1 TESSALONIKA 1:5 - BIBEL JAMITA NA DENGGAN

⁵ Angke di na manjamitahon Jamita Na Denggan i hami tu hamu, nada hum hata-hata sajo na hami jamitahon i, tapi mardongan kuaso na sian Tondi Parbadia do. Jana pos situtu do rohamunu na tutu do Jamita Na Denggan i. Diboto hamu do sanga na bia ngolunami laho manyarihon hamu dompak di tonga-tongamunu hami.

1 TESSALONIKA 1:5 ပူးပေါင်းရင်းမြစ်များ

JESAYA 55:11

laing songon i do hatangKu na haruar sian pamanganKu, nada mulak boti i tu Au; tapi patuluson ni i do hagiotKu, jana marlabo do i di bagasan aha na dung Husuruhon tusia.

MARKUS 16:20

Dung i kehe ma angka siseanNia i pararatkon barita na sian Debata i. Tuhan i pe dohot do markarejo rap dohot halahi laho mangurupi parjamitaon ni halahi. Laing dipatupa Tuhan i muse ma angka tanda ni kuaso dohot angka hahomangan sanga na di dia dibaritahon halahi jamita na sian Debata i.] [

LUKAS 1:1

Ale Teofilus, na niparsangapan! Madung bahat nian angka dongan mangusahohon sadenggan-dengganna laho manyuratkon taringot tu angka na tarjadi di tonga-tonganta.

BAENON NI ANGKA RASUL 11:21

Jadi didongani tangan ni Tuhan do halahi mambaen bahat halak gabe porsaya jana pasahatkon dirina tu Tuhan.

BAENON NI ANGKA RASUL 16:14

Adong ma sahalak sian halahi parjagal abit ungu, si Lidia goarna halak Tiatira. Holong do rohania tu Debata, gabe diungkap Debata ma rohania laho manjagit na niajarkon ni si Paulus tusia.

BAENON NI ANGKA RASUL 2:33

Dipatuginjang do Ia tu inganan ditangan siamun ni Debata, laing dijagit Ia ma sian Ama i Tondi Parbadia na dung nijanjihon hian. Tondi i ma na niusehon saonnari tu hami, jana i ma na nibege dohot na niidamunu angka dongan saonnari.

SURAT NI SI PAULUS TU PARLAGUTAN ROM 1:16

Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing.

SURAT NI SI PAULUS TU PARLAGUTAN ROM 15:13

Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia.

SURAT NI SI PAULUS TU PARLAGUTAN ROM 2:16

Laing songon i ma na giot masa di ari na nitontuhon i. Anggo di ari i hombar tu Jamita Na Denggan na hujamitahon i – uhuman ni Debata ma markite-hite Jesus Kristus sude sibunian ni roha ni jolma.

1 KORINTUS 1:24

Tapi anggo di halak na dung nipiohon ni Debata – halak Jahudi sanga na so Jahudi – anggo jamita i hum Kristus do jana Kristus i ma hagogoan ni Debata dohot hamaloan ni Debata.

1 KORINTUS 10:33

Songon ngolungkon ma parngoluonmunu. Sai huparayak do pasonang roha ni sudena halak di bagasan sasude na hukarejohon, so pola giot mambuat untung di au sandiri. Anggo tujuanku hum on do; anso tarpalua nian halahi sudena.

1 KORINTUS 3:16

Diboto hamu dehe, na Bagas Ni Debata do hamu? Songon i muse na maringanan do Tondi Ni Debata di hamu?

1 KORINTUS 3:6

Au manyuan jana si Apollos ma manyiram, tapi anggo na patubuhon laing Debata do.

1 KORINTUS 4:20

Harana muda Debata do mamarenta ngolu ni sada-sada halak, angkon tanda do i sian hagogoon ni ngolu ni halahi, nada sian hata-hatana.

1 KORINTUS 9:14

Laing songon i muse do na dung diaturkon Tuhan, angkon dapotan balanjo do angka na manjamitahon Jamita Na Denggan i sian parjamitaonna i.

2 KORINTUS 3:6

Ia do na mambaen hami sanggup gabe pangoloi di sada parjanjian na imbaru; i ma parjanjian na marguru tu Tondi Parbadia, nada marguru tu angka aturan na tarsurat. Angke mamatehon do anggo na tarsurat i, hape na sian Tondi Parbadia i, na pangoluhon do.

