1 SAMUEL 24:5 - BIBEL JAMITA NA DENGGAN

⁵ Dung i didok parangan ni si Daud i ma tusia, “On ma hatiha hadenggananna di tuan i! Inda he na dung didok Tuhan do tu tuan i, ‘PasahatonKu ma musumu tu ho, baen ma sanga na aha giotmu tusia!’ ” Dung i manyilmuk ma si Daud tu inganan ni si Saul jana sip-sip ma ia manggotap saotik sian topi-topi juba ni si Saul i.

1 SAMUEL 24:5 ပူးပေါင်းရင်းမြစ်များ

2 SAMUEL 12:9

Biasi dipasiding ho angka na Huparentahon? Biasi dibaen ho hajahatan i? Disuru bunu ho si Uria di parporangan; dipadiar ho ma ia dibunu halak Amon, lalu dibuat ho dadaborunia i!

2 SAMUEL 24:10

Tapi dung sidung si Daud na mangetong bangso i, dihilala ia ma na marsala ia, gabe didok ia ma tu Tuhan, “Madung mambaen dosa au! Ale Tuhan, ampuni ma au, angke karejo na oto do na hubaen on.”

2 RAJA-RAJA 22:19

Jana hara ni i gabe manyosal ho jana dipatoruk ho dirimu di jolongKu. Disibakkon ho do pakeanmu jana tangis ho tanda ni marsakmu di na nibegemu ancaman na Hudok giot manguhumi Jerusalem dohot halak na maringanan disi, jana mambaensa gabe panatapan na jorbut, jana goar ni Jerusalem gabe goar bura noma. Tapi madung Hutangihon tangiangmi.

MASMUR 59:11

Ulang bunu halahi, anso ulang lupa bangsongki. Marhite kuasoMu, ayak ma halahi cuka-ciri, taluhon ma halahi, ale Tuhan pangondiannami.

1 SAMUEL 26:8

Dung i didok si Abisai ma tu si Daud, “Madung dipasahat Debata di borngin on musumu tu ho. Paloas ma hupantikkon ia tu tano i dohot tombaknia i sandiri, anso hupangabis ia santiham hubaen, nada pola jabat dua noli baenonku!”