1 KORINTUS 13:1 - BIBEL JAMITA NA DENGGAN

¹ Sugari tarbaen iba mangkobari di angka hata ni jolma, dohot di hata ni surusuruan, hape inda nihaholongan angka dongan na asing, tudos ma iba songon doal na maruolol sanga songon canang na mangkuling-kuling.

1 KORINTUS 13:1 ပူးပေါင်းရင်းမြစ်များ

MASMUR 150:5

Puji ma Ia mardongan doal na doring, puji ma Ia mardongan simbal na mardarang.

MATEUS 25:45

Alusan ni Raja i ma, ‘Tangkas ma jolo tangihon hamu: Di na so ra hamu mangurupi sahalak sian na umdangol on, etongon na so ra do hamu mangurupi Au.’

MARKUS 16:17

Anggo tu angka na porsaya lehenon ma angka tanda-tanda ni kuaso sisongon on: Usiron ni halahi ma angka setan mamake goarKu. Mangkobari ma halahi dohot hata na so binoto ni halahi.

SURAT NI SI PAULUS TU PARLAGUTAN ROM 14:15

Tapi muda hara ni sanga aha na nipanganmunu, gabe hancit roha ni donganmu sahaporsayaan, jadi nada marojahan tu holong ni roha be hamu disi. Muda na dung mate Kristus hara ni sada-sada halak, ulang ma padiar hamu sego halahi patunda ni na nipanganmunu.

1 KORINTUS 12:10

Tu na sada dilehensa kuaso mambaen hahomangan jana tu na asing dilehen muse hasurungan laho manyurirangi. Tu na asing muse dilehen Tondi i do gogo laho patandahon parasingan ni silehen-lehen ni gogo na sian Tondi Parbadia dohot na so sian Tondi Parbadia. Adong do i na nilehen gogo laho mangkobari dohot hata na marragam-ragam boti na so niastuan, jana adong muse do na nilehen gogo laho patorangkon angka hata na marragam i.

1 KORINTUS 12:16

Jana muda didok pinggol, “Nada masuk tu bagian ni pamatang au, harana inda mata au,” nada gabe so masuk tu bagian ni pamatang pinggol i.

1 KORINTUS 12:8

Tu na sada dilehen Tondi i do hamaloon mandok hata di bagasan habisuhon, jana tu na asing, dilehen Tondi i do hamaloon mandok hata di bagasan parbinotoan.

1 KORINTUS 13:8

Nada ra luntur holong ni roha i. Anggo hamaloon laho manyurirangi, di sada hatiha abis do i dibaritahon. Taringot tu hamaloon laho mangkobari di hata na marragam-ragam na so niastuan i, di sada hatiha mago do i. Taringot tu hamaloon laho mangastui sasude, sada hatiha mago do i.

1 KORINTUS 14:2

Sanga ise na mangkobari di hata na so niastuan, nada tu jolma ia mangkobari; tu Debata do ia mangkobari. Nada diastui halak sanga aha na nidokna i, angke Tondi Parbadia do na mambaen ia mandokkon angka pangalaho na binoto ni Debata.

1 KORINTUS 14:4

Sanga ise na mangkobari di hata na so niastuan, hum dirinia sajo do na nipatogunia, hape anggo halak na manyurirangi, i do na mangurupi parlagutan i anso mur tu majuna.

1 KORINTUS 14:5

Denggan sajo do sugari nian malo hamu sude mangkobari di hata na so niastuan. Tapi na dumenggan, sugari nian malo ma hamu sude manyurirangi. Angke gumodang do halak na manyurirangi ulang pado halak na mangkobari di angka hata na so niastuan; asing ma rupani muda adong halak na mangkobari di hata na marragam na so niastuan, tapi laing malo muse ia patorangkon sanga aha na nidoknia i, anso sudena parlagutan i dapotan parsaulian.

1 KORINTUS 8:1

Taringot tu sipanganon na nihaulkon tu gana-ganaan ma saonnari. Jadi tutu do songon na nidok ni halak, “Na dung marparbinotoan do hita sude.” Tapi hamaloan laho mambaen anso pagodang diri do halak, hape nian anggo holong ni roha i laho padenggankon parrohaon ni halak do i.

2 KORINTUS 12:4

Huboto do basa dipatuginjang ia lopus tu Pirdaus, jana dibege ia ma hata na so tarpajojor, na so tola hatahonon ni jolma.

GALATIA 5:22

Tapi anggo parbatu ni Tondi i, on do: Holong ni roha, jop ni roha, hasonangan, lambok ni roha, habasaran, lidang ni roha, hatomanan,

GALATIA 5:6

Angke muda dung marsada hita dohot Kristus Jesus, nada pola parsoalan be na mangihutkon paraturan ni sunat sanga na so mangihutkon aturan i. Manghaporsayai Kristus sajo noma na porlu, jana tarida ma i di bagasan holong ni rohanta maradopkon halak na asing.

1 TIMOTEUS 1:5

Anggo tujuan ni sipaingot i, i ma laho manyungguli holong ni roha na polin sian roha na ias dohot haporsayaan na tutu situtu.

1 PETRUS 4:8

Tapi na umporlu sian sasudena i, marsihaholongan ma hamu sama hamu, angke muda marsihaholongan hamu gabe bahat ma dosa disesa.

2 PETRUS 2:18

Sian angka pangkobarion ni halahi na mardongan lancap jana na rumar i dipake halahi ma hagiot na jat laho mangaronjomkon halak sanga ise na baru malua sian angka na mardalan dihaliluon di ngoluna.

HALUMBAAN 14:2

Jadi hubege ma sada sora na mardorom sian langit songon sora ni sampuran na godang dohot songon sora ni ronggur na godang na matuoror. Habegean ma sora i songon sora ni musik sian angka parhasapi na topet mamiltik hasapina.