GALATIA 2:2

Huompoti pe kehe tu Jerusalem, hara ni na dung dipatidahon Debata do tu au paboa na angkon kehe au. Jadi di sada pangkataion na buni, jolo mangkobari do au dohot angka halak na idaon songon pamimpin na disi, hupajojor ma tu halahi Jamita Na Denggan na hujamitahon i tu angka halak na so Jahudi. Harana, nada por rohangku gabe sayang boti angka na huhalojahon na salpu i dohot na saonnari.

GALATIA 5:5

Hara ni Tondi dohot haporsayaanta, arop do rohanta di hatigoran i.

EPESUS 2:10

Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita.

EPESUS 3:20

Markite-hite kuaso ni Debata na marsitutu i markarejo di bagasan dirinta, tarpatupa Debata do dao umbahat dope sian angka na hita pangido dohot na tapikirkon.

PILIPPI 2:13

angke Debata sandiri do na markarejo di bagasan dirimunu, na mambaen hamu gabe ra jana sanggup pasonangkon roha ni Debata.

PILIPPI 4:9

Jana sanga aha na dung niguruhon jana nijagitmunu, dohot sanga aha na dung nibege jana niidamunu sian au, karejohon ma i; gabe donganan ni Debata mual ni hasonangan i ma hamu.

KOLOSSE 2:2

Sai margogo ma nian roha ni halahi, jana marsihaholongan ma halahi anso gabe solkot halahi mardomu. Muda tutu halahi mangarti gabe maruli pos ni roha situtu ma halahi. Jadi mur tangkas muse ma tandaon ni halahi rahasia ni Debata; i ma Kristus sandiri.

1 TESSALONIKA 2:13

Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus.

2 TESSALONIKA 2:14

Anso tusi ma dibaen hamu na nipiohon ni Debata markite-hite Jamita Na Denggan na hami jamitahon i tu hamu. Dipiohon Debata pe hamu, anso laing dohot do hamu nian marsangap rap dohot Tuhanta Jesus Kristus.

2 TIMOTEUS 2:10

Hara ni i do umbaen na huhasobarkon mananggung sudena i pasari-sari angka dongan na dung nipili ni Debata. Hutaon pe sudena i bia anso laing dohot halahi maruli haluaan na di bagasan Kristus Jesus, dohot hasangapan salolot-lolotna.

2 TIMOTEUS 2:8

On ma ingot: Jamita Na Denggan na hujamitahon i, barita taringot tu Jesus Kristus do i, i ma pomparan ni si Daud; i ma Kristus na mulak mangolu i sian hamatean.

IBRANI 10:22

Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan.

IBRANI 6:11

Giotnami nian sugari laing ringgas ma hamu, lopus dijagit hamu na niarop ni rohamunu i.

1 PETRUS 1:12

Dipaboa Debata do tu angka panurirang i sasudena na nibaen ni halahi i laho mangoloi hamu do, jana nada na mangoloi halahi sandiri; i ma taringot tu angka na nibegemunu saonnari sian angka na manjamitahon Jamita Na Denggan. Mardongan kuaso ni Tondi Parbadia na nitongosNia sian banua ginjang do dipasahat halahi na songon i tu hamu. Salang angka surusuruan pe por do rohana mamboto barita na nipaboa ni halahi i.

1 PETRUS 1:3

Mandok tarimakasi ma hita tu Debata bope Ama ni Tuhanta Jesus Kristus! Hara ni denggan ni rohaNia, dibaen Ia do hita gabe jolma na imbaru na maruli arop ni roha na tongtong mangolu, angke madung dipangolu Kristus mangulahi sian hamatean.

1 PETRUS 5:3

Ulang ma songon pambaen ni halak na markuaso baen hamu maradopkon halak na nipasahat tu hamu, tapi gabe tiruan na denggan ma hamu di halahi.

2 PETRUS 1:10

Hara ni i hamu ale angka dongan, mur haburjuhon hamu ma markarejo anso mur togu pamioon ni Debata dohot panodoonNia tu hamu. Muda dipatulus hamu songon i, nada jadi be madabu hamu.

2 PETRUS 1:19

I do umbaen na mur pos rohanami di barita ni Debata na nipaboa ni angka panurirang i. Denggan sajo do sugari dohot hamu mamparate-atehon barita i, angke songon lampu na marsinondang di inganan na golap do barita i jana marsinondang ma i songon sinondang ni bintang di andostorang di bagasan rohamunu.