1 SAMUEL 22:23 - BIBEL JAMITA NA DENGGAN

²³ Tongtong ma ho rap dohot au, jana ulang ho mabiar. Sai giot bunuon ni si Saul do ho, tapi au pe laing na giot bunuonnia muse do: Jadi, sonang ma ho di ingananku.”

1 SAMUEL 22:23 ပူးပေါင်းရင်းမြစ်များ

2 SAMUEL 9:7

Didok si Daud ma, “Ulang mabiar ho. Haburjuon do na giot baenonku tu ho marningot si Jonatan, amangmi. Hupaulak ma tu ho sude tano ni ompungmu si Saul, jana mangan di bagas godang noma ho torus.”

1 RAJA-RAJA 1:7

Kehe ma ia martahi dohot si Joab dohot Malim Abyatar. (Inang ni si Joab, margoar si Zeruya.) Satahi ma si Joab dohot Malim Abyatar patulus pangidoan ni si Adonia i.

1 RAJA-RAJA 2:26

Dung i didokkon Raja Salomo ma tu Malim Abyatar, “Kehe ma ho mulak tu hutamu tu Anatot. Patut mate uhumon do ho nian, tapi anggo sadari on nada hubunu ho, angke di hatiha rap dope dohot damang, dohot do ho manaon parkancitannia. Jana ho muse do na pauli-uli Poti Parjanjian ni Tuhan i.”

MATEUS 24:9

Dung i ditangkupi ma hamu, dipasahat ma tu parkancitan anso dibunu. Goyak ma roha ni halak na satano on mida hamu hara ni goarKu.

JOHANNES 15:20

Ingot hamu ma hata na Hudok on tu hamu, ‘Nada gumodang naposo sian morana.’ Muda diparkanciti halahi Au, hamu pe laing parkancitan ni halahi muse do. Muda diihutkon halahi pangajaranKi, laing ihutkonon ni halahi muse ma angka pangajaranmunu.

JOHANNES 17:12

Salolot rap Au dohot halahi di portibi on, madung Hujagohon halahi markite-hite kuaso ni Damang i – i ma kuaso na nilehen ni Damang i tu Au. Madung Huondingi halahi na nipasahat ni Damang tu Au, jana umpe sada sian halahi na mago, asing ni anak mago i; anso laing tulus ma na tarsurat di Buku Na Badia i.

JOHANNES 18:9

Di na nidokNia songon i, tulus ma tarjadi na nidokNia hian; songon on, “Ale Amang, sian sude na nipasahat ni Damang i tu Au, umpe sahalak na gabe mago.”)

1 SAMUEL 23:17

Didok si Jonatan ma tusia, “Ulang ho mabiar, indangkan na lalu ho madabu tu tangan ni amanta. Torang do diboto amanta, ho do gontinia na gabe raja ni Israel jana au ma juguk di torumu.”