1 SAMUEL 19:5 - BIBEL JAMITA NA DENGGAN

⁵ Ma pola martaru hosa ia di na mamunu si Goliat, jana dilehen Tuhan do hamonangan na godang tu Israel markite-hite ia. Diida amang sandiri do na masa i, jana jop do roha ni amang di hatiha i. Jadi biasi ma saonnari giot pusaon ni amang halak na so marsala i jana giot bunuon ni amang si Daud so adong harana?”

1 SAMUEL 19:5 ပူးပေါင်းရင်းမြစ်များ

2 SAMUEL 23:10

anggo si Eleasar laing torus do ia mangalo mangabisi halak Pilistin i lopus loja sajo ia. Jogal tanganna i gabe nada tarpalua ia podangnia i. Dilehen Tuhan do hamonangan godang tu Israel anggo di na sadari i. Mangulahi ma ro tentara ni Israel na mundur nangkin tu inganan ni si Eleasar i mangalo, jana dibukai halahi ma angka baju porang sian bangke na disi.

1 JUJUR TAON 11:18

Umbege i, kehe ma perwira ni si Daud si tolu halak na tarbonggal i mangaloha parbandaran ni halak Pilistin i, ditimba halahi ma aek sian sumur i lalu dioban halahi tu si Daud. Hape nada giot si Daud manginumsa, diduruskon ia do aek i gabe haul tu Tuhan,

MASMUR 109:5

Hajahaton do dibaen halahi balos ni hadenggananku, jana goyak ni roha balos ni holong ni rohangku.

MASMUR 119:109

Sai husabung do tongtong ngolungku, tapi nada huhalupahon anggo TonaMu.

MASMUR 25:3

Sai na pataluon do sanga ise halak na manjehei Ho, na pasti monang do halak na manghaposi Ho.

MASMUR 69:4

Halak na magigi mida au di na so dalanna, umbahat sian obuk na di uluniba. Sai giot agohonon ni angka halak na gogo au, dipahata-hata halahi ma au dohot hata na so tutu. Dipaksa halahi au paulakkon arta na so hurampas.

MASMUR 94:21

Marsatahi halahi mangalo halak na jujur, jana mandabu uhuman mate tu halak na so marsala.

HARURUAR 14:13

Dialusi si Musa ma, “Ulang hamu mabiar! Martahan ma hamu, idaonmunu ma sanga aha sibaenon ni Tuhan laho paluahon hamu sadari on; nada idaonmunu be halak Mesir i.

JEREMIA 26:15

Tapi ingot hamu ma, muda dibunu hamu au, hamu noma dohot halak kota on mananggung hasalaan hara ni pamunuon maradopkon halak na so marsala. Angke Tuhan do na marsuru au laho palaluhon sipaingot i tu hamu.”

MATEUS 27:24

Diida si Latus ma na so marguna be hatania i sude. Aropku mur mambaen gaor ma halahi laho mangalo, ning rohania. Ujungna dibuat ia ma aek. Dibasu ia ma tangannia di jolo ni halak na bahat i. Didok ia ma hatania, “Inda ahana di au muda mate halak na tigor on! Sahat di hamu ma i!”

MATEUS 27:4

Ning ia ma, “Ma mardosa au, manghianat au tu halak na so marsala gabe didabu uhum mamatehon Ia!” Didok halahi ma mangalusi, “Ahana ma i di hami? Urusanmu do i!”

JOHANNES 15:25

Jadi madung songon i pangalahona anso laing tulus na tarsurat i di Buku Tona ni halahi na mandok, ‘Dihosomi halahi do Au haru so binoto sanga hara ni aha.’

BAENON NI ANGKA RASUL 20:24

Tapi nada pola hupardulihon ngolungkon, asalkan ma hupasidung karejo na nipasahat ni Tuhan Jesus tu au jana asal ma sai burju au lopus tu ujung ni ngolungku laho manjamitahon Jamita Na Denggan i, i ma taringot tu asi ni roha ni Debata.

PILIPPI 2:30

Hum hara ni haporluan ni karejo ni Kristus i, saotik nari noma anso mate ia. Martaru hosa do ia di na mangalehen pangurupi tu au hara ni goarmunu.

IBRANI 2:3

songon dia ma he tarbaen hita malua, anggo so taparrohahon do haluaan na songon i godangna? Tuhan i do na mangkatahonna di mulana i, jana na nioban dohot dipatontu tu hita markite-hite angka na umbegena.

HAKIM-HAKIM 12:3

Jadi dung adong pos ni roha di au na so ro be hamu mangurupi hami, jadi gabe hubaranihon noma kehe mamorangi angka halak Amon i, haru pe angkon mate au. Jadi dilehen Tuhan ma di au hamonangan maralohon halahi. Antong, biasi ro hamu pajolohon mamorangi au?”

HAKIM-HAKIM 9:17

na dung marjuang humopkop hamu? Ingot, na dung ditongtangkon ia do hosania paluahon hamu sian angka halak Midian.

1 SAMUEL 11:13

Tapi didok si Saul ma, “Sada halak pe nada tola bunuon di ari sadari on, angke madung dipalua Tuhan Israel di ari sadari on.”

1 SAMUEL 14:45

Tapi mangkuling ma rayat i tu si Saul, “Angkon mate hona uhum ma he si Jonatan? Inda he ia na maroban hamonangan godang on? Nada! Marjanji do hami mangasahon Tuhan na mangolu i, na so tola agoan obuk sangkamata pe si Jonatan sian ulunia. Angke hara ni panolong ni Tuhan do umbaen na dapotan hamonangan ia di ari sadari on.” Songon i ma rayat i paluahon si Jonatan sian uhum hamatean.

1 SAMUEL 19:6

Gabe torang ma roha ni si Saul hara ni hata ni si Jonatan i, jana marsumpa ma ia mangasahon goar ni Tuhan bahaso na so bunuonnia be si Daud.

1 SAMUEL 20:32

Jadi dialusi si Jonatan ma, “Biasi angkon sai mate ia? Aha dosania?”

1 SAMUEL 22:14

Jadi dialusi si Ahimelek ma, “Panglima na umburju do si Daud di raja i! Babere ni raja i sandiri do antong ia, kapala ni pangawal ni raja i sandiri, jana na diparsangapi ni sude halak na adong di bagas godang ni raja i tusia.

1 SAMUEL 28:21

Dipadonok anakboru i ma tu si Saul jana diida ia sun ponjot ni rohana, jadi gabe didok anakboru i ma tusia, “Ale tuan, na manyabung hosangku noma au laho manggohi pangidoan ni tuan i.