1 SAMUEL 2:5 - BIBEL JAMITA NA DENGGAN

⁵ Halak na butongan hian najolo i hara ni sipanganon na marlobi. Saonnari gabe pangomo-omo hum anso dapotan sipanganon sajo. Halak na tangkuraparon najolo, saonnari marsonang-sonang, tuk panganonna. Dadaboru na so maruntungan, saonnari marhamogaan, manubuhon pitu dakdanak! Hape anggo ina sibahat anak, ditadingkon, dipadiar marsak.

1 SAMUEL 2:5 ပူးပေါင်းရင်းမြစ်များ

MASMUR 113:9

Tu ina na so maruntungan dilehen Ia dakdanak, dibaen Ia do i gabe ina na martua. Puji ma Tuhan!

MASMUR 34:10

Angka singa pe markancit hara ni na malean hape dilehen do sude na denggan anggo tu halak na manjalahi Tuhan.

JESAYA 33:9

Ditadingkon ma luat gabe mamolngit. Malos ma angka tombak Libanon, Rura Saron na napu i gabe songon padang halongonan. Mardabuan angka bulung-bulung ni hayu na di Basan dohot Dolok Karmel.

JESAYA 54:1

Marsurak-surak ma, o ale na so maruntungan, na so jungada manyorangkon! Marjop ni roha jana marsurak ma ho marmoga-moga, ale ho na so jungada manaon parhancitan i. Harana umbahat do dakdanak ni na so marhalaklahi sian na marhalaklahi, ninna Tuhan.

JEREMIA 15:9

Markancit ma ina na dung pitunoli tubuan anak, hosana mangkip-angkip. Madung manggolap mataniari disia di tonga ari maila ma ia jana heput. Na tinggal sian halahi lehenonKu ma tu podang di jolo ni musuna songon i ma didok Tuhan.”

LUKAS 1:53

Dipabutong Ia angka halak na male marhite angka na denggan, tapi anggo halak na kayo dipaorot Ia mardongan tangan na rumar.

LUKAS 16:25

Tapi dialusi si Abraham ma, ‘Ingot ma amang: Dompak di ngolumu madung dijagit ho sude angka na denggan, hape anggo si Lasarus hum na jat do. Saonnari sonang ma ia dison, tapi anggo ho markancit ma.

GALATIA 4:27

Angke tarsurat do di Buku Na Badia i, “Marjop ni roha ma ho ale ina na so maruntungan na so jungada manubuhon dakdanak! Marmoga-moga ma ho jana marsurak-surak, ale ho na so jungada mangae manubuhon anak! Harana dadaboru na nitadingkon ni halaklahina umbahat dope dapotsa dakdanak ulang pado dadaboru na rap dohot halaklahina.”

RUT 4:15

Dihaholongi parumaenmi do ho. Madung dilehen ia di ho lobi sian na tarlehen ni pitu halak anak halaklahi. Saonnari madung dilehen ia muse di ho sada pahompu halaklahi na giot mangalehen semangat na imbaru muse di ho laho mangolu, jana na giot markasayahon ho dung matobang ho.”

1 SAMUEL 1:20

Denggan ma pamatang ni Hanna jana sorang ma anakna halaklahi. Dibaen ia ma goarna si Samuel, angke didok ia, “Na hupangido do ia sian Tuhan.”

1 SAMUEL 1:6

Sai na dipahancit ni si Penina do roha ni si Hanna jana diincahi ia imbangnia i hara ni na so dilehen Tuhan anak disia.