1 SAMUEL 1:17 - BIBEL JAMITA NA DENGGAN

¹⁷ Dung i ninna si Eli ma, “Antong anggo songon i do, mulak ma ho dibagasan sonang. Sai dipatulus Debata ni Israel ma nian pangidoanmi.”

1 SAMUEL 1:17 ပူးပေါင်းရင်းမြစ်များ

PAMUNGKAAN 25:21

Dibaen nada maruntungan si Ribka, martangiang ma si Ishak tu Tuhan salaho tu dongan saripenia i. Jana dipatalus Tuhan do tangiang ni si Ishak i, jana denggan ma pamatang ni si Ribka.

2 SAMUEL 15:9

Dialusi raja i ma, “Antong kehe ma ho.” Dung i kehe ma si Absalom tu Hebron.

2 RAJA-RAJA 5:19

Ning si Elisa ma, “Horas ma ho di na mulak.” Jadi kehe ma si Naaman. Nada sadia honok dung kehe si Naaman,

1 JUJUR TAON 4:10

Tapi martangiang ma si Jabes tu Debata na nisomba ni halak Israel, ning ia ma, “O Debata, pasupasu ma au jana sugari pabidang ma nian luat di au. Jagohon ma au jana padao ma parmaraan anso ulang marhancit au.” Jana tulus do tangiangnia i dibaen Debata.

MARKUS 5:34

Gabe didok Jesus ma tu anak boru i, “Ale anakKu, haporsayaanmi do na paluahon ho. Kehe ma ho di bagasan hahorasan, jana malum ma dihilala ho!”

LUKAS 7:50

Tapi didok Jesus ma tu dadaboru i, “Haporsayaanmu do na paluahon ho, kehe ma ho di bagasan hahorasan!”

LUKAS 8:48

Didok Jesus ma tusia, “Madung dipamalum haporsayaanmi ho da inang. Kehe ma ho, dibagasan sonang!”

HAKIM-HAKIM 18:6

Dialusi malim i ma, “Ulang hamu gamang. Madung dipartuai Tuhan langkamunu on.”

1 SAMUEL 1:16

Ulang antong dietong au dadaboru na so hasaya. Hara ni marsak ni rohangku do dibaen na martangiang au songon on.”

1 SAMUEL 1:23

Dialusi si Elkana ma, “Antong denggan, patulus ma sanga aha na denggan diida ho; di bagas ma ho lopus mantak managuk anakta i. Jana sai tulus ma janjimi dibaen Tuhan.” Jadi laing di bagas ma si Hanna tinggal lopus mantak managuk anaknia i.

1 SAMUEL 20:42

Dung i didok si Jonatan ma tu si Daud, “Sai didongani Debata ma ho. Jagohonon ni Tuhan do anso togu hita maniop janjinta na dua dohot pomparanta di adopan ni Debata.” Dung salpu i, kehe ma si Daud, jana si Jonatan pe mulak ma tu kota.

1 SAMUEL 25:35

Dung i dijagit si Daud ma sanga aha na nioban ni si Abigail i disia, lalu didok ma tusia, “Mulak ma ho tu bagasmu jana ulang be gamang ho. Huoloi do pangidoanmi.”

1 SAMUEL 29:7

Antong mulak ma ho di bagasan dame, jana ulang baen sanga aha na mangalap-alapi rimas ni halahi.”