1 PETRUS 3:18 - BIBEL JAMITA NA DENGGAN

¹⁸ Angke sanoli sajo do mate Kristus hara ni dosanta ro di salolot-lolotna – i ma sada halak na so marsala, na mate humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi.

1 PETRUS 3:18 ပူးပေါင်းရင်းမြစ်များ

DANIEL 9:26

Di ujung ni hatiha i hona bunu ma pamimpin na nitodo ni Debata i, hape nada adong nian salania. Jadi ro ma tentara ni sada raja na gogo, sego-segoonnia ma kota Jerusalem dohot Bagas Ni Tuhan i. Ro ma hatiha parujungan i songon aek na magodang na maroban porang dohot hasegoan, laing songon na nisangkapkon ni Debata.

ZAKARIA 9:9

Ale boru Sion, marjop ni roha ma ho! Marolop-olop ma hamu ale pangisi ni Jerusalem! Ligi ma! Ro rajamu mardongan hamonangan! Raja na tigor do Ia na maroban haluaan. Na serep roha do Ia, jana mangalombut halode, sada halode jara-jara.

MATEUS 27:19

Taran juguk si Latus di inganan panguhuman i, ditonahon dadaborunia ma tusia, “Indangkon sai antoi parkaro ni bayo na so marsala i. Harana jatjat do nipingku saborngin on hara ni Ia.”

MATEUS 27:24

Diida si Latus ma na so marguna be hatania i sude. Aropku mur mambaen gaor ma halahi laho mangalo, ning rohania. Ujungna dibuat ia ma aek. Dibasu ia ma tangannia di jolo ni halak na bahat i. Didok ia ma hatania, “Inda ahana di au muda mate halak na tigor on! Sahat di hamu ma i!”

JOHANNES 16:10

hara ni hatigoran jana hara ni na kehe Au mandapotkon Damang, jana nada idaonmunu be Au;

BAENON NI ANGKA RASUL 22:14

Dung i didok ia ma tu au, ‘Madung dipili Debata ni angka ompunta i ho anso diboto ho hagiotNia boti anso diida ho na tigor i huhut manangihon soraNia sandiri.

BAENON NI ANGKA RASUL 3:14

Ditulak hamunu do Na Badia jana Na Tigor i, jana dipangido hamunu do anso dipalua sibunu jolma i.

SURAT NI SI PAULUS TU PARLAGUTAN ROM 1:4

tapi mangihutkon hadebataon tangkas do ia Anak Ni Debata na gok hagogoan. Tanda sajo do i botoon markite-hite hangongotNia sian na mate i.

SURAT NI SI PAULUS TU PARLAGUTAN ROM 4:25

i ma Jesus na dung dipasahat hara ni angka pangalaosionta, jana na nipangolu salaho tu hatigoranta.

SURAT NI SI PAULUS TU PARLAGUTAN ROM 5:2

Markite haporsayaan tuSia muse do hita dapotan dalan masuk tu asi ni roha ni Debata. Di bagasan asi ni roha i do hita mangolu, jana marmoga-moga di bagasan arop ni roha tu hamuliaan ni Debata!

SURAT NI SI PAULUS TU PARLAGUTAN ROM 8:11

Muda Tondi Ni Debata na pangoluhon Jesus sian hamatean i do mangolu di bagasan dirimunu, jadi pangoluonNia muse ma pamatangmunu na ra mate i, songon Kristus na nipangoluNia sian hamatean i, markite-hite TondiNia na mangolu i di bagasan hamu.

SURAT NI SI PAULUS TU PARLAGUTAN ROM 8:3

Sanga aha na so tarpatupa Tona i, hara ni bako ni hajolmaonta na gale, madung dibaen Debata. Madung ditaluhon Debata do kuaso ni dosa na di bagasan bako ni jolma i, i ma markite-hite na marsuru AnakNia sandiri, na ro di bagasan pangalaho na sarupa dohot jolma pardosa, laho manyesa dosa.

2 KORINTUS 1:24

Nada pola hupaksahon sanga na aha tu hamu taringot tu sihaporsayaanmunu, harana na dung porsaya situtu do hamu. Hum na rap markarejo do au dohot hamu anso mur marjop ni roha hamu.

2 KORINTUS 13:4

Nian anggo dompak na niparsilangkon i Ia, gale do Ia tutu, hape anggo saonnari mangolu do Ia hara ni kuaso ni Debata. Hami pe gale do di bagasan Ia, tapi angkon mangolu do hami rap dohot Ia salaho tu hamu hara ni kuaso ni Debata.

2 KORINTUS 5:21

Nada mardosa Kristus i, hape gabe dosa do Ia dibaen Debata jana dipaporsankon do tuSia dosanta i, anso tajagit hatigoran ni Debata hara ni hasadaonta dohot Kristus i.

GALATIA 1:4

na dung mangalehen diriNa hara ni dosanta, laho paluahon hita sian hajahatan saonnari, mangihutkon hagiot ni Debata Amanta i.

GALATIA 3:13

Madung ditobus Kristus hita sian bura ni Tona i, markite-hite na gabe bura hara ni hita, angke tarsurat do, “Na hona bura do sanga ise na hona gantung di hayu parsilang.”

EPESUS 3:12

Dohot dalan mangkaporsayai Kristus bope hara ni na mardomu dohot Ia, dipatola ma hita laho mandonohi Debata mardongan haporsayaan na gok.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

IBRANI 10:10

Madung dipatulus Jesus Kristus sanga aha na nidok ni Debata baenonNia. Hara ni i ma umbaen na nipaias hita sudena sian dosa markite-hite haul i, i ma Jesus sandiri – na nihaulkon sanoli sajo ro di salolot-lolotna.

IBRANI 9:14

mur ma mudar ni Kristus! Markite-hite Tondi na manongtong, dihaulkon Kristus do diriNia sandiri tu Debata gabe haul na sanggam. Dipaias mudarNia i do taroktokta sian angka karejo na so marguna, anso tarbaen hita dohot mangoloi karejo na so marguna, anso tarbaen hita dohot mangoloi Debata na mangolu i.

IBRANI 9:26

Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri.

IBRANI 9:28

Laing songon i do Kristus i, hum sanoli sajo do Ia nihaulkon songon haul laho manyesa dosa ni bahat halak. Ro dope Ia nian paduanolihon tapi nada mamorsan dosa be; na giot paluahon angka jolma na paintehon haroroNia noma.

JAKOBUS 5:6

Diuhum jana dibunu hamu do angka halak na so marsala, hape nada mangalo halahi tu hamu.

1 PETRUS 3:19

Di pangalaho na songon i ma Ia kehe paboahon jamita na sian Debata tu angka tondi na hona hurung:

1 PETRUS 4:1

Dibaen madung manaon parkancitan Kristus mangihutkon parsibuhon, hamu pe angkon laing papironmunu do rohamunu dohot parngoluan na songon i. Angke sanga ise na manaon mangihutkon pangkilalaan parsibuhon, nada ra be i mambaen dosa.

1 PETRUS 4:6

Hara ni i muse ma umbaen na nijamitahon muse Jamita Na Denggan i tu angka jolma na dung mate. Anso niuhum halahi haru pe na dung mamolus hamatean halahi – laing songon jolma na asing i sasudena – harana anggo di pangalaho partondion laing na mangolu do halahi sian hangoluan ni Debata sandiri.

1 JOHANNES 1:9

Muda taoku dosanta, gabe na bonar jana na tigor do Ia, jadi sesaonNia ma dosanta jana dipaias Ia hita sian sasude hageduhan.