1 SAMUEL 12:21 - BIBEL JAMITA NA DENGGAN

²¹ Ulang antong ihutkon hamu angka debata na so tarbaen mangurupi dohot paluahon hamu, angke na so tutu do adong halahi.

1 SAMUEL 12:21 ပူးပေါင်းရင်းမြစ်များ

2 RAJA-RAJA 17:15

Nada ra Israel dohot Juda mangoloi angka parenta ni Tuhan jana nada sintong halahi tu parjanjian na nibaenNia dohot ompu ni halahi. Nada ditangihon halahi muda digorahon Tuhan halahi, tapi marsomba tu gana-ganaan na so marguna do halahi, jadi halahi pe gabe nada marguna be. Mangihut tu tiruan ni angka bangso na humaliang i do halahi haru pe madung dilarang Tuhan.

JESAYA 41:29

Hamu sude nada adong gunana, nada margogo mambaen sanga aha. Patung sajo do hamu na nituang ni tangan ni jolma, gale jana nada margogo.”

JESAYA 45:20

“Ro ma hamu jana marlagut, hamu sude na malua sian tonga-tonga ni angka bangso. Angka halak na mangudur-udurkon patung hayu-hayu, na so marbinoto boti na oto; na martangiang tu angka debata na so bisa mambaen malua.

JESAYA 46:7

Diporsan patung i jana dibaen di ingananna, jongjong sajo noma i disi, jana nada tarbaen pinda. Matua na hohom do i muda martangiang halak tusia, jana nada margogo mangurupisa sian mara.

JEREMIA 10:15

Nada mararga angka gana-ganaan i, sipalayason jana sipabileon do i. Di hadudumpang ni hatihana mago ma halahi sudena.

JEREMIA 10:8

Sude halahi oto jana bodo angke sombaonna hum hayu sajo do, nada tarajarkonsa na marguna.

JEREMIA 14:22

Adong ma he lakna na bisa parohon udan sian tonga-tonga ni debata gana-ganaan ni angka bangso i? Sanga tarbaen langit i ma lakna paporkon udan? Hum Ho do ale Tuhan, Debata na hami haporsayai, na bisa mambaen sasudena i!

JEREMIA 16:19

O Tuhan, Ho do na mangondihon au dohot na margogoihon au; diurupi Ho do au taran di hagogotan. Marroan ma angka bangso sian ujung ni tano on tu Ho jana dokkononna ma, “Hum debata na so tutu jana na so marguna do debata ni ompunami.

JEREMIA 2:13

Harana madung dua noli bangsongKu mambaen na jat: Ditadingkon halahi do Au, aek hangoluan, jana dihuar halahi tobat na lilis na so bisa manahan aek.”

JEREMIA 2:5

Didok Tuhan, “Hasalaan dia do na dumpang ompumunu di Au, umbaen pola mandao halahi sian Au? Disomba halahi do patung na so marguna na mambaen halahi gabe so marguna?

JUNUS 2:8

Angka na manyomba gana-ganaan na so marguna, ditadingkon do Ho jana nada be setia.

JUNUS 2:9

Tapi anggo au endehononku ma puji-pujian di Ho jana huhaulkon haul tu Ho. Patulusonku do sude na hujanjihon. Ho do ale Tuhan na paluahon.”

HABAKUK 2:18

Aha ma he guna ni patung gana-ganaan? Aha ma he guna ni patung gana-ganaan sibaen gabus i? Harana porsaya do na mambaenna di parkarejoanna, hape nian angka gana-ganaan na ngungu do na nibaenna i.

BAENON NI ANGKA RASUL 14:15

“Biasi baenonmunu songon i, hamu ale angka dongan? Laing jolma do hami songon hamu! Na giot manjamitahon Jamita Na Denggan i do hami dison tu hamu angka dongan, anso ditadingkon hamu sudena pangalaho na so marguna on boti anso ro hamu mandapotkon Debata na mangolu i, i ma sitompa langit dohot tano on dohot laut dohot sude na adong di bagasanna.

1 KORINTUS 8:4

Anggo taringot tu na mangankon sipanganon na dung nihaulkon tu gana-ganaan, taboto do, nada adong satutuna anggo na nigambarkon ni gana-ganaan i. Jana tangkas do taboto, anggo Debata hum sada sajo do; nada adong be na asing.

PANGARATAION 11:16

Ulang patola hamu dirimunu dipadao sian Tuhan laho marsomba dohot mangoloi tu angka debata na asing.

PANGARATAION 30:17

Tapi muda nada ra hamu mangoloi dohot manangihon jana dipadiar hamu dirimunu dililuhon laho mamele tu angka debata na asing,

PANGARATAION 32:21

Patung na nipele ni halahi do mambaen muruk Au, tu na nigoaran ni halahi debata mangiburu Au, debata na so tutu Debata. BaenonKu ma sada bangso anso mangiburu halahi muruk tu bangso ni angka jolma na bodo i satutuna nian bangso na so adong do i.