1 JOHANNES 3:8 - BIBEL JAMITA NA DENGGAN

⁸ Tapi sanga ise halak na sai torus mambaen dosa, anak ni Sibolis do i, angke na sai mardosa do Sibolis i sian mula ni mulana. Na giot manyegohon karejo ni Sibolis i do umbaen na ro Anak Ni Debata tu portibi on.

1 JOHANNES 3:8 ပူးပေါင်းရင်းမြစ်များ

PAMUNGKAAN 3:15

Marsihosoman ma ho dohot dadaboru i. Marsalisi ma torus pomparanna tu pomparanmu. Ropukkonon ni pomparannia ma ulumu jana turbingonmu ma tambihulna.”

JESAYA 27:1

Pakeon ni Tuhan ma podangNia na togu jana na tajom i laho manguhumi Lewiatan, ulok na margeldok-geldok jana na mangarpe i dohot mamunu naga laut i.

BILANGAN 21:9

Dibaen si Musa ma ulok sian tumbaga jana dibaen ia tu ujung ni sada tiang. Ganop halak na nipagut ni ulok i, gabe malum muda diligi ia tu ulok tumbaga i.

MATEUS 12:28

Tondi Ni Debata do na mangalehen kuaso anggo di Au laho mangusir setan. I ma tandana madung ro Harajaan Ni Debata tu hamu.

MATEUS 13:38

Portibi on ma ladang i. Anggo same na denggan i, i ma angka halak na dung gabe parsidohot di Harajaan i. Simareme-eme i, i ma angka halak na mangoloi si Jahat i.

MATEUS 4:3

Ro ma Sibolis i didok ma tuSia, “Muda Anak Ni Debata do Ho, dokkon ma tu angka batu on anso gabe roti.”

MARKUS 1:24

“Na giot mambaen bia do Ho tu hami, o Jesus halak Nasaret? Betak na giot mamatehon hami do Ho? Hutanda do sanga ise Ho: Suruan na badia ni Debata do Ho!”

LUKAS 10:18

Dialusi Jesus ma, “Huida do madabu Sibolis sian langit songon hilap.

JOHANNES 12:31

Saonnari ma hatihana uhuman portibi on; taluhonon ma raja ni portibi on saonnari.

JOHANNES 16:11

madung manguhumi Debata, dibaen madung hona uhum parkuaso ni portibi on!

JOHANNES 8:44

Angka anak ni Sibolis do hamu. Jadi hagiot ni amangmunu do na nijalahanmunu. Sian mula-mulana do Sibolis i sibunu jolma. Nada mangolu dibagasan hatutuan ia, harana nada adong disia hatutuan. Pargabus do Sibolis, angke songon i hian do bako ni i. Tutu do pargabus Sibolis i, ia do ama ni sandok gabus.

SURAT NI SI PAULUS TU PARLAGUTAN ROM 16:20

Tapi tibu ma diropukkon Debata mual ni hasonangan i, Sibolis i tu toru ni patmunu! Sai didongani asi ni roha ni Tuhanta Jesus Kristus ma hamu. Sai tongtong ma hamu dipasupasu Jesus Kristus Tuhanta i!

EPESUS 2:2

Angka hasomalan ni portibi on do dipaolo-oloi hamu hatiha i; astuanna, tunduk tu angka parkuaso ni harajaan na di awang-awang i do hamu, i ma tondi na laing mangela-ela roha ni angka halak na so ra tunduk tu Debata saonnari.

KOLOSSE 2:15

Sude angka tondi na mamarenta dohot na markuaso gabe gale noma di parsilang ni Kristus i. Gabe sitontonan ni halak na bahat noma halahi dibaen, di na niiring ni Kristus halahi songon halak na tartaban di uduran ni hamonanganNia.

1 TIMOTEUS 3:16

Sada halak pe nada tarbaen mansoadahon sanga na bia godang ni rahasia ni ugamonta: Dipataridahon Ia do diriNia gabe jolma, jana dipatigor di bagasan Tondi, na patidahon diriNia tu angka surusuruan. Dipatubegehon do baritaNa di tonga-tonga ni angka bangso, jana sihaposan do Ia di tano on. Saonnari madung nipanaek Ia tu banua ginjang.

IBRANI 2:14

Angke anggo angka halak na nidokNia i dakdanakNia, i ma angka mudar dohot sibuk, gabe sarupa ma Jesus sandiri dohot halahi jana mangolu songon pangalaho ni jolma sarupa dohot halahi. Songon i pe pambaenNia, anso ditaluhon Ia do Sibolis i na maniop kuaso ni hamatean i.

IBRANI 9:26

Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri.

2 PETRUS 2:4

Haru angka surusuruan na mardosa pe nada dipatola Debata malua sian uhuman, tapi ambungkonon do i tu narako. Pamasuhon do halahi tu inganan na golap anso tarhurung disi lopus tu Ari Paruhuman.

1 JOHANNES 1:2

Madung dipaboa hangoluan i tu portibi on, jana madung hami ida. I ma umbaen na hami saksihon taringot tusi jana hami jamitahon taringot tu ngolu na manongtong na adong hian rap dohot Ama i jana na dung dipatidahon tu hami.

1 JOHANNES 3:10

On ma parasingan ni angka dakdanak ni Debata sian angka dakdanak ni Sibolis: Sanga ise na so patuluskon hatigoran, sanga na so manghaholongi donganna, nada dakdanak ni Debata halak na songon i.

1 JOHANNES 3:5

Diboto hamu do sanga hara ni aha umbaen na ro Kristus, i ma na laho manyesa angka dosa ni jolma jana nada adong dosa di bagasan Ia.

1 JOHANNES 5:19

Taboto do na sian Debata haroroanta, jana sude na satano on di bagasan tangan ni si Parjahat i.

JUDAS 1:6

Laing ingot hamu ma angka surusuruan na so mangargahon jabatan ni halahi, na gabe kehe halahi manadingkon ingananna. Dipasung Debata do angka surusuruan i dohot hayu na so ra sego salolot-lolotna, di inganan na golap situtu. Torus ma halahi disi ditahan lopus nidabu uhum tu halahi di Ari na godang i.

HALUMBAAN 20:10

Dung i didanggurkon ma Sibolis na paoto-otohon halahi i tu bagasan api na marcampur dohot barerang. Disi do inganan ni binatang i dohot panurirang pargabus na nibuang najolo i. Diparkanciti ma halahi disi arian na borngin nada marnamantak ro di salolot-lolotna.

HALUMBAAN 20:15

Sanga ise halak na so adong goarna tarsurat di bagasan buku hangoluan i, diambungkon ma tu bagasan laut api i.