1 PETRUS 1:10 - BIBEL JAMITA NA DENGGAN

¹⁰ Haluaan on do na nitangkasan dohot na nisihiran ni angka panurirang na paboahon hian taringot tu pasupasu i na giot lehenon ni Debata tu hamu.

1 PETRUS 1:10 ပူးပေါင်းရင်းမြစ်များ

PAMUNGKAAN 49:10

Tiopon ni si Juda ma tungkot harajaon. Mamarenta ma pomparanna sapanjangna. Marroan ma angka bangso pasahat somba-sombana. Jana manungkap tanda tunduk di jolona.

PODA 2:4

Jalahi ma i songon na manjalahi sere, jana kojar ma i songon na mangkojar arta na buni.

DANIEL 2:44

Di hatiha ni angka raja-raja i mamarenta, giot pajongjongon ni Debata na di banua ginjang i ma sada harajaan na manongtong sapanjangna jana na so tartaluhon bangso dia pe. Roncohonon ni harajaan na sada i ma sandok harajaan na asing i tapi harajaan na sada i, manongtong do ro di salolot ni lolotna.

DANIEL 9:3

Dung i huadopkon ma bohingku tu Tuhan Debata lalu martangiang mangido huhut marpuaso. Jana mamake baju siluluton jana juguk di ginjang ni abuan.

HAGAI 2:7

HuturonKu ma sandok bangso. Jadi marroan ma angka arta hasudungan ni roha ni saluhut angka bangso, jana gokanKu ma Bagas on dohot hagodangan, ninna Tuhan Na Markuaso i.

ZAKARIA 6:12

Palalu tusia na Hudok, Au Tuhan Na Markuaso mandok tusia, ‘Halak na margoar Tumbur i manjadi do karejonia sanga na di dia pe inganannia jana paulionnia ma mangulahi Bagas Ni Tuhan.

MATEUS 13:17

Tutu do na Hudok on! Harana bahat do panurirang na jolo dohot halak na burju mangoloi Debata malungun marnida na niidamunu saonnari, hape inda habolasan halahi laho marnidasa. Malungun do halahi manangihon na nibegemunu saonnari, hape inda sanga tarbaen halahi laho manangihon.”

MATEUS 26:24

Tutu nian, angkon kehe do Anak Ni Jolma i songon na dung tarsurat hian di Buku Na Badia i paboa na angkon mate Ia. Tapi marjaya ma halakna i na manghianat tu Anak Ni Jolma i! Sugari gumonan hian do indangkon sai jungada ia sorang!”

LUKAS 10:24

Hara ni i ingot ma: Bahat do angka panurirang dohot raja na malungun marnida na niidamunu saonnari on hape nada tarbaen halahi marnidasa. Lungun sajo do roha ni halahi umbege on, hape nada tarbaen halahi be umbegesa.”

LUKAS 24:44

Dung i mandok hata ma Ia tu halahi ning Ia ma, “Angka on ma na Hupaboa hian di hamu, dompak rap dope Au dohot hamu, angkon tarjadi do sudena sanga aha na tarsurat taringot tu Au di angka Buku Ni si Musa dohot buku ni angka panurirang dohot Masmur i.”

JOHANNES 5:39

Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au!

JOHANNES 7:52

“Adong he na halak Galilea ho? Pareso jolo di Buku Na Badia i. Nada adong panurirang na ro sian Galilea!” [

BAENON NI ANGKA RASUL 10:43

Sude do angka panurirang manaringoti Ia. Didok halahi, dapotan hasesaan ni dosa do sudena halak na porsaya tu Jesus, markite-hite goarNia.”

BAENON NI ANGKA RASUL 17:11

Umburju do roha ni halak Berea ulang pado halak na di Tessalonika. Jop do roha ni halahi umbege barita taringot tu Jesus, jana ganop ari do dipareso-reso halahi Buku Na Badia i laho patangkaskon sanga na tutu do na niajarkon ni si Paulus.

BAENON NI ANGKA RASUL 28:23

Jadi ditontuhon halahi ma sada ari parsuoan ni halahi dohot si Paulus. Bahat do halak marroan tu inganan ni si Paulus di ari i. Sian manyogot lalu tu potang dipajojor jana dijamitahon si Paulus ma tu halahi barita taringot tu Harajaan Ni Debata. Didokkoni si Paulus ma angka ayat sian Buku Ni si Musa bope Buku Ni angka Panurirang anso dihaporsayai halahi nian Jesus.

BAENON NI ANGKA RASUL 7:52

Adong dehe panurirang na so diparkanciti ni angka ompungmunu i? Dibunu halahi do angka suruan ni Debata na mambaen boa-boa narobi, paboa na angkon ro ma Partigor i. Jana saonnari dihianati jana dibunu hamu do Naposo Ni Debata i.

IBRANI 11:13

Di bagasan haporsayaan i, madung mate halahi sude. Nada dijagit halahi dopena janji i, tapi di tatap halahi do i sian na dao. Jadi pos jana jop do roha ni halahi marnidasa, jana dioku halahi do, bahaso pangaranto dohot paisolat do halahi di tano on.

IBRANI 11:40

angke adong dope sangkap ni Debata na dumenggan salaho tu hita. Angkon rap do dohot hita anso gabe sanggam halahi.

1 PETRUS 1:11

Ditangkasi halahi do sanga na bia dohot andigan hamamasa ni na nidok ni Tondi Ni Kristus i, na adong di bagasan halahi. Dipaboa Tondi i hian do hatiha i tu halahi taringot tu angka parkancitan na angkon taonon ni Kristus dohot taringot tu hagodanganNia na giot ro dung salpu parkancitanNia i.

1 PETRUS 1:13

Hara ni i hobas ma hamu. Jonggor ma hamu jana mararop ni roha situtu di pasupasu na giot lehenonNa tu hamu di haroro ni Jesus Kristus muse.