dung i mardomu ma hamu mangulahi, anso unang diuji Sibolis hamu, harana nada tahan hamu marpuaso.

2 KORINTUS 2:11

Hubaen pe songon i, anso ulang adong do dalan di Sibolis i laho mangarajai hita, angke taboto do angka sangkap ni Sibolis.

2 KORINTUS 6:1

Tapi songon dongan saparkarejoan do hami podai hamu, gomos ma hami pangido tu hamu, ulang ma parsayang hamu hadengganan ni roha ni Debata i.

GALATIA 2:2

Huompoti pe kehe tu Jerusalem, hara ni na dung dipatidahon Debata do tu au paboa na angkon kehe au. Jadi di sada pangkataion na buni, jolo mangkobari do au dohot angka halak na idaon songon pamimpin na disi, hupajojor ma tu halahi Jamita Na Denggan na hujamitahon i tu angka halak na so Jahudi. Harana, nada por rohangku gabe sayang boti angka na huhalojahon na salpu i dohot na saonnari.

GALATIA 4:11

Songon na gamang do au, betak na parcuma do halolojangki dibaen hamu!

EPESUS 4:14

Jadi nada be dakdanak hita na so marhatontuan jana na taroban-oban tu jae tu julu baenon ni angka pangajaran na marragam rupa na sian halak na bisuk. Lilu do halak dibaen halahi hara ni malo-malo ni halahi.

PILIPPI 2:19

Mardongan pangurupion ni Tuhan Jesus porsaya do au, manigor tarsuruhon au do si Timoteus manopot hamu; anso tarapul rohangku umbege barita taringot tu hamu.

1 TESSALONIKA 2:1

Hamu ale angka dongan! Tangkas do diboto hamu nada sayang boti haroronami mandapotkon hamu.

1 TESSALONIKA 3:6

Saonnari madung mulak si Timoteus jana madung dipalalu ia barita jop ni roha taringot tu haporsayaan dohot holong ni rohamunu. Pandoknia tu hami, denggan do parningotanmunu taringot tu hami di bagasan rohamunu. Jana por do rohamunu sugari mida hami, laing songon por ni rohanami sugari mida hamu.