1 KORINTUS 8:6 - BIBEL JAMITA NA DENGGAN

⁶ Tapi anggo di hita, hum sada sajo do Debata. Ia do Ama na manjadihon sasudena na adong. Na giot diSia do ngolunta on. Tuhan pe hum sada sajo do, i ma Jesus Kristus. Markite-hite Ia dijadihon ma sasudena jadi hara ni Ia do umbaen na mangolu hita.

1 KORINTUS 8:6 ပူးပေါင်းရင်းမြစ်များ

JESAYA 46:9

Ingoti di bagasan rohamu sude na masa na salpu angka pangalaho na tarjadi najolo. Okui ma, na so adong Debata asing sian Au nada adong na sarupa dohot Au.

JEREMIA 10:6

Nada adong tudosanMu, ale Tuhan! Sangap jana marsahala do goarMu.

JEREMIA 10:7

Ise ma he na so mabiar marnida Ho, ale Raja ni sandok bangso? Tutu ma da, Ho do na patut sipujion jana na patut pasangapon. Sian sandok na pistar di tonga-tonga ni angka bangso dohot sian sude angka raja ni halahi, sahalak pe nada adong martudosan tu diriMu ale Tuhan.

JUNUS 1:9

Dialusi si Junus ma, “Halak Ibrani do au. Tuhan Debata na di banua ginjang i do husomba, i ma na manompa laut dohot darat.”

MALEAKI 2:10

Inda he sisada ama hita on sude? Nada he sada do Debata na manompa hita on sude? Antong, biasi dehe marsiosean janji hita on? Biasi muse taose parjanjian na nibaen ni Debata dohot ompunta i?

MATEUS 11:27

“Madung dipasahat Damang do tu Au, sandok na adong. Nada adong na mananda Anak i asing sian Damang. Nada adong muse na mananda Ama i asing sian Anak i, dohot tu halak na ra Jesus papatarkonsa.”

MATEUS 28:18

Gabe dipadonok Jesus ma tu halahi, didok Ia ma hata, “Sude kuaso na di banua ginjang dohot di tano on, madung dipasahat tu Au.

JOHANNES 1:10

Di portibi on do Hata i, markite-hite Ia do dijadihon portibi on, hape nada ditanda portibi on Ia.

JOHANNES 1:3

Sasudena do dijadihon markite-hite Ia, jana sian sasude na adong, sangkamata pe nada adong na nijadihon, so marhite sian Ia.

JOHANNES 10:30

Sada do Au dohot Damang.”

JOHANNES 13:13

Digoari hamu do Au Guru dohot Tuhan. Tutu do na nidokmunu i; harana Guru do Au tutu jana Tuhan.

JOHANNES 14:20

Di hatiha i tangkas ma botoonmunu, na di bagasan Damang do Au, hamu pe di bagasan Au jana Au di bagasan hamu.

JOHANNES 17:3

On ma hangoluan na so mantak; anso ditanda halak Ama i, sasada Ia do Debata na tutu, jana mananda Jesus Kristus na nisuruhon ni Ama i.

JOHANNES 20:17

Didok Jesus ma tu si Maria, “Ulang jama Au jolo, harana nada podo manaek Au tu Damang. Kehe ma ho mandapotkon angka kahanggingKu jana paboa ma tu halahi, ‘Manaek ma Au tu Damang, i ma Amangmunu muse; tu DebatangKu, i ma Debatamunu muse.’ ”

BAENON NI ANGKA RASUL 17:28

Harana, “Mangolu pe hita jana manggulot sanga pe adong hita, di bagasan Ia do.” Laing songon na nidok ni angka parumpama di hamu on, “Angka pomparanNia do hita.”

BAENON NI ANGKA RASUL 2:36

“Hara ni i ma angkon gabe sude halak Israel tangkas umboto bahaso Jesus na niparsilangkonmunu i, laing Jesus i muse do na nibaen ni Debata gabe Tuhan dohot Kristus!”

BAENON NI ANGKA RASUL 5:31

Jana madung dipabangkit Debata Ia markite tangan siamunNia gabe Pamimpin dohot Sipalua; anso marhamubaan ni roha dohot manjagit hasesaan ni dosa Israel i.

SURAT NI SI PAULUS TU PARLAGUTAN ROM 11:36

Angke sian Ia, jana markite-hite Ia, jana tuSia do sudena na adong. DiSia ma hasangapan ro di salolot ni lolotna! Amen.

1 KORINTUS 1:2

tu parlagutan ni Debata na di Korintus, i ma angka na diparbadiai di bagasan Kristus Jesus jana na nipiohon gabe angka halak na badia, dohot tu sude halak di sude ingananna, na mamiohon goar ni Tuhanta Jesus Kristus, i ma Tuhan ni halahi dohot Tuhanta.

1 KORINTUS 12:3

Hara ni i hupabotohon ma tu hamu anggo halak na dipimpin ni Tondi Parbadia nada tardok halahi, “Sai hona bura ma Jesus!” Laing songon i muse nada adong sahalak pe na malo mandok, “Jesus do Tuhan!” anggo inda digohi Tondi Parbadia halakna i.

1 KORINTUS 6:13

Adong muse do deba na mandok, anggo sipanganon tu butuha do i, jana butuha i pe tu panganon do i diparade. Hape dua-duana i giot soadahonon ni Debata do. Nada tola pakeon pamatang ni jolma i tu na so ture, tapi hum tu angka pangalaho na porlu di Tuhan do. Jana Tuhan i pe dibaen Ia do angka pangalaho na porlu tu pamatang i.

1 KORINTUS 8:4

Anggo taringot tu na mangankon sipanganon na dung nihaulkon tu gana-ganaan, taboto do, nada adong satutuna anggo na nigambarkon ni gana-ganaan i. Jana tangkas do taboto, anggo Debata hum sada sajo do; nada adong be na asing.

EPESUS 1:3

Pinuji ma Debata, Ama ni Tuhanta Jesus Kristus! Dipasupasu Ia do hita dohot sude ragam-ragam ni pasupasu partondion sian banua ginjang, hara ni na dung mardomu i hita dohot Kristus.

EPESUS 3:14

Hara ni i ma umbaen na marsinggang au di adopan ni Ama i.

PANGARATAION 4:35

Dipatuduhon Tuhan do sudena i tu hamu laho patorangkon na sasada Ia do Debata, jana nada adong be na asing.

PANGARATAION 4:39

Antong sadari on, ingot jana na so tola lupa hamu: Debata di langit dohot di ginjang ni tano on do Tuhan. Nada adong debata na asing be.

PANGARATAION 6:4

Ingot hamu ma, angka dongan! Hum Tuhan, jana Tuhan sajo do Debatanta!

KOLOSSE 1:6

Mur rarat do barita na sian Debata tu portibi on sudena, jana madung dipasupasu ngolu ni jolma hara ni barita i, songon na masa tu ngolumunu. Sian mula-mulana dibege hamu taringot tu asi ni roha ni Debata jana tutu do diauhon hamu, ngolumunu pe madung dipasupasu.

1 PETRUS 1:21

Markite-hite Ia do porsaya hamu tu Debata na pangoluhon Ia mangulahi sian hamatean dohot na pasangapkon Ia. Jadi Debata do na nihaporsayaanmunu jana laing tu Debata muse ma hamu mararop ni roha.

HALUMBAAN 1:18

Au do Na Mangolu i! Madung mate hian Au, tapi ligi ma, na mangolu do Au salolot-lolotna. Guru di Au do hamatean dohot inganan ni angka jolma na dung mate.