1 KORINTUS 4:7 - BIBEL JAMITA NA DENGGAN

⁷ Ise dehe na mambaen hamu marhasurungan sian na asing? Nada he na nijagitmunu do sude sian Debata? Antong biasi ma he manggodang diri hamu songon dia ma na adong di hamu songon na so nilehen i di hamu?

1 KORINTUS 4:7 ပူးပေါင်းရင်းမြစ်များ

PODA 2:6

Tuhan do na mangalehen habisuhon; sian Ia do dapot jolma parbinotoan dohot pangastuion.

JEHESKIEL 29:3

Jana dohononmu ma: Songon on do hata ni Tuhan Debata, “Ligi ma, musumu do Au ale Raja Parao, raja ni Mesir, buaya na godang i na manggompang di tonga-tonga ni batang aek, na mandok: Au do nampuna Batang aek Nil jana au do mambaen i.

DANIEL 5:18

Dibaen Debata Na Gumincat i do si Nebukadnesar simatobang ni raja i gabe raja bolon jana dilehen tusia hagodangan bope habonggalan.

DANIEL 5:23

Padorgak diri do raja i maradopkon Na Markuaso di banua ginjang i jana puluk do raja i marsuru maroban masuk angka mangkuk na hona rampas sian Bagas Na Badia i. Dung i minum anggur ma raja i, angka na sangap, angka dadaboruna be songon i dohot angka gundik ni raja i sian mangkuk na ni rampas i. Dipuji-puji raja i do angka debata na dibaen sian sere, perak, tumbaga, bosi, hayu dohot batu, i ma angka debata na so marnida sanga marbinege sanga mangastui bagi aha. Nada dipasangap raja i Debata na manontuhon ngolu dohot hamamate ni raja i dohot na manontuhon pardalanan ni ngolu ni raja i.

LUKAS 19:13

Tapi dompak so kehe ia, dipiohon ia ma sampulu halak naposonia jana dilehen ia ma tu halahi sada be hepeng sere. ‘Marjagal ma hamu, hepeng on ma pake hamu salolot so dison au,’ ning ia tu halahi.

JOHANNES 1:16

Angke sian hagogokNia, nada mar na mantak Ia, mamasumasu tu hita sudena.

JOHANNES 3:27

Dialusi si Johannes ma, “Nada tarbaen jolma mangkarejohon bagi na aha pe, anggo so dilehen Debata i disia.

SURAT NI SI PAULUS TU PARLAGUTAN ROM 1:5

Markite-hite Ia do hami jagit asi ni roha dohot karejo ni rasul laho manogu-nogu angka bangso anso porsaya halahi jana mangoloi goarNia.

SURAT NI SI PAULUS TU PARLAGUTAN ROM 12:3

Markite-hite asi ni roha na nilehen di au, hupaingot ma hamu ganup marsada-sada ulang ma dipikiri hamu taringot tu hamu lobi sian na patut, tapi intap ni na patut ma parrohaonmunu, mangihutkon haporsayaan na diturpukkon ni Debata tu hamunu.

SURAT NI SI PAULUS TU PARLAGUTAN ROM 12:6

Laing songon i ma hita manjagit silehen-lehen na marasing-asing mangihutkon asi ni roha na dung dilehen tu hita. Halak na manjagit silehen-lehen anso manyurirangi, angkon karejohonon ma i mangihutkon haporsayaannia.

1 KORINTUS 15:10

Tapi hara ni asi ni roha ni Debata, madung gabe songon au na adong saonnari on, au. Jana nada parcuma na niampunan ni Debata au. Hape gabe lumoja dope au markarejo sian sude rasul na asing i. Tapi i pe sudena, nada hara ni usahongku i; usaho ni Debata na mangakaholongi au do i jana na markarejo rap dohot au.

1 KORINTUS 3:5

Jolma na bia ma he pola si Apollos? Jana tarbia muse si Paulus? Pangoloi ni Debata sajo do hami na dua, na dung manogu-nogu hamu anso porsaya tu Debata. Karejo na nipasahat ni Tuhan i tu hami be, i sajo do na hami dalankon.

1 KORINTUS 5:6

Nada denggan anggo na manggodang diri i hamu! Ning rohangku diboto hamu do pandohan on, “Saotik pe ragi i, gabe kombang do sude adonan i!”

1 KORINTUS 7:7

Anggo satutuna nian, gumonan do didok rohangku sugari songon au on sudena halak. Tapi bia ma baenon, paasing-asing be do silehen-lehen na nijagit sian Debata. Deba songon on do hasurungan na nijagitna, hape na asing nada songon i.

JAKOBUS 1:17

Ganop silehen-lehen na denggan jana na sanggam sian banua ginjang i do ro; na nipaijur ni Debata na manompa sasudena na torang di langit i do sudena i. Ia do Debata na so muba-uba, jana nada mandao muse Ia sian hita, gabe adong do tading halinuNa humaliang hita.

1 PETRUS 4:10

Ganop be do hamu angka dongan manjagit silehen-lehen na paasing-asing sian Debata. Jadi hara ni i, songon parkobas na denggan di angka silehen-lehen ni Debata i, pake hamu ma angka silehen-lehen i anso marguna tu haporluanmunu sama hamu